الأسبوع دة خلصت كتاب بوب آيجر المدير التنفيذى فى ديزنى. الراجل شغال فى الشركة بقاله 45 سنة ، بدأ فى قناة ABC وفضل يطلع لحد ما بقى رئيس ديزنى كلها. الكتاب مليان دروس بس أكتر حتة شدتنى قصته مع ستيف جوبز وإزاى إنه كان مرعوب يكلمه عشان يبيع Pixar لديزنى...
ستيف جوبز كان متخانق مع مدير ديزنى اللى قبله وفض الشراكة اللى مابين بيكسار وديزنى وبعدها بدأ يسبلهم فى الميديا ويقول عليهم مفلسين إبداعيا ودة ستيف فكلمته كانت مسموعة ، الراجل الجديد قعد يخطط إزاى يرجع العلاقة بين الشركتين وإزاى يفاتحه أصلا فى فكرة إنهم يشترو منه بيكسار.
بعد كذا محادثة عرف يقنع جوبز وجوبز قال له أنا مش هبيع إلا لو ال2 الشركا اللى معايا وافقو ، الراجل قاله هخليهم هما اللى بيديرو الرسوم المتحركة فى ديزنى كلها مش بس بيكسار. بعدها حاول يقنع مجلس إدارة ديزنى يوافقو عالديل اللى كان غالى جدا وكان هيخلى ستيف جوبز أكبر مساهم فى ديزنى!
بعد ما عدو كل حاجة ، قبل الإعلان عن الديل بأقل من ساعتين ستيف جوبز قال له تعالى نتمشى ، وهما بيتمشو راحو قعدو على جنب وقال له أنا هقولك حاجة محدش يعرفها غير مراتى والدكتور ، قاله إن السرطان رجع وقدامه شوية قليلين ويسيب الدنيا وقاله أنا بقولك عشان أديك فرصة تنسحب من الديل.
الراجل بيقول ماعرفتش أعمل إيه خصوصا إن جوبز قاله ماينفعش تقول الخبر دة ﻷى حد فمعرفش يستشير أى حد عنده فى الشركة ، فى الآخر قرر يكمل الديل فى معاده زى ما اتفقو.
بعدها جوبز بقى صاحبه وبقو يخرجو ويسافرو مع بعض ، وهو اللى ساعده يشترى مارفل ﻷن الراجل بتاع مارفل كان رافض حتى يقعد مع بتاع ديزنى لحد ما ستيف كلمه وقاله ما تظبط ياض.
الراجل بيقول لو ستيف كان عايش مكانش مستبعد إن أبل وديزنى يندمجو فى شركة واحدة ، ومرات ستيف قالتله يوم الجنازة إن يوم ما قاله على سر المرض رجع وقالها أنا بحب الراجل دة أوى
أحلى حاجة فى الكتاب دة إنه بيحكى قصتين مع شخصيات مهمة هما كمان كتبو مذكراتهم ، ستيف جوبز ، ومايكل أوفيتز اللى كان رئيس ديزنى فى وقت من الأوقات. فبتقرأ أحيانا نفس القصة من منظور كل واحد فيهم لو قريت ال3 كتب.
جاري تحميل الاقتراحات...