رتبها

مكنتش عارفة وانا بحضر شنطتي احط فيها ايه هدوم و كتب و مكياج وبرفان و حاجاتي الشخصية زي اي حد مسافر .. ولا املاها بحيطان البيت الي كبرت واتربيت فيه و احط جواها كل ركن ليا في ذكري
اخد معايا ضحكة امي وملامحها و حنية بابا و نصايحه ليا ذكرياتي مع المعادي الحي الي كبرت

بين شوارعه و مدرستي و النادي و حفظت كل شارع في زي اسمي شارع ٩ و ٧ ثكنات المعادي شارع النصر قبل ما يبقي شارع تجاري و جراند مول الي كان من اوئل المول الي اتنبت القمر الصناعي دجله وشوراعها و ميادينها الشوراع الهادية و المزيكا الي بتسمعها لما تقرب من ميدان في تجمع شباب

مكان كل شجرة مزروعة من سنين كل فيلا لسه واقفة مكانها ومحتفظة بهيبتها كل ميدان بتدخل فيه و تطلع منه تلاقي نفسك تاني عند نفس الحتة الجري و اللف بالعجل خصوصا بعد الفجر ريحة الورد في الشوراع في الربيع و ورق الشجر الي مالي الارصفة في الخريف

جيراني الي كلنا عارفين بعض حتي لو من غير اسامي بس كلنا حافظين ملامحنا و وشوشنا وسهل نعرف لو بينا اي غريب
قعدتي عالنيل بالساعات وانا بسمع منير وسفريات اسكندرية في عز الشتا و القعدة عالكورنيش

فنجان القهوة علي قهاوي وسط البلد و الايس كريم من العبد و قويدر ساندوتش الفول من ايد عم احمد الي ميعلاش علي فوله ولا اجدع مطعم خمس نجوم
اصطباحة عم سالم صاحب الكشك الي جنب بيتناو ابتسامته الهادية وهو بيقولي وانا باخد العصير و المولتو زي كل يوم من ايام المدرسة لحد النهاردة علي مهلك

علي مهلك يابنتي الدنيا ماطارتش
صحابي و معارفي و اهلي و ذكرياتي كل دول هسيبهم هنا وامشي اروح اعمل ذكريات جديدة وسط ناس جديدة وعلي ارض تانية
حسيت كأني شجرة بتقلع جذورها من ارضها عشان تزرعها في ارض تانية

خوفت يا تري الارض دي هتكون حنينة عليا زي ارضي ولا هتطردني منها لاني غريبة عنها و رغم ان قرار سفري كان بكامل ارادتي الا اني برضة كنت قلقانة منه مش قادرة اصدق اني بعد اكتر من ٢٥ سنة هسيب البيت و الحي و مصر كلها بكل الي ليا علي ارضها

من افراح و احزان و ذكريات امشي مش واخدة معايا غير شوية صور وذكريات جوه قلبي و الحنين اني ارجع قبل ما اوصل المطار اصلا
الغربة بالنسبالي مكنتش غربة مكان قد ما كانت غربة عن احباب و اهل ومواقف و ذكريات مشتركة لغة واحدة و ذاكرة موسيقية و فنية واحدة

يعني انا لما اسافر واقول لحد جنبي ده عماد ماكدلي هيضحك ولا هيفهمني ولا لما اقوله انا بابا يالا هيعرف بابا مين طب و اغاني عمرو ومنير مش هسمعها من شباك العربيات وسط زحمة شوراع والاشارات

بصيت في الساعة اكتشفت اني بقالي ساعتين بلف في الاوضة وان خلاص لازم اتحرك عالمطار مفيش وقت
وكانت راندا صحبتي الي صممت توصلني المطار وصلت فعلا
حسيت بخنقة وانا بجر شنطتي وبقفل باب الاوضة ورايا و كان بجر في الشنطة سنين عمري الي فاتت كلها عشان اخدها معايا ماهو اكيد مش هينفع اسيبها

ايه يابنتي كل ده بقالى ربع ساعة هتتاخري عالطيارة
اسكتي ياراندا الله يخليكي
انتي لسه مقبوضة برضة من السفر
ايوة و جدا
يا مرام يا حبيبتي هو حد يطول الفرصة الي جايلك دي سنة تشوفي فيها بلد جديدة وناس تانية و تتعلمي تقنيات جديدة يعني شغل و دراسة وفسحة ودلع
مانا عشان كدة وافقت بس

