يوم الخميس اللى فات كنت قاعد فى الشغل و مش قادر اركز فى حاجه، كل ما اعمل حاجه تطلع غلط، قعدت شويه و احاول اهدى مفيش فايده شربت لتر قهوه عشان افوق، لكن كان واضح انه مش يومى، قولت لهم معلش يا جماعه انا هروح بدل ما اخرب لكوا الشركه #حجو
قامت واحده زميلتى و اخدتنى على جنب و قالت لى لسه فى نفس المشكله؟ رديت اه و كل يوم بيمر عليها ببقى متوتر اكتر و مش عارف اركز، طلعت كارت و قالت لى روح العنوان دا يوم السبت هترتاح، قولت لها عنوان ايه ؟ قالت دا مكان بيعملوا فيه حاجات روحانية و هتلاقى واحده عجوزه من فنزويلا فى انتظارك
فنزويلا ايه و روحانيات ايه انا مبصدقش الكلام دا، قالت يا عّم روح انت مش هتخسر حاجه، و لا تحب اجى معاك، قولت اه تعالى معايا عشان اتريق عليكوا شويه، و اتفقنا نتقابل الساعه ٢ الضهر، مخبيش عليكوا عمرى ما صدقت الناس دى، لكن الفضول كان متملك منى عاوز اروح اتفرج و اعمل فقره كوميديه
و وصلنا هناك لقيت فيلا شيك اوى متقسمه اوض، و ناس كتير واقفه مستنيه دورها، فضلنا قاعدين ساعه بدأت أتوتر و قولتها تعالى نمشى انا زهقت بصراحه كنت عاوز اهرب، و فى اللحظه خرجت ست عجوزه و قالت معلش انا عارفه انى اتاخرت عليك، اتكبست و معرفتش اهرب، و دخلت معاها الاوضه بس شاورت لزميلتى
قالت لها معلش انا عاوزاه لوحده، بدأ علّيا علامات التوتر، و حست العرافه بده، و مسكت ايدى اليمين و قالت لى متخافش احكى اى حاجه و اسئلنى فى اى حاجه، انا حاسه بيكى و هساعدك و مش هاخد منك حتى فلوس، قالت لى غمض عنيك و احكى لى هتشوف ايه، و بدأت تضغط على ايدى و تتمتم بكلام مش مفهوم
غمضت عينى فعلا بدأت اشوف غابه و شجر عالى مفيش فيه اى ورق و تلج كتير، قالت شايف الغابه دى؟ قولت لها اه، قالت دى حياتك اللى انت عيشتها اخر فتره، أمشى شويه و قولى شايف ايه، بدأت اشوف حيوانات متوحشه بتقتل فى بعضها، قالت روح عند الأسد اللى هناك دا و اقتله، قولت لا مش هقدر قالت متخافش
انا معاك و ايدى فى ايدك انت أقوى منه، بدأ أتحرك ناحيه الأسد و بدأ صوته يعلى و جسمى كله بيتنفض، قالت امسك فرع الشجره دا و اضربه بيه، بدأت احس بروحى بتتسحب منى و وقع فرع الشجره من ايدى، قامت مزعقه فيا اقتله بدل ما يقتلك، قبضت ايدى على فرع الشجره و بدأت اضرب فى الأسد زى المجنون
و بدأ دمه يغرق جسمى و بدأت ابكى بصوت عالى، قالت لى الأسد دا هو قرينك الضعيف اللى كان دايما بيعطلك و يخليك تحسب للدنيا حسابات غلط، كمل يا شريف و بدأت تحضنى و تمسح على شعرى و انا مغمض عينى اللى غرقانه دموع، روح عند البيت اللى هناك دا و ارتاح هتلاقى واحده واقفه بتتفرج من شباك مكسور
روح و بص فى عنيها و اوعى تتكلم معاها، هى مش شايفاك اصلا، بدأت اهدى شويه و روحت لحد ما وصلت للشباك و لقيت البنت ، فضلت باصص فى عنيها و حسّيت انها بتدخل جوا روحى، كنت عاوز انطق لكن الست العجوزه حطت أيديها على بوقى قولت لا، مش قبل ما روحك تتطهر، و بدأت تنيمنى على الثلج و تغطى جسمى
برد فظيع مكنتش قادر استحمل لحد ما عملت دايره حواليا و ولعت نار و بدأت النار تعلى و تعلى و تقرب منى، و التلج ساح كله من على جسمى لحد ما شدتنى من ايدى و بدأت تضربنى على ضهرى و قالت لى فتح عينيك، كانت المفاجاه فتحت عينى لقتينى انا معاها فعلا فى الغابه دى بليل، قولت لها هو دا بجد؟
قالت ممنوع اى سؤال دلوقتى لحد ما تخلص رحلتك، مسكت ورق كوتشينه و حطته فى ايدى و قالت أتمنى ٣ امنيات، مسكت الورق و حاولت افكر مجاش فى بالى اى حاجه، قالت افتكر دنيتك كنت محتاج ايه؟ بدأت افكر فى فلوس، قوه، حب،...
