رتبها

هل يوجد ارتباط شرطي بين قوة المشاعر واستحالة ترجمتها على ارض الواقع لعلاقة آمنة بين الاتنين؟؟
ليه اقوى مشاعر الحب جوانا مبتتولدش الا للي مستحيل يكونوا من نصيبنا؟
ليه قصص الفشل في الحب هي الي التاريخ خلدها؟
.
عايز تعرف ظبط موجة حسابك علتغريدة دي وبعد قليل وثريد(يستفتونك في الحب)

تحذييير :- كاتب هذا الثريد ضار جدا بالصحة ويسبب الوفاة.
ملحوظة :- كاتب هذا الثريد فشل في كل علاقاتة العاطفية والزوجية والاسرية .
يعني بعون الله اكس بوي فريندز ومطلق عدة مرات واهلي متبريين مني .
بس احتمال تستفيد ومتعملش اخطائي واحتمال تعمل اخطائي بالظبط ؛ وده الاحتمال الاكبر

طبعا احنا عارفين كلنا ان الحب مش مجرد علاقة بين ولد وبنت وكده . لا في حب الاخوات والاصحاب لبعضهم وحب بابي ومامي و....الخ.
بس لو انت او انتي داخلة الثريد عشان فاكرة اننا حنتكلمىعن الانواع دي فاقول لحضرتك اسفين مش حنتكلم عنهم احنا حنتكلم عن شكل واحد وهو الحب بين اي شاب واي فتاة

وحنعتمد عالمنهج العلمي البحت في التقصي والبحث للوصول للحقائق من غير ما نقع في فخ التعميم يعني لازم نحط قاعدة ثابته كده يا اخونا كل القواعد ليها ستثنائات وكمان لازم نفهم ان قاعدة الفروق الفردية بتسيطر على اي شكل من اشكال الحالات النفسية والعلاقات الاجتماعية

طبعا برضو في اسئلة انا حطتها في الهيد بتاع الثريد ، الاسئلة دي كانت حضراتكم جر رجل ، ايوه زي ما سمعت كده جر رجل عشان تيجي وتعرف اجابات .
انا معنديش اجابات انا عندي طرح وشرح ومن خلاله حنوصل كلنا للاجابات

طب شايف واحد هناك حاطط صورة الممثل الي بيمثل انه ارطغرل في مسلسل شهير يحمل ذات الاسم عايز يشتم ويقولي وده وقته وده تهريج وكلام من ده ، احب اقول لحضرتك الحاجة في البحث عن اصل الاشياء عموما لا ترتبط بوقت ، دي نمرة واحد.
نمرة اتنين علماء ولا حضرتك ولا انا ولا كل علماء المسلمين

دلوقتي نيجي حجر لزق في شراك نعل احدهم كتبوا عن الموضوع ده في اوقات حرجة جدا نذكر منهم بن حزم (الطوق والحمامة) بن الجوزي (اخبار النساء) جلال الدين السيوطي(نواضر الايك في معرفة ....) .
وغيرهم كتير .
طب ليه الكلام عن الحب مهم لانه فعليا من اهم الروابط الانسانية الي اتخلقت،

الحب بيأثر فعليا في كيمياء الانسان وموده بيغير طبيعته ويهذب روحه.
وطبعا مننساش خالدة الذكر الفنانة يسرا ربنا يهدها لما قالت ( روح للناس يا حب) ومن ساعتها انا معرفش اتنين حبوا بعض وكملوا الصراحة.
المهم منطولش اكتر من كده ونقول اننا حناخد منهج عكسي شوية والمينتور بتاعي في

الموضوع ده كان الصحابي (حذيفة بن اليمان) لما قال كنت بسئل عن الشر مخافة ان يصيبني.
احنا برضو حنبدا بالانواع الشريرة من الحب ( العلاقات التوكسيك) بانوعها عشان نهرب منها وقادر يا كريم يشفي كل مريض.
حنغطي في كل نوع من انواع الحب نوعين رئيسين ( رييل لايف وسوشيالوميديا)يعني مش حنخلي

حب السوشيال حب منفصل لا ، حنشرح كل نوع سواء كان توكسيك او كويس ونعرض لشكله جوه السوشيال بيبقى ماشي ازاي .
اخيرا يا ريت لو في اسئلة نأجلها للاخر لما اخلص الي عندي ونخليه ثريد تفاعلي ، الي عنده حاجة يصلحها ميقولهاش لاني مبقولش حاجة غلط ، ولو في حاجة مقولتهاش برضك محدش يقولها لاني

اكيد حكون مش عايز اقولها اصلا وبالتالي قوالتك زي قلتها يا معلم 😂😂😂😂
بهرج يا جماعة قولوا الي انتوا عايزينه .

I'm in love with her or I'm in love
with the feeling
هو انا بحبها ولا حابب احساس اني بحبها وعايش قصة حب ؟
السؤال الفلسفي العميق ده لو اتجاوب صح اقدر اقول وبدون مبالغة اكتر من تلتين العلاقات الي بتعاني من مشاكل حتلاقي حلولها لان تقريبا مش حيبقى موجود غير تلت علاقات الحب بس

بمعنى كتير منا بيقع في الغلط ده بيحب انه يكون في الحالة (حالة الحب ووجود شريك يتقاسم معاه تفاصيل اليوم ويسمعوا بعض اغاني ويخرجوا ويحس باهتمامه وغيرته ....الخ).
طب حد ممكن يسئل ليه مبدئناش بتعريف الحب ارد واقول مش معترف باي تعريف لاي شعور انساني ، دي مش معادلة كيميا، الحب بيتعرف

من اعراضه (الغيرة الشوق الاهتمام الاطمئنان الامان ..الخ).
حتى لو كانت اعراض كاذبة بس مفيش في ايدنا نقول ان الحب هو كذا كذا كذا
لا ؛ بنقول ان الانسان ده واقع في الحب لما (بيحس) بكذا وكذا وكذا .
طيب حالة الحب الكادب دي تيجي منين ؟؟
اقولك يا سيدي غالبا بتكون حاجة من اتنين ،يا امتن