صدقيني الاحساس صعب وانتي بتخرجي من ارضك عشان تروحي ضيفة في ارض تانية ياعالم هتحسي ناحيتها بايه
طب بطلي دراما يا كوين اوف دراما وامسكي افطري سندوتشات فول من عم احمد عشان يفضل طعمها في بوقك عارفاكي فقرية
طب مينفعش نعدي علي قهوة صالح نشرب كوباية شاي بالنعناع بالمرة

فضلنا نحكي و نتكلم انا و راندا وانا بدعي الطريق مايخلصش ولا نوصل نلاقي الطيارة طلعت مثلا
انا عارفة ان كلام راندا صح وانها فرصة حلوة لاي حد يتمناها بس انا خايفة رغم تحمسي ليها في البداية بس دلوقت انا لازم اعترف انا بكره الغربة من قبل ما حس بيها

الاجراءات خصلت بسرعة البرق و كأن الوقت و القدر بيناعدني
ايه ده انا خلاص في الطيارة فعلا
وقتها حسيت اني ممكن اقوم افتح باب الطيارة و انزل
خنقة و توتر مش طبيعي
لدرجة ان الشخص الي قاعد جنبي لاحظها ولاقيته بيسالني بلغة عربية مش مظبوطة اوي

اول مرة تركبي طيارة ؟
ايوة .. رديت وانا عايزة اقوله بس مش ده سبب القلق
طيب استرخي و غمضي عينكي وعد بالعكس من ١ ل١٠ ولو لسه متوترة كرريها تاني
غمضت عيني وبدات اعد بس لاقيت نفسي بعد للمرة الرابعة ولسه متوترة و ان كان التوتر قل كتير وكمان لحظة الاقلاع الصعبة عدت

سحبت من شطنتي الكتاب الي كنت محضراه يكون شريك للرحلة وكان فن اللامبالاة
لما طلعته لاقيت جاري ابتسم بود بادلته الابتسامة فسالني بصوت في خفة دم
بتحبي القراية ولا بتشجعي فخر العرب
ضحكت وقلت له الاتنين
انا طارق قدم لي نفسه
وانا مرام

عرفت انه مهاجر مع اهله من سنين وانه بس بيرجع مصر زيارات كل فترة بعيدة
معرفش ازاي اندمجنا في الكلام طول الرحلة لدرجة اني ماخدتش بالي الا والمضيفة بتطلب مننا ربط حزام الامان استعداد للهبوط
مرام ده رقم تليفوني و عنواني هنا لو احتجتي اي حاجة متردديش كلميني فورا

قالها لي واحنا خارجين من المطار تابعته وهو خارج لاقيت بنت حلوة جدا كانت مستيناه حضنها بشوق واضح معلن و مشيوا سوا
اول لحظة لوحدي في الغربة حسيت اني تايهة ورقة شجرة واقعة من غصن عالارض والهوا هيبدا يلعب بيها وهي لا حول ولا قوة و كملت كمان ان محدش كان مستنيني

يعني من اول لحظة مضطرة اوجه لوحدي
طلبت تاكسي وقلت له العنوان الي المفروض هيكون مكان سكني الجديد المكان كان بعيد شفت اكتر من نص البلد في الطريق ولاننا كنا بالليل مكنش في زحمة كبيرة ده خلاني اتأمل الطريق و البلد بحرية اكبر
وصلت محطتي الجديدة ماهو ده مش بيت ولا سكن دي محطة مؤقته

البيت واضح ان علي و سارة زمايلي الي سبقوني هنا كانوا مهتمين بيه علي الحطيان في لوحات فرعونية شوية صور للنيل كتب عن مصر و كام سي دي لام كلثوم و سيد مكاوي و رسالة من سارة
"حمد لله السلامة اسفة اني مش في استقبالك طلعت رحلة سريعة و هرجع بكرة بالليل take care لحد ما اشوفك بكرة سارة"

سارة كانت زميلتي في معهد السينما و نفس قسم التصوير و الاخراج لمدة ٣ سنين لانها كانت سابقاني بسنة و كانت من اول الناس الي اتوافق علي سفرها لنفس البعثة بتاعتي وسبتقني في السفر بكام شهر و اديني اهو حصلتها يمكن مكناش صحاب اوي واحنا في مصر لما نشوف الغربة هتقربنا ولا هتبعدنا

مش بيقولوا الناس بتعرف بعضها علي حق في السفر
زي عادتي لما بغير مكاني مش بعرف انام فضلت طول الليل ما بين السرير و الشباك الي كان بيطل علي ميدان واسع كبير_ بس برضه مش شبه ميادين المعادي ولا في روح التحرير ولا زحمة رمسيس_و الموبايل و الكتاب الي مكنتش لحقت اقرا منه كام صفحة في الرحلة