و اخترت ٣ حاجات بس كنت متلخبط جدا، قالت الآمنيه الرابعه انا اختارتهالك
و اخترت ٣ حاجات بس كنت متلخبط جدا، قالت الآمنيه الرابعه انا اختارتهالك
شايف الطريق الضلمه دا؟ امشى فيه لحد ما تتعب و لما تلاقى الطريق بدأ ينور حبه صغيرين، هتلاقى بنت اسمها نهى، وقفها و حاول تتكلم معاها بأى طريقه، حتى لو رفضت حتى لو جريت منك اوعى تتخلى عنها، افتكر كويس خلاصك فى أيديها، بدأت امشى امشى اكتر من ٣ ساعات مفيش اى نور و الطريق مرعب جدا،
و أصوات مرعبه فى وسط الهدوء المريب دا لكن كل ما كنت أتلفت ورايا اشوف الست العجوزه ماشيه ورايا و فى أيديها قنديل من نار، و تقولى كمل انت خلاص قربت منها، و بعد فتره شوفت نور خافت جاى من بعيد خلانى بدأت اجرى اجرى، بعد فتره بدأت واحده تظهر ماشيه و فى أيديها شمسيه و جسمها كانه من دخان
جريت عليها بدأت خطواتها تبقى اسرع و اسرع لحد ما اتبخرت فجاه و بدأت تظهر فى مكان تانى ابعد، افتكرت كلمه الست العجوزه و بدأت اجرى وراها و استمرت المطاردة ايام مش ساعات، لحد ما فى يوم قدرت امسك ايديها، و اول مره اخد بالى من ملامحها، انا حاسس انى اعرفها، قالت انا عارفه انى تعبتك،
بس انا كمان كنت بدور عليك من زمان، و كان لازم أتأكد انك هتتعب عشانى، و حطت أيديها على قلبى و فجاه بدأت احس انى بحبها جدا، و بدأ جسمها ميبقاش دخان، ايه دا دى نهى اول قصه حب فى حياتى!! مهما قابلت و شوفت ناس بس كانت بتيجى فى بالى كل فتره، كنّا عيال وقتها و منقدرش على الحب
فجاه الست العجوزه مسحت على وشى و فوقت من الحلم المرعب و الجميل اللى كنت فيه، لقيت نفسى ادامها فى مكتبها ، قالت شوف يا ابنى دا مكنش حلم، دا كان تصور لحياتك بس بشكل مختلف، كان مهم انك تكسر خوفك و تتعلم تسيطر على انفعالاتك و تجرى احيانا ورا هدف مهم و تستسلم ساعات لما تنكسر
مش عيب انك تنهزم مره و تقول انا المره فشلت، لكن متطولش لان الدنيا مش هتستناك، و نهى اللى كانت حبك زمان هتلاقيها فى صور ناس كتير غيرها رجاله و ستات و اطفال، حب فى كل حاجه تفكرك ب نهى، هتلاقى نفسك و روحك لما تهدى هتلاقى حد فيه كل اللى بتتمناه. بس خلاص #حجو
جاري تحميل الاقتراحات...