فراغ عاطفي (جد مش هزار) يا امتن (محاولة تطييب جرح عاطفي) .
الفراغ انك تكون حياتك فاضية خالية من شريك وده يدفعك للبحث عنه والتدوير عليه وتنسى ان اهم حاجة في الحب ان هوه الي بيلاقيك انت مش بتلاقيه.
شايف الي حواليك بيحبوا ويتحبوا ويشيتوا ودباديب رايحة وقلوب جاية ؛

وانت قاعد زي قرد قطع كده اكيد جواك شعور انساني حيتحرك ويدفعك للبحث
بمجرد ما تبدا اخي او اختي بالبحث اعرف انك ماشي في سكة بطالة ،لف عزيزي المتابع وارجع تاني ، لان حبك حيلاقيك مش حتدور عليه
طب حيلاقني وانا قاعد في بيتنا؟
لا برضو وان كان اه احتمال بس خلينا نقول الحياة واسعة اتعامل

فيها بطبيعتك اظهر نفسك على حقيقتها وحتخبط وتلاقي الي يقدر الكومبو ده(شكلك وشخصيتك)ويحبك وانت كمان تحبه.
انما تخش اي كوميونتي منشن انك تظبط يبقى انت عايز تعيش الحالة وخلاص.
طب الاخطر من ده النوع التاني بقه(مداواة لجروح) وده ظلم فظيع لكل الاطراف واولهم انت يالي بتحاول تنسى حد بحد

يعني ربنا مكرمكش في علاقة فتطلع منها بقه جارح او مجروح وعايز تثبت لكل الدنيا انت والاكس والي حواليكم انك فت التت وقادر وتعملها وتنسى هواك ، وتحب تاني يوم .
طبعا انت كده بتخربها ليه بقه؟؟
لان ده مجرد طريقة مشاغلة وملي فراغ للوقت بس عمره ما يملى فراغ القلب
وبعد شوية لما طبعا تمشي

حتسيب حد وراك مجروح وانت حته من روحك حتروح برضك كتكفير عن الذنب ده (كله سلف ودين).
طب اعرفومنين غالبا اني في نوع وهمي وحب كادب ؟؟
اقولك يا سيدي عادة بتكون البدايات سريييييييييييييييييعة حاجة كده قرب سرعة الضوء ، وبتكون مولعة وبتاخدك من كل حاجة حواليك ، الله طب ما يعم الحج كل ده

ممكن يحصل في حب حقيقي اقولك مش بالشكل ده خاالص .
غير ان لما كانت المشاعر وهمية كان الملل منها سريع. بمعنى بعد ما نشوة البدايات بتنتهي المفروض في الحب الحقيقي بيفضل شريكك هو اهم عناصر حياتك ( بتقدم طلباته واحتياجاته حتى لو على حساب نفسك)
انما لو وهمي بقه ممكن لما نشوة البدايات

تبدا تنتهي وتبرد تلاقي نفسك ممكن تبدي ماتش كورة او قاعدة قهوة مع اصحابك عن حتى مكالمة تليفون مع الشريك.
ممكن تكدب وتدي اعذار وهمية عشان قله اهتمامك بيه، على عكس الحب الراسخ الي اتكون من تعاملات تراكمية (سواء حقيقية او سوشيال ) على مر وقت عمرك ما بتمل وتزهق من حبيبك بالمنظر ده

اه ممكن تطلب معاك تغيير كتنشيط لجو العلاقة انما انك تنفض وتروح تلعب كورة. وتسيب حبيبتك ده انا بسميه حب المهرطقين .
.....
كفاية كده النهاردة ونكمل قريبا بعون الله .
دعواتكم ثم تفاعلكم،
وتذكر عزيزي المتابع ،
زيارتك تسرنا وتفاعلك يفيدنا.
دمتم بخير.

@DoaaIyi بصي ده

@Sbibo7 ده ثريد ، مش تغريدة بس

@amira_amira1234 هنا يا حاجة اميرة
ده ثريد مش تغريدة

@mookaa4444 تعالي اقري وروقي دمك .
بس نزلي سلاحك الاول

@HebaSalm4 دي قصة كبيرة ، بيتداخل فيها الممنوع والمرغوب والعقول والقلوب.
حنحلها يا رفيق لا تقلقي

@nEChW7EL9S6FS1u ده الثريد ، الي قصدته
وحنزل لحضرتك بقيت الفصول في نفس المكان هناك

عودنا بحول الله ،
كنا وصلنا للتفريق بين الحب الوهمي ونظيره الحقيقي،
وقولنا واغلب الناس وافقتني على ان الي بيظهر فعلا حقيقة المشاعر ، هي الفترة الي بيسموها دلوقتي(ما بعد البدايات) ،
حلو جدا ؛
طب ما اكيد دلوقتي السؤال الي حيفرض ذات نفسه ؛ وهي البدايات جت ازاي اصلا ، وجت منين ؟؟

وانا من مكاني هذا اعلن انه سؤال منطقي ويتفق مع سياق الاحداث،وبالتالي حتما ولابد اننا نجاوب عليه،بس هنا محتاجين ولاول مرة تقريبا في الثريد ده نعمل عملية فصل للقوات ، اسف اقصد فصل لساحات التعارف الي ممكن من خلالها يحصل تواصل ينتهي بعلاقة سواء سويّة او مؤذية توجع القلب وتنشف الريق

وبما اننا دلوقتي بنتكلم من احد منصات التواصل الاجتماعي وبما ان اغلب الشكاوي بتيجي من علاقات التواصل الاجتماعي فعلى بركة الله حنبدا ب(الحب الجديد بين البوسط والتغريد)
كبداية وقبل ما نسترسل في الموضوع كان يفترض اني اعمل مقدمة اشرح فيها فكرة السوشيال ميديا كمنصات للتواصل والتعارف

والتبادل الفكري والتنسيق الثوري والتنمية المعرفة ......الخ،
احب اقولكم اسفا .....بلح،
معدش الكلام ده خلاص ، ولو موجود فهو بنسبة ضئيلة جدا ،
وحتى لو موجود بنسبة كبيرة فاعتقد ان اسم المنصات ذات نفسها كفيل بتعرفيها وتوضيح دورها فبالتالي مش حيحتاج نضيع فيه وقت.