لحد ما طلع النهار اخيرا فقررت انزل اشوف المكان حواليا و اتفرج احفظ الشوارع و اشوف وشوش الناس يمكن اقدر اندمج اسرع
الشوراع انضف اوسع و منظمة اكتر بس فيها حاجة ناقصة مفيش فيها روح المعادي ولا ضحكة عم سالم و عربية فول عم احمد و السلالم مفهاش ريحة ملوخية طنط نادية ولا مسقعة طنط سناء

مش هنكر البلد حلوة بس مفتقدة الروح زي بنت حلوة جدا تشدك من بعيد بس لما تقرب منها تلاقي نفسك زهقت بعد ربع ساعة بالكتير
رجعت سارة و بدات اتابع المحاضرات و ورش العمل و اندمج في الشغل و المذاكرة بس برضه احساس الغربة و الحنين لسه ساكن جوه مني

معايا ناس من جنسيات مختلفة وثقافات مختلفة كلهم شايفني غريبة وان دي فرصة غيري كتير كان يحلم بيها حتي سارة نفسها قالت لي انها بتفكر مترجعش تاني بعد ما مدة الدراسة تخلص وانها ارتاحت العيشة هنا انضف و اكتر رفاهية و كل واحد في حاله وعلي حريته و هتقدر تثبت نفسها في الشغل اكتر

وفلوس احسن ايه الي يرجعها بقي
جايز عندها حق بس انا ليا هناك اهلي و صحابي و ذكرياتي و دنيا كاملة صعب عليا ابدأ حياة جديدة هنا وانا لسه جدوري ماسكة في الارض هناك انا سمكة لو خرجت بره بحرها تموت

كان بابا دايما بيقول كدة لما ماما كانت بتطلب منه يسبوا شقة المعادي الضيقة لشقة اكبر في الشروق ولا العبور واضح اني زيك يا حج عامر سمكة مش بتعيش الا في بحرها

بعد طول محايلة قررت اخرج مع سارة و اصحابها في الويك اند كان بقالي شهر ونص من وقت ما جيت برفض و بكتفي بالتمشية في الشوراع و الجري الصبح و الفرجة علي الافلام الجديدة في السينمات
مكان لطيف وموسيقي هادية مش دوشة
ولا زحمة زي ما كنت فاكرة

بعيد شوية في مكان مخصوص للرقص بس برضه علي موسيقي هادية
قعدت اتكلم شوية مع الموجودين الي اقدر اقول كانوا لطاف و بعد شوية قربت من ساحة الرقص اتفرج عن قرب
تسمحيلي بالرقصة دي
مين؟ معقول طارق

ايه الصدفة الحلوة دي انا قلت مش هشوفك تاني
فعلا صدفة حلوة
ها ترقصي
مش عايزة اخدك من الناس الي معاك
مش معايا حد مهم
يلا بينا
يلا
ها قولي مبسوطة
مش اوي
ليه
مصر وحشتني

بكرة تتعودي
مش عايزة اتعود
ليه
انا مش بحب الغربة
بس البلد هنا احسن كتير
عارفة بس انا مش بحب البلد بس انا هنا ناقصني حلمي الي مش هيكمل الا وسط اهلي ناقصني دفء اهلي ذكرياتي و مشاعري هنا الدنيا حلوة بس جافة مفهاش مشاعر فيها حاجة ناقصة ضحكت وانا بقوله زي الفتة من غير خل و توم

و المولوخية من تقلية .. تعرف التقلية ولا انت اجنبي
لا متخافيش فاكرها لسه .. انا مضطر امشي بس انا عايز اشوفك تاني ينفع نتقابل هنا الويك اند الجاي
للاسف الاسبوع الجاي عندي مشروع لازم اسلمه وغالبا هكون مشغولة في

خلاص هقابلك نشرب قهوة في اي مكان ساعة و تكملي مشروعك
سكت شوية لاقيته بيقولي متفكريش
يوم السبت في كافية Giolitti عارفه
اه عارفه
الساعة ٥ كويس
كويس جدا
اشطة
ضحكت بصوت عالي جدا غمز لي ومشي وانا لسه بضحك

اتقابلنا يوم السبت حسب المعياد
حكي لي علي هجرة اهله لهنا من سنين لدرجة انه مش فاكر اي حاجة عن طفولته في مصر صحابه هنا شغله حياته عرفت انه شغال في مجال البرمجيات في شركة من الشركات الكبيرة وانه له وضعه وحياته وان زياراته لمصر شوية بشوية بقت من باب الفسحة

