نعمل أهداف وما نحققها ونعمل أهداف ثاني وكمان ما نحققها ونجرب مرة ثالثة وبرضو ما نوصل ? طيب وبعدين ؟! بلاش نعمل أهداف ولا نكمل نجرب ؟! حأقولكم بعض الأشياء اللي اتوصلت لها في هذا الموضوع ??
طبيعي جدا اننا ممكن ما نحقق الأهداف أهم شي ما يزيد تأنيبنا لذاتنا لدرجة نفقد الأمل من نفسنا، ٢٪ هم اللي يلتزموا بتحقيق الأهداف و٩٨ ما يلتزموا بس طبعا هذا مو شي يخلينا نقول بلاش نلتزم بالأهداف او بلاش نكتب نحن نبغى دايما نكون الأفضل او الأحسن
الاهداف لازم ما تكون في المخ لازم تتحول على ورق والطريقة اللي ناسبتني اني اكتب في البداية كل الأحلام و الأماني بدون حدود او قيود وبعدين اسأل نفسي ليش أحقق هذا الهدف ؟ ايش حيضيف لي هذا الهدف؟ مثلا شي مادي أبغى سيارة؟ طيب ليش وهل أحتاج فعلا ؟ أو شي معنوي مثلا شهادة مهنية
وبعدين نبدأ نصغر الأهداف الطريقة المناسبة لي اني بعد ما أحلم أحط أهداف ٣ أشهر وأحيانا أحط لشهرين وفِي حالتي الان السنة هذه بقي شهرين على نهاية السنة فحأكتب لشهرين
وبعدين ابدأ أحط تواريخ وأكوووووون منطقية لأنه غالبا أتحمس واكتب شي مثالي وهو فعلا مستحيل بس مع الحماس أحس اني مرة قوية وأقدر اعمل كل شي في وقت خيالي لكن فعليا لمن اجي للواقع ألاقي نفسي مو قادرة فلازم أكون منطقية في التواريخ
خلاص رتبت توقيت الاهداف اللي اقدر اعملها في شهرين، يا سلام ? حأراجع هل كلها منطقية ومحددة يعني مو هادف عام مثلا أبغى أنزل من وزني ممتاز هذا حلم أحوله لهدف وأقول كم كيلو ؟ ومتى ؟ وكيف ؟ وليش ؟ ابغى انزل كم ؟ ٥ كيلو في شهرين كيف ؟ اكل صحي ورياضة ليش؟ عشان اقلل الدهون
طيب كيف ممكن الهدف هذا اصغره لأهداف يومية ؟ وياللا ابدأ أفكك الهدف وأفكر كيف ممكن يكون مناسب لحياتي ومناسب لشخصيتي؟ الرياضة كم مرة في الأسبوع في النهار ولا في الليل كم دقيقة وهكذا
طيب عملت كل شي هدف كبير وأهداف صغيرة وفككت كل شي وعملت جدول وكل شي مرتب وواضح وواقعي وأحسن ما يكون وفِي النهاية ما عملت شي ?
ممكن اربط الإنجازات الصغيرة بمكافأة وأكون حازمة مع نفسي مثلا ما راح امسك الجوال الا بعد ما انتهي رياضة أو بعد خمسة أيام التزام حآكل وجبة أحبها وهكذا
طيب عملت كل شي وبرضو كنت ضعيفة وما التزمت مو مشكلة ياللا نرجع ثاني وثالث ورابع وعاشر ونحاول وما ننيأس ولا نفقد الأمل في نفسنا، هي الحياة مو سهلة واكيد لازم اتعب مع نفسي كثير وأجاهدها عشان تسير أفضل وأتعلم طرق وأدوات عشان اقدر الزمها بتحقيق الأهداف ???
جاري تحميل الاقتراحات...