ندخل في الي بعديها الا وهي العلاقات الي بتنشأ وتكون وتكبر يني يني جوه المنصات دي ،
اول ذي بدء احب اكد على معلومتين ،
الاولى فكرة هل من الممكن ان تنشا علاقات روحية بحتة بين اجساد متباعدة؟
والاجابة اه طبعا وحصل تاريخيا قبل ما يخترعوا اصلا اول حاسوب الي ،
والتاريخ القريب والبعيد

يزخر بامثلة كتييييير حنكتفي منها بمثال (مي وجبران) لانه الاشهر ومش حلاقي حد يوجع قلبي ويفضل يفاصل معايا لا ده كان حب لا ده كان سهوكة ادبية وانا راجل صاحب عيا ومش حمل فرهدة.
مي وجبران لو بصينلها من زاوية اتنين متقابلوش وحبوا بعض لدرجة اجنون حنقدر نفهم نوعا ما ازاي ممكن يحصل تبادل

لمشاعر على النت دلوقتي
النقطة التانية(راجع التغريدة ما قبل الماضية وركز) ، وهي هل اصلا المواقع دي تنفع حقل لزراعة مشاعر وبناء علاقات؟
جميل يا سيدي سؤال لطيف،
الحقيقة ان اغلب الاراء الي بتصادفني كلها رايحة لاتجاة ان لا مينفعش وازاي يحصل كده ولا يمكن ابدا ، ودي الاجابة الي بيعتقد

اغلب الي بيرددوها انها اجابة عميقة ونموذجية.
بس معلش ثواني كده حضرتك ، اه انت ، ممكن تسيب ركن الفضيلة المطلقة خمس دقايق بس وتيجي جنبي تبص للموضوع من زاوية تانية،
زاوية ايه يا عم الحاج؟؟ دي مش محتاجة كلام.
لا بس وحد الله كده في قلبك وتعالى متخلنيش اشردلك(كلام في سركم متقولوش )

لحد عليه اغلب الي بيقولوا لا مينفعش وكده بيبقوا داخلين يشقطوا ، هس هس خلاص كتموا دلوقتي اخر الثريد حنفضحهم من الجنسين)
جيت يا عم ، تمام بص بقه يا سيدي ،
المفروض في رايي ومن زاويتي واسمع الكلام للاخر ومتتعجلش في اعتراض ،ان (منصات التواصل الاجتماعي واحده من افضل ساحات التعارف)

لاي غرض لو استخدمت صح).
بعد اذنك بقه جردل بوهيا كبير وادلقهولي هنا تحت (استخدمت صح).
طب اكيد عايزين توضيح ، مش عيب ، نوضح.
الاصل في العلاقات زي ما قولنا في اول الثريد انك تتعامل بطبيعتك وتلاقي الي يحبك ويحب الكومبو بتاعك(شكل وروح) ،
بس لو ركزنا سيكا مش كتير يعني ، حنلاقي فعليا ان

الروح غالبا هي اكثر عامل جذب في العلاقات الجادة،
اه الشكل مهم مقولتش لا ، بس لو دورت حواليك وطلبت منك تعدلي كام علاقة واحد متييم بواحده غير ذات حظ من الجمال، او العكس، او عدم التناسق الجسدي....الى اخر كل ما يتصل بالمواصفات الشكلية، اكيد حتلاقي كتير ، واكثر ما يثير استغرابك ان

العلاقات دي غالبا بتنجح وتكمل ،
مش حكدب عليكوا الموضوع ده شغلني ، ولقيت ان لو فيه سر حيكون تجاذب الارواح،
طب كويس بعد المقدمة دي انت عايز توصل لايه؟
اقولك يا سيدي الفاضل ،
بما ان اغلبنا هنا بنتعامل مع كلام بعض مش اجساد بعض ، وبما انه يفترض الكلام يكون ناقل جيد للفكر الي هو

بالتاكيد موصل جيد برضك لطبيعة النفس والروح ، فيفترض كنتيجة منطقية لده اننا نخبط هنا او هناك في الروح دي ،
انهي روح ؟
الروح الي نألفها، نعرفها ، تخطفنا ، تأسرنا وافتح قوس يا سيد واكتب الي انت عايزة من مؤشرات على حصول المامول.
تقصد ان السوشيال ممكن تعمل فلتر يشيل الشوائب الي بتعكر

على اي اتنين بدايتهم ،وتوفر جو ملائم للتعارف الي ممكن يوصلهم لتبادل مشاعر ،
اه بس لو سمحت شيل جو ملائم دي عشان مدياني احساس اننا قاعدين في الازهر بارك، جنينة الاسماك حاجة في الرينج ده.
ماشي شيلناها ، طب خلاص بمعنى كلامك ده السوشيال حلوة ويلا حبوا بعض يا ولاد ، هييييييه هيييييييه

لا حاسب يا اسطا ولو معكش فكة تعالا وانا افكلك ،
انا قولت لو استخدمت صح ودالقين بالامارة جردل بوهيا تحتيها.
وخليني افسر صح من ناحية ايه ، هرجنا كتير نتكلم جد بقه.
كطبيعة بشرية بحتة ومطلقة احنا بنحب نظهر احسن ما فينا ،
وده حق مشروع لاي كائن حي ، معذرة للمقارنة حتى المفترسات بتجي

في مواسم التزاوج وبتعمل البحر طحينة لاناث القطيع ،
فأنا مش بنكر ده عالبشر طبعا ،
بس محتاجين نقطة نظام هنا،
الا وهي الخيط الرفيع ما بين اظهار احسن ما فيك واختلاق ما ليس فيك.
انا عندي قناعة ثابتة لا تتزحزح، ان مفيش مخلوق مكلف ومحاسب في الاخرة على افعاله كله شر مطلق او خير مطلق

باختصار لان في الحالة دي حيكون الاختبار الرباني فقد معناه(نقطة فلسفية مش موضعها هنا احنا خدنا بس الي محتاجينه منها) ،
طب بما ان جوانا كويس وفي نفس الوقت جوانا الوحش من حقنا عشان نجذب الناس لينا نخبي الوحش ده ونظهر الحلو ، حقولك رغم تحفظي على ان ده مع مرور الوقت ممكن يعمل اضطرابات

قد تصل في بعض الاحيان للاسكيز واكتر ، بس حمشيها باعتبار انك حتبقى شاطر وتعرف تعمل توازن وتحاول تتصالح مع نفسك وتقتل شرك في مهده.
لغاية كده متفقين مش مختلفين.
نيجي للخلاف الي زي ما انا سبق وقولت(الاختلاق).
عزيزي المتابع اختي المتابعة ؛ الجزء القادم صادم (رغم ان كلكم عارفينه)

وجود الناس خلف الشاشات وعدم ظهور انطباعتها الحقيقية ولا خلفيتها الفعلية سهل جدا ظاهرة الادعاء الي وصلت بينا مع مرور حوالي عشر سنين على انتشار التواصل الاجتماعي في مصر لحالة من النفاق المجتمعي(طبعا النفاق المجتمعي كان موجود قبل كده بس السوشيال عملت حاجتين سلطت الضوء عليه وكبرته)

يعني سهل اكون معرفش سارتر من كانط في الحقيقة بس كل يوم الصبح وانا بغسل وشي اصبح عالمتابعين عندي باقتباس حليوة صغنون كده كل عمق ومفهومي
وممكن واحدة متكونش بتركعها بس قبل ما تنام كل يوم تقوم هابدلنا ثريدين تلاتة عن فضل قيام الليل(ومتنسونيش من دعائكم احبتي في الله)
لازم متنسونيش دي

كفاية كده امثلة اعتقد وضحت المقصود ، الي حختصرة في الكام براجراف الي جايين
الي كان يفترض بيه يكون نقطة قوة السوشيال في التواصل والتعارف تحول بقدرة قادر الى نقطة ضعفة ، الجميع الا من رحم ربي بقوا ممثلين باقل مجهود ،
الكل فلاسفة(اقتباسات جاهزة بيتعملها دلوقتي تطبيقات)

الجميع متدينين(محتار في ميتين اي حاجة اخطف رجلك والشيخ جوجل يجيبلك الفتوى فمينت وبالادلة كمان) وما عليك الا مجهود التظليل وضغطة كوبي والتانية باست ، واهلا بك شيخا للاسلام.
وطبعا الجميع خفيفي الظل مهضومي الروح(اتزنقت في اي مينشن مش عارف تقول ايه ارزع كوميك ) والناس مش حتسكت حترد

يا بكوميك تاني يا امتن ايموجي الوش الي بيعيط من الضحك (فكروا كده كام مرة في حياتكم وصلتوا انكم فعلا عيطتم من الضحك)
ولو فضلت اعدد لكم الامثلة ححتاج جاك بسيرفرات تويتر تماً واحتمال مخلصش،
احم احم ، شايف اخت ورا شاشتها بتقولي حاسة اننا خرجنا عن الموضوع ،
احب اقولك ابدا ، نهائي

احنا في احشاء الموضوع ذات نفسه.
ازاي؟؟
عشان نستخلص سبب فشل او نجاح لتجارب ما حصلت في مكان ما ، لازم نفهم المكان ده ايه وازاي وفين ومن امتى ،
والا حكون بخدعكم ، وبقول هري ،
وانا وضحت من الاول انا عندي (شرح وطرح) من خلاله صدقا يعني مش حتحتاجوا اجابات لا مني ولا من غيري.

وطبعا بما اننا عرضا لجزئية (بما ان) في المعادلة فلازم تكمل ب(اذاً) ،
ونخليها لبكرة بعد اذن حضراتكم لو مكنش يزعلكم .
ليلتكم جميلة
دمتم بخير.

@rawdatelgannah كنتي طلبتي امشي اروح اكمل كتابة.
زودت ثريد كامل عالثريد

@HebaSalm4 تصدقي فكرة حلوة.
ممكن اكمل الثريدات دي واعملها كتاب بي دي اف

@HebaSalm4 توكلنا على الله.
سيطني بقه يا رفيق

@HebaSalm4 لا مش صديقك.
انت رفيقي.
اول من آمنت بكتلة الشر خلف النضارة

@HebaSalm4 متحرمش منك

@hebamohammed191 تكلمة الثريد كنتي سألتي اذا مكنتش رجعت من الطراويح لسه

@rehamn2013 ده الثريد يا ريهام.
اقريه اعتقد حيعجبك ، من اكتر الحاجات الي كتبتها عملت تفاعل

(اذن انتبه قف لا تنغمس فالشاشة الي منورة وبتلالي قصاد عينك دي حالا، فيها سموم قاتلة)
..
بعد سا الخير يا ولاد وكيفكم وبعد اعتذار واجب عليا لتاخيري في تكملة الثريد لاسباب يطول شرحها نركنها على جنب دلوقتي وندخل في الموضوع،
ونقول ان العبارة المقوسة الي استهليت بيها التغريدة دي
يتبع