اتكررت مقابلاتي مع طارق و بدات اشوف البلد بشكل تاني و عين تانية وداني اماكن كتير مكنتش هشوفها الا معاه اماكن فيها مصريين و عرب و معارض و متاحف و حواري واكلني اكل عمري ما سمعت عنه و بقينا نقضي تقريبا اغلب ايام الاجازة سوا
لحد ما في يوم اتصل بيا و اعتذر عن مقابلة الاسبوع ده

وقالي انه وراه حاجة مهمة مينفعش تتاجل وان اننا هنتقابل الاسبوع الجاي في مفاجاة
حسيت فجاة بخنقة و زهق فقررت اني مش هنزل من البيت الويك اند ده هقضيه نوم و قراية و اتفرج لي علي كام فيلم مصري قديم وخلاص

وفعلا مر الاسبوع عادي لحد الويك اند الجديد لاقيت طارق بيتصل بيقولي احنا طالعين مزرعة في قرية قريبة مود تاني هيعجبك اوي بس اعملي حسابك في يومين و هنرجع الاحد بالليل
حسيت باثارة جدا للمغامرة دي و توقعت ان اليومين دول هيكونوا مميزين جدا مزرعة في الريف الاوربي اكيد رحلة ممتعة

و زي ماتوقعت بيت مش كبير و مش صغير مبني عالطراز القديم وسط مرزعة كبيرة و حواليها مزارع تانية عنب و كرز و منظر رائع لدرجة اني افتكرت كل اغاني فيروز
ايه رايك في المكان
حلو اوي اوي
انا توقعت برضة انه يعجبك تعالي

اخدني من ايديا وفضلنا نمشي ونجري وسط الخضرة و الرزع لحد ما تعبنا وقعدنا علي الارض و احنا بنضحك
عارفة انك حلوة اوي مش قصدي شكلك لا روحك حلوة تتحب
ضحكت و معلقتش

انا تعبت وجوعت هو مفيش عشا هنا ولا ايه
في طبعا عشا خمس نجوم
رجعنا البيت لاقيت سفرة متحضرة عليها ممبار وفتة و رقاق وبط و ملوخية
ها ايه رايك اعرف التقلية ولا خواجة
انت تجنن عملت كدة ازاي
سر المهنة يلا بس قولي رايك في الاكل
من قبل ما ادوق رحيته باينة

بعد اليوم ده علاقتي بطارق اتغيرت قربنا من بعض اكتر مبقتش اشوفه في الاجازات بس لا بقينا مع بعض اغلب الوقت الي فاضين في عرفني علي اصحابه الي كان في منهم عرب و مصريين اندمجت في وسطهم جامد جدا وحبيت ناس منهم وبقينا اصحاب

فجاة لاقيت نفسي ليا حياة و ناس واصحاب و اماكن و ذكريات في البلد الغريبة الي من كام شهر مكنتش قادرة اقضي فيها يوم حفظت شوراعها و مطاعمها حبيت اكلها واتعودت عليه حولت اوضتي في السكن لمكان مميز جدا كل ركن في جواه جزء من روحي

استغربت ازاي كدة وبسرعة بس الحقيقي كان الفضل لوجود طارق
طارق ياتري انا ايه مشاعري من ناحيته مجرد رفيق غربة و سفر ولا اكتر مش عارفة وملوش لازمة اعرف لاني اكيد بالنسباله مش مجرد صديقة

الشهور جريت اسرع مما اتوقع خلاص باقي لي شهر ونص و ارجع مصر ياااه برغم كل حاجة حلوة هنا بس مصر وحشتني افتكرت فيلم عسل اسود وهو بيقوله انابحب مصر ليه معرفش

في نص الاسبوع كلمني طارق الي اعتذر عن انشغاله الاسبوع دة في شغله و طلب مني احضر نفسي لسهرة مميزة اخر الاسبوع بمناسبة عيد ميلاده وافقت طبعا فورا وقضيت باقي الاسبوع بحضر نفسي للحفلة بفستان مميز جدا و قصيت شعري وعملت نيولوك و كنت محتارة جدا في الهدية

لحد ما قررت اجيب له حاجة مميزة يفتكرني بيها وفعلا روحت لمحل فضة طلبت منه ولاعة بكافر مميز من ناحية عليه اسمه و من التانية عليه جملة "قلوب كأفئدة الطير" عجب الشاب الي شغال في المحل التصميم الي اختارته و الجملة

ووعدني انه هيطلعها زي ما هي في خيالي وصدق فعلا
وصلت في المعياد بالظبط شافني طارق و كأنه بيشوفني لاول مرة
ايه ده اكيد انتي نجمة سنمائية ماشية عالرد كاربت في مهرجان كان وجاية الحفلة غلط
ضحكت وقولته اكيد مكاني مش هنا

قضينا الحفلة وسط اصحابه و اخته الي شفتها معاه في المطار و وقتها عرفت اني كنت عبيطة لاني طول الوقت كنت فاكرها صحبته ومستغربة ليه ماشفتهاش ولا مرة معاه
بعد الحفلة ما خلصت طارق قالي انه عايز يتكلم معايا و اخدني قعدنا قدام النهر و الجو كان في لسعة برد فكرتني بقعدة النيل في المعادي

مرام انتي عارفة ان فاضلك شهر و ترجعي مصر
ايوة عارفة
طب انتي عايزة ترجعي لسه
اكيد
طب لو قلت لك مترجعيش خليكي معايا هنا
هنا فين و ازاي
مرام هنا فرصتك احسن وحياتك هتكون احسن هترجعي هناك ليه

هرجع لبلدي لاهلي لجذوري انا حاسة اني شجرة من غير جدر سهل اوي تقع في اي لحظة ومحدش يسندها هناك حتي لو وقعت هلاقي الي يسندني
طب وانا
انت ايه
انا بحبك خليكي معايا

الكلمة قالها بمنتهي البساطة كأنه بيقولي ازيك بس وقعها عليا كان بالظبط زي حتة تلج اتحطت تحت الشمس لحد ما ساحت مبقتش عارفة ارد ولا قادرة اتكلم
طارق انا
استني مترديش فكري خدي وقتك في التفكير بس اعرفي اني محتاجلك جنبي واني بحبك ومتمسك بوجودك جنبي

جايز مقولتش ده قبل كدة بس لاني كنت محتاج اتاكد من مشاعري لاني مش هطلب منك تغيري خططك الي انا عارفها كويس الا لما اكون واثق جدا من احساسي و حبي ليكي بس لما فكرت لاقيت اني بديهي اكون بحبك وبحبك وجودك جنبي ضحكتك عفويتك طموحك روحك الحلوة

حاجات كتير صعب الخصها في كلام بس صدقيني لو ركزتي هتشوفيها من غير ما اقولها
سكتت شوية وكأني بجمع كلامه بس انا كنت بجمع روحي الي اتبعرت مش بكلامه بس لا بنظرة الصدق الي كانت طالة من عنيه ولاقتني بقوله من غير تردد

طيب ما ترجع انت معايا هناك
صعب يا مرام انتي تقدري تعملي جدور جديدة هنا لكن انا صعب اني ازرع تاني جدوري الي اتقلعت من الارض و كبرت وفرعت هنا
اجابته صدمتني كنت فاكرة انه ممكن يغير خططه عشاني خصوصا انه هو هنا برضه غريب مهما عمل دي مش ارضه ولا بلده
وانا مش هقدر اسيب كل الي فات

وامسحه من حياتي عشان ابدا حياة جديدة هنا
طب فكري لسه باقي شهر جايز تغيري رايك
صعب يا طارق
صعب بس مش مستحيل وانا هكون جنبك هنعمل عيلة و بيت هنا
عيلة من جدور ثابته في الارض و بيت من غير اساس سهل في اي لحظة يتهد وانا مش هتعب في بيت ملوش اساس

ولا عيلة ملهاش اصل في ناس جايز غيري تقدر وجايز كمان تكون مبسوطة بكدة بس انا صعب
طب فكري ادينا فرصة جايز نقدر
حاضر هفكر و انت كمان فكر يمكن واحد فينا يقدر يمشي خطوة للتاني عشان نعرف نتقابل

بص لي بنظرة كأنه بيترجاني و بصيت له بنظرة كلها تمني انه يعيد تفكير عشاني
وصلني طارق البيت ولاقيت نفسي بدل ما بفكر بفتح الشنطة و بحط فيها شوية الذكريات الي عملتهم هنا عشان ارجع بيهم ..

معرفش للحظة دي هرجع ولا ولو رجعت هرجع لوحدي ولا هيكون جنبي زي ما جينا سوا .. و مازالت تحت قيد الامل و الانتظار
تمت
#قيد_الامل

@antibiotic2030

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد