ليش فيه ناس كثير يطفشون من أفلام مارفل ويشوفونها صارت تكرر نفسها، بينما أفلام المافيا مع إن لها عقود طويلة في السينما إلا إن الناس يشعرون كل مره إنها تجارب جديدة، رأيي هو إن الموضوع له علاقة بالحدود اللي يضعها صانعي هذي الأفلام لأنفسهم وهم يكتبون العوالم اللي تجري فيها الأحداث1⃣

في أفلام مارفل نشاهد أبطال خارقين وأشرار خارقين، ويصل الأمر لذروته يوم نشوف "ثانوس" اللي يطق اصبع ويقدر يحول خصومه لرماد، كل شيء جائز وكل شيء ممكن في هذي العوالم فعنصر المفاجأة اللي هو جزء مهم في أي قصه يصير صعب استخدامه 2⃣

القصص اللي نشوفها ممتعه هي اللي فيها شروط تحكم عوالم هالشخصيات، أشبه بلغز يستمتع المشاهد برؤية صانع الفيلم يحله أمامه، الشيء الآخر هو إننا كبشر نحب نشاهد شخصيات نشعر فيها من حيث إنها شخصيات نقدر نشوف أنفسنا في مكانها بسهوله، هالشيء غير متاح وحنا نشوف آيرون مان يصير أقوى كل مره 3⃣

وهنا نشوف كيف ناس كثير حبوا "الجوكر" أعتقد سبب مهم هو إن كلنا نشوف شيء من أنفسنا في الجوكر، شخص بسيط ملعون جدفه والناس من حوله يستحقرونه ويظلمونه لين في النهايه فصل، هذي تجربه تقريباً كلنا نمر فيها وإن ماكانت بنفس الشدة إلا إنها تلامس جزء عميق ومهم جداً في نفس الإنسان. 4⃣