كانت الجزء التاني في المعادلة الي احنا بدانا في شرحها وسيبناها من يجي ست شهور،
لو بتقرا الكلام ده اول مرة فاستسمحك تجيب الثريد من اوله عشان تقدر تعرف احنا بنتكلم في ايه ولو منتظر ومتابع فاكيد حتعرف اننا كنا وقفنا عند نقطة انعطفنا اليها بحكم واقعنا وبحكم البيئة الي حضراتكم بتقروا

فيها الكلام ده،
(منصات التواصل الاجتماعي)والعلاقات الشخصية ام تعطيف وتلطيف،يعني الحب سواء كان حقيقي او موهوم واستطردت انا في بداية الثريد في التفريق بينهم فرجاء مش حرجع للنقطة دي تاني ولا اي نقاط سبق المرور عليها الا بقدر الحاجة الى ذلك،
والحقيقة ان ذلك بيقولي حترجع غصب واقتدار

وانت بتوضح العبارة المسممة الي بدات بها تكملة الثريد،
ازاي؟
ده الي حيبان حالا واحنا بنحط الجملة دي تحت المجهر الي عدساته حتكشف لينا طبيعة البيئة الي نما وترعرع فيها كل هذا التوكسيك،
طب عشان نكون موضوعين لازم اوضح ان كل الكلام سواء الي فات او الي جي لا ينسحب على كل الناس،

يعني انا لا اعمم ولا افترض ان الجميع اصابة السم الزعاف،
واستكمالا للموضوعية ححاول اقسم في الشرح الناس لشرايح،من حيث العمر والحالة الاجتماعية والخلفيات سواء كانت مجتمعية او مذهبية اعتقادية او معرفية، طبعا التقسيم مش حيكون منضبط غاية الضبط لان احتمال التداخل كبير بين كل شريحة

والتانية بالاضافة طبعا للفروق الفردية وده عموما واحد من مثالب الانسانيات الي بتعني بدراسة المجتمعات والبشر سواء على المستوى الفردي او الجمعي،
طب نسيبنا من الجانب التنظيري وهوبا يلا نخش في التطبيقي نشوف ايه الي مخبياة الشاشة الي بتنور وتلالي وحضرتك حالا بما انك يعني بتبص فيها

واقع لا محالة تحت تاثيرها...،
اكيد حد دلوقتي حيطلب مني اسكت ويقولي لا حاسب انا مش بتاثر انا جامد التنين والسنين... الى اخر هذا من الاعتراضات،
اقوله لا معلش صلي على شفيعك واهدا وتعالا بقا اقولك بما انك فتحت موبايلك وعملت لوج ان وتصفحت بصوابعك المنصة! دي او غيرها فانت شئت ام ابيت

اصبحت فرد من المجتمع ده والبيئة الافتراضية الي بتجمعك بمليارات المستخدمين من كل اركان العالم،
ايه؟؟
ازاي؟؟
طبعا صديقي، ابسط تعريف ممكن والي يعرفة كل من له اي صله بالعلوم الاجتماعية بتقول ان البيئة
(كل ما يحيط بالكائن الحي، يؤثر فيها وتؤثر فيه)
يعني بعون الله كده لو اسقطنا التعريف

ده على حضرتك وموبايلك وحسابك حتلاقي انك ممكن تغرد من بغداد وتؤثر في احد قاطني اسلام اباد، او تكتب من غانا وتاثيرك يوصل وادي فرغانة،
يعني ايه الكلام ده؟
يعني معيار المسافة اتشال من المعايير الي كانت بتحدد بيئة الانسان،وبالتالي البعد الجغرافي الي كان بيكسبة كتييير من قيم اجتماعية

بتتميز بيها بعض الاماكن عن غيرها،
طب سيكة توضيح واسقاط اكتر عشان ميبقاش الكلام ناشف؟
ماشي نطري الكلام ونقول حضرتك مثلا من بيئة ليها عادات وتقاليد تتميز بالتحفظ،
بضغطة زر اصبحت عضو في مجمتع اوسع وناشط في بيئة ملهاش كبير، اه وربنا ملهاش كبير حرفيا ولا سمات ولا خصائص مميزة،

بل يختلط فيها الحابل بالنابل وسويقة بيتعرض عليك فيها كم مهول من المواد مش بس تغير طباع شخص لا دي تشيل جبل من مطرحه،
حد يقولي لا استوب بقا انت زودتها، ازاي تقول كده ده احنا ولاد ناس ومتربيين احسن تربية، ونشأنا على دين قويم وايمان سليم ولا يونكن نتغير،
ده احنا جايين عشان نغير و...

(هعهعهعهعهع) ضحكة ساخرة شريرة مريرة،وانا الي ضحكتها،
ومعلش متزعلش مني انا مش مفترض انك فعلا مكنتش ناوي كده بس اقف مع نفسك وبص لحالك،
واسئلها هل انت نفسك من جاء هنا اول يوم؟
كام خط كنت بتعتبره احمر يستحيل عليك تخطيه في حياتك، مديت رجلك وعديته؟
كام تصرف لو كان اتقالك ان فلان او

علان عمله كنت حتسب فيه ليلا ونهارا،لو تاملت لدقايق حتلاقي روحك بتعمله دلوقتي بمنتهى برود الدم والاعصاب؟
مممم،
مش عايزك ترد هنا، جاوب الاسئلة دي واحتفظ بالاجابات لنفسك، وايا كانت الاجابة عايزك تهدا عشان انا لسه مقولتش حاجة، السلخ لسه قدام،
وكما وعدت انا قبل اي حد حصلب روحي قصادكم

على خشبة الحقيقة،
الحقيقة الي بتقول اننا بشر عندنا غرائز بتفرز رغبات بتخلق جوانا دوافع بتحركنا لاشباعها،
ولاننا مش في غابة ومش كل حد نفسه في حاجة يروح يعملها، حتلاقي قواعد وتشريعات دينية وعرفية واجتماعية بتقيد تحركك اثناء ما انت بتحاول تشبع غرايزك دي،
ليه؟

باختصار وبدون استطراد في جدليات فلسفية عن(الحق والخير والجمال.. الخ)
حنقول التقييد لضمان (السلم الاجتماعي) الي لما بيتحقق بين افراد اي مجتمع بيقدر يلبي حاجات افراده بالتبعية،
يعني دايرة(التزم بالقواعد حاجتك حتجيلك لغاية عندك وفتاكسي كمان)،
حد يقولي طب حلو،
اقوله لا، مش حلو خالص

لان الكلام المنمق الجميل الي انا لسه قايله ده محطش في حساباته اختلاف الطبائع،
احنا مش مخروطين في صبة واحدة ولا قالب بذات الابعاد،
ومش اقصد الشكل اقصد النفس،
وبالتالي درجة استجابتنا لتعاليم التقييد والتقنين بتختلف من فرد للتاني،
وبالتالي وارد جدا يجي الي يفكر يكسر القيود دي ويلبي

رغباته مع نفسه على حساب شركائه في نفس المجتمع، قوم بقا المجتمع على عليهم وعملهم مبدا ثواب وعقاب عشان الي يكسر القاعدة ياخد على دماغه ويبقى عبرة لغيرة ومحدش يعملها تاني وبالتالي المجتمع يحافظ لنفسه على اسباب بقائه،
طب الكلام ده برغم جماله ينقصه حاجة مهمة جدا الا وهو التخصيص

على موضوع الثريد اصلا،
وماله نعمل ده ونقول اننا في العموم بنتولد رجالة وستات عندنا ميل طبيعي للجنس الاخر،
يعني رغبة في التقرب وتكوين علاقات تضمن اشباع الرغبة وتلبية الحاجة،
تيجي انت تعمل ده تصطدم بقواعد مجتمعك، وبما ان اغلب الي بيقرا الكلام ده من مجتمعات عربية اسلامية خلونا نزود

التخصيص ونقول احكام دينك الي بتسمح بالتقرب ده بقواعد محددة وفي اطر معينة وبتتوعد المخالف ليها بالعقاب،
وبحسب المخالفة بتكون درجة العقاب سواء الدنيوي او الاخروي،
يضاف ليها بقا الي بعض المجتمعات جودت من عندها وضافته،
يعني بنظره سريعة كده حضرتك تلاقي كم من القيود تمنعك من مجرد

التصريح بده مش انك كمان تعمله(اقصد انشاء علاقات لا تحظى برضى المجتمع)،
ممممم،
طب احنا حنسكت؟
اوف كورس لا،
ما انت الرغبة جواك شغالة الله ينور عمالة تزق فيك تروح تكلم دي او تشاغل تلك،
بس خايف ان مكنش من رد فعلها فمن مجتمعك،
طب الحل؟
قبل ما اقول الحل انا مضطر اخدكم في رحلة عكس عقارب

الساعة ارجع بيها لورا شوية،
عصر ما قبل الانترنت،
كان يا ما كان يا ولاد زمان كوكب وكان فيه بشر عايشين ومعندهومش موبايلات ولا كومبيوترات وبرضك كان عندهم نفس ذات الرغبات،
وفي ظل قلة الساحات الي يفترض انك تعرف منها واحدة ينفع انك تصاحبها ولا تحبها والي كانت غالبا بتيجي بالتسلسل ده

يا بنت خالتك يا خالك وانت لسه في ابتدائي، وبعدها بنت الجيران وانت في اعدادي ثم زميلتك في مركز الدروس وانت في ثانوي وبعدها زميلاتك في الجامعة بقا،
طبعا مش الكل مشي بنفس خط السير ده بس حنقول انه كان نمط منتشر ناس كتير عدت بيه،
الغريبة ان في الوقت ده مش كل علاقة معرفة كانت بتتحول

لعلاقة خاصة،
يعني مفهوم علاقة الزمالة والصداقة كان موجود حتى لو المجتمع كان بينظر ليه بامتعاض،
طبعا لو ركزت معايا حتلاقي الفضاء الي بيتيح ليك فرصة عشان تظبط وتعلق الجو(مكنش على ايامنا اسمه شقط كان تعليق)
مهما بلغ اتساعة يظل محدد بوجودك المادي فعلا مع الي انت عايزها في نفس المكان

يعني لازم تقوم من نومك تاخد شاورك المحترم وتحلق دقنك وتلبس الي على الحبل وتتخانق مع امك عالشراب الي عامل حسابك تلبسه مع الطقم واتحط بالغلط في غسيل ابوك الي نزل الشغل،
فتقضيها اي حاجة وتضرب بودي اسبراي(كان اكس ولو اهلك في الخليج غالبا حيكون عندك ازازة ريحة امك بتمم عليها كل اسبوع

عشان تضمن انك مبتحطش منها الا في المناسبات لو كانوا نزلوا نهائي يعني)
وتنزل تتمخطر وتروح كليتك وتدور على طريقة تفتح بيها كلام او تواصل مسيرتك في علاقتك لو فعلا كنت مظبط والي كان كبيرك وقتها لو انت متوسط الاداء مسكة ايد،
طبعا ده لا يقارن بوقتنا الحالي الي فيه ناس مبتحتجش تخرج

من باب اوضتها الا عشان تروح الحمام، تغتسل بنية رفع الجنابة بعد علاقة حميمة افتراضية من اولها لاخرها،
...
الكلام صدمك؟
مستغربه ومش عارف وصلنا لهنا ازاي؟
...
اوعدك اقدملك تحليلي لامتى وازاي ده حصل،
في تكملة الثريد قريبا،
قراءة ممتعة،
ليلة سعيدة،
دمتم بخير

(وهكذا تحولت قوائم الصداقات الى قوائم تساق للموت جماعات، فاما اعواد المشانق او افران المحارق، قرابينا لذاك الاله الزائف؛ بباطله الاغدق؛القبيح ذي الوجه الازرق)
...
(هولوكست/في البدء)
..
وبعد سا الخير يا ولاد،
وقبل ما دماغكو توديكم وتجيبكم، احب اقطع عليكم حبل التساؤلات، وقولكم

ان المقطع الي بين اقواس والي استهليت بيه الثريد دلوقتي هو احد فقرات فصل هولوكست من سفر(القبيح ذو الوجه الازرق) من رواية في البدء،
(الاديب اصر يحط التاتش بتاعه ومحبتش اكسفه)
والصراحة اني ما كنت لاقبل الا لانها بالفعل بتخدم وبشكل مباشر موضوع الثريد،
العلاقات السامة وخصوصا الافتراضي

منها،
بل انها تتقاطع مع واحد من المحاور المهمة جدا في كلامي والي كنت انهيت بيه الثريد الي فات،
الي لو حضرتك خطفت عينك عليه حتلاقينا قبل ختمه بسيكة عملنا عرض مبسط وسريع للشكل التقليدي للعلاقات في كوكب ما قبل الافتراض،
وقولنا وقتها ان نشوء علاقة بيفرض بشكل حاسم وجود كلا الطرفين

بشكل مادي في نفس المكان(جيرة، زمالة عمل دراسة... الخ)
ومرة واحدة نطيت بيكم لاحد اشكال تطور العلاقات الافتراضية وهو(العلاقة الحميمة) والي مبقتش بتحتاج وجود جسدي قد ما بتحتاج نت سريع وعدة راماتها عالية(اقصد موبايل او تاب😜)،
وهو ده بالظبط الي كان صديقي الاديب بيتكلم فيه في الفقرة

الي انا اقتبستها منه،
حد يقولي طب انت جيبتنا من الشرق للغرب مرة واحدة ومدتناش اي امارة حصل ايه فيما بين هذا(الحقيقي) وذاك(الافتراضي بكل تطوراته)
احب اقول الكلام ده منطقي وانا موفق عليه ولاجل كده ندخل في كيف بدات المحارق عملها،
وامتى بدات قوائم الموت تخط اسمائها،،

بس الاول احب انوه اني لا نبي ولا ظلي اخضر، ولا انا شاندلر الي جي يسجل قوايم الي حنقذهم من المصير المحتوم،
بل على العكس تماما،
انا اترقيت عقبال عندكم وفي احد الفترات تحولت من اسم في قائمة لواحد من كهنة هذا القبيح،وسدنه المحارق ذات نفسيها،
وشوفت ولامست افواج الهاربين من جحيم الواقع

الى جنان النار،
حد يسالني وايه الي سحلهم السحلة دي؟
اقوله(الحل)،،،
مستغرب؟
راجع كلامنا عن
الانسان(غرائز ورغبات ودوافع.. الخ) وما يتطلبه ذاك من اصتدام حتمي مع
المجتمع(بقوانينه وقواعده واعرافه... الخ)
اهاااا تقصد يا خالد ان ده كان المفر للناس الي مش قادرة تحقق في الواقع رغبتها فجت

هنا تعمل ده؟
اقوله لا، لان الاجابة دي بالشكل ده حتبقى مختزلة بشكل يخل بالموضوعية، وحيدي انطباع خاطئ وحكم معمم وزائف عن كل المستخدمين،
وانا سبق ونوهت غير مرة انا ضد التعميم،
فلازم نوضح التفاصيل اكتر من كده عشان نعمل تصور صحيح يدينا نتايج سليمة،
وطبعا كلنا عارفين ان احنا مش كنا

نايمين من غير نت مثلا صحينا الصبح لقينا لينا كلنا حسابات ولابدين هنا،
لا هو الحقيقة الموضوع جه تدريجي وعدى بمراحل كتير سواء تطور من حيث الخدمة وانتشارها او تطور الاجهزة المستخدمة وتاثير ده على تحقيق انتشار اكبر بين البشر كلهم،
يعني حضرتك تخيل معايا كده بيت من عشرين سنة بالظبط،

البيت كله فيه خط تليفون ارضي وجهاز كومبيوتر منزلي وغالبا موبايل او اتنين نوكيا كبيرهم يقولوا الو،انا هنا بتكلم عن حال اغلب الاسر من الشريحة الوسطى للطبقة الوسطى،
والي بتمثل ما يفترض الاغلبية العظمى للمستخدمين في الوقت الحالي،
تخيلت بقا حال البيت ده قصاد بيت حالي، فيه لابتوبين

مثلا وهواتف ذكية كل واحد فيهم بقوة كذا جهاز حاسب منزلي من بتوع التسعينات، بعدد افراد الاسرة مهما كان سن حاملها،
طب المقارنة دي هدفها ايه؟
ببساطة! بيقولك ان تحقيق اي هدف مرتبط بالايزي اكسيس ليه(كل ما الوصول كان اسهل كل ما نسب النجاح كانت اعلى)
وعشان نمط معين يتحط تحت مجهر البحث

لازم يكون منتشر بالشكل الي يساعدنا اصلا على دراسته وكمان يكون مؤثر،
يعني في شعب ١٠٠ مليون لقينا ١٠٠٠٠ بيشموا جاز،
غير ما نلاقي ٢٠ مليون،
وبالتالي وبناء عالمثال السابق انا حتخطى مراحل بسرد سريع اما لانها مكنتش منتشرة بشكل مؤثر يعني تاثيرها طفيف،او لانها انقرضت بالفعل، وان كانت

اشبه بعمل المجسات كده قبل ما تبدا تحفر الارض وترمي اللبشة وتشد اساسات،
يعني مع بدا دخول النت وبداية! انتشارة المنزلي بدا بعض افراد الاسرة الي غالبا بيكونوا طلاب ثانوي وانت طالع في عمل الايميل ومعاها وعلى استحياء عرف الناس (غرف الدردشة) خدت وقتها وظهر وراها بوقت بسيط المنتديات

