معلش يا جماعة، هو ليه فيه ميل دائم لرمي تُهم في الوسعاية كدا؟ يعني هو انت لما تبين للناس الفرق ما بين "الأديب" و ال "غير ذلك" وتقول ان مش من الصح أبدا ان الغير ذلك دا ينقد أعمال الأديب نقد أدبي لأنه بيتكلم "غلط" .. تلاقي التهمة فوق دماغك انك بتعمل كهنوت؟ مش عيب؟
طيب، بهدوء خالص اهو .. الأستاذ أحمد مراد بيتكلم في ايقاع الرواية، تمام .. يا أستاذ أحمد ايقاع الرواية بتدخل ضمن ما يُسمى بالبنية الدرامية للعمل الأدبي، يعني ايه؟ يعني الرواية دي عمل أدبي، والعمل الأدبي دا فيه شخصيات، الشخصيات دي بتتفاعل مع بعضها ومع العالم بطريقة معينة، تمام؟
طيب، ايه بقى اللي يخلي شخصية س في الرواية تتفاعل بطريقة معينة، والشخصية ص تتفاعل بطريقة مختلفة؟ الاجابة هي ان التكوينات الشعورية والنفسية والفكرية للشخصية س مختلفة عن التكوينات الشعورية والنفسية والفكرية الشخصية ص .. تمام؟
طيب، التكوينات دي نفسها عشان تنشأ لازم لها مصادر، منابع، زي التربية زي البيئة زي الظروف الاقتصادية زي الوضع السياسي زي الظروف الاجتماعية زي السياق التاريخي .. تمام؟
فا لما بتمشي في المسار دا انت بتعمل حاجة اسمها "المقدمة المنطقية" يعني بتخلق انسان حي، وبالضرورة مرحلة الخلق دي بتدي الأولوية للانسان مش للحدث عشان تكون أفعاله بعد كدا وطريقة تفاعله مع الوجود ومع الآخرين "منطقية" زي كل واحد فينا، وباختصار شديد هو دا "الأدب" يا أستاذ أحمد
لكن لو جينا شفنا أعمالك مثلا هنلاقي المشكلة فين؟ ان انت عايز مولد يا استاذ أحمد، عايز دربكة، قتل ودم ودبدبة في الأرض وعفاريت وحبوب هلوسة وعفرة، طب هي الشخصيات دي مالها طيب؟ طب هما زعلانين من ايه؟ طب هما ليه كدا اصلا؟ محدش عارف ولا انت شخصيا يا أبو حميد
بكل هدوء اهو يا أستاذ أحمد، الموضوع لا هو كهنوت ولا غيره .. الفكرة بس انك مش معاك أدوات "الأدب" لا نقدا ولا ابداعا .. دي المقدمة المنطقية اهي، وبالتالي انت غير مؤهل لنقد روايات نجيب محفوظ، مش عشان هو كهنوت أدبي ولكن عشان هو بيتكلم لغة انت مش فاهمها. @Ahmed_Mourad
جاري تحميل الاقتراحات...