الي كانت بتجمع مجموعة من البشر يفترض انه بيجمعهم اهتمامت مشتركة،
يمكن اشهرها منتدى فتكات (وابو نواف للتعارف الجاد😁)
الاسم او الوظيفة كانت بجد مش تهريج ويمين بالله عمري ما حطيت رجلي في اي منتدى بس بضحك لان كلنا بقينا رغم عن انوفنا اعضاء في الوريث الشرعي ليها،
والي اسم الله عليها

طورت ثروة المقبور واتوسعت اخر حاجة،
طب الوريث الجميل ده (منصات التواصل) برضك مدخلش دخول مفاجئ، لا دخل عالهادي يا زبادي،
ومن ٢٠٠٥ لغاية ٢٠١١ كان عدد المستخدمين عموما برغم تزايد اعداهم يوم ورا التاني حاجة بسيطة،
لغاية ثورات الربيع وحدث الانفجار العظيم،
وكان كون جديد بقواعد جديدة

اعيد خلقه،
كون افتراضي بكامله والي ساهم في ده بشكل مباشر تطوير تقانة الهواتف المحمولة وتطبيقاتها الي بتسهل الوصول بضغطة ليها،
ومع التطوير وانتشار التقانة حصل انخفاض نسبي في الاسعار سمح لشرايح اوسع تقتنيه وبالتالي اصبحوا مواطنين افتراضيين في هذا الفضاء اللامتناهي،

يعني بقوا اعضاء في ذات البيئة الي انا اتكلمت عنها(بيتاثروا بيها وبيأثروا فيها)،
حد دلوقتي ممكن يسالني سؤال مهم للغاية،
وهو الناس اصلا تقاطرت على التواصل الافتراضي بالاساس ليه؟
يعني كون الخدمة منتشرة وتقنياتها سهلة مش مبرر لان كان ممكن متلاقيش سوق مثلا او عزوف جماعي،

احب اقول للي سال السؤال ده انت صحبي وحبيبي وكفاءة واليك الاجابة بس متقولش للي مسالش،
غريزة البقاء هي اقدم واهم غريزة عند البني ادم، اتخلقت معاه،ويصادف انها ارتبطت عنده بوجوده او انضمامه لجماعة اكبر منه تحقق ليه شعور بالامن،
وعشان يبقى عضو في جماعة لازم! يبقى عنده مهارات تواصل،

تعرفه بالي حواليه لغاية اما يقبلوه ويبقى جزء منهم،
وده بالظبط الي سهل للمنصات دي الانتشار وحيازة القبول،
بضغطة زر حتوصل لناس كتييييييييييير تتعرف عليهم وتبقى جزء منهم،
وايه كمان، باقل مجهود وانت قاعد في مكانك يعني متحركتش من مطرحك،
شوف مهما بلغ عدد معارف في الحقيقة واصدقاء الواقع

كام وشوف انت بحته الحديدة الي في ايدك دي حتبقى صديق لكام،
وصلت؟
طب افترضنا لقينا حد بيقول لا انا انطوائي وغير اجتماعي اصلا ومش عايز اعرف حد،
يا سيدي عيني ده عز الطلب صورة مضروبة وحساب وبث كل السوداوية والاكتئاب الي عندك في مساحات شاسعة من الاراضي الخصبة الي حتنموا فيها واهو محدش

عارفك ولا حيحاسبك!!
ايه؟
يحاسبك؟
ايون هي الكلمة دي كلمة السر ومفتاح القفل،
الحساب الي بيجي كاثر لاي فعل تخالف فيه قواعد مجتمعك الحقيقي،
بح، فينيتو،
هنا تفعل ما يحلوا لك ومفيش حد حيقولك خد تعالا انت نوتي ويوقع بك عقاب يؤثر عليك بشكل مادي فعلي،
مممم
تقصد يعني الناس جاية هنا تغلط؟

حقولك لا،
بس ركز معايا في الي جاي عشان مهم،
وبص معايا لاي مستخدم جديد دخل هنا كبني ادم طبيعي، جي ومعاه خلفياته كلها وقيوده وكله كله، وفنفس ذات الوقت جواه غرايزة و رغباته،والي طبيعي يعني اي حد بيحملها وبيحمل مع الاتنين الي فاتوا صراع ازلي جواه، بل ده اتخلق اصلا عشانه،

ما بين(المرغوب، النفس والهوا)ضد(المسموح، احكام دين ومجتمع)
وعايزك تتخيل معايا شكل وطبيعة الصراع في الحقيقة وغالبا حيحسم لانهي جانب،
وتقارنة بنفس الصراع بس في ساحة معركة مختلفة،بتضمن لك النجاة من العقاب لو خالفت المسموح؛
تخيلت؟
ايوه اطلع اطلع باعترضك،شايفك وسامعك
(العامل الاخلاقي)

او(الوازع الديني)
حقولك امنت بالله مش معترض، بس متنساش انت كمان طبيعة البيئة،
ااهااااااا، فاكرها الي تحرك جبل من مكانه دي وانا قولتلك عليها؟
اه السويقة دي الي رويدا رويدا اقتبست انماط من التواصل وطرقه بل وحسنته في عينك وحولته لهدف وخلقت ليه جواك دوافع كمان،
لما بتتحقق بتحس بالرضا

الرضا الي لو كان بدا افتراضي فبقى مهرب لازاحة كل مشاكل واقعك،
الواقع الي اصلا انت هربت منه،
مشاكل عمل،
خلافات زوجية،
ازمات سياسية،
واقع اغلب ان لم يكن كل ما فيه بضغطك ويعصرك وبيوصل في احيان كتير لهرسك،
فانت رمتله الجسم بالاسم الحقيقي
وجيت هنا بروحك الهاربة،تدور عالي ينقذ الاتنين

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة