أنا آسف لو اللي هقوله دا تريجرنج بس الخطاب بتاع «كل البنات حلوين ومافيش بنت مش جميلة» مع احترامي للجميع يعني هو أساسًا خطاب ذكوري.. فكر ليه محدش بيقول «كل البنات أذكيا» مثلًا أو «كل البنات طيبين». الإلحاح دا على الجمال مستبطن فكرة إن غيابه dismissal للبنت، وإن جمالها مصدر قيمتها.
موضوع الجمال دا بالذات حساس ومثير للانزعاج لإنه الناس بتقول «كل البنات جميلة» آه بس بتبقى بتفكر في حاجات تانية، زي إن كل البنات جديرات بالحب وبالحرية وإن كلهن متساويات.. لكن طبعًا فيه تناقض واضح في الحاجة لتمرير الأفكار دي من خلال الجمال باعتباره راس المال الأنثوي التقليدي.
فلو تريجرنج بالنسبالك إنك تسمع حد بيقول إن بنت ما «مش حلوة»، فدا غالبًا لإنك متوقع إن البنت لو مش جميلة فدا بيفترض إنها ماتستحقش تقول رأيها ومش المفروض حد يحبها وبشكل عام ماتستاهلش حياة كويسة، ولو دا مش ذكوري فانا حقيقي مش عارف إيه ذكوري.
دا مالوش علاقة بالستاندردز، التشديد على جمال كل البنات مش «ثورة على المعايير التقليدية للجمال»، لإن معظم الناس برضه أذكيا بطرق مختلفة ومحدش بيلح كدا.. الخناقة حوالين الجمال جزء من عملية إعادة إنتاجه كراس مال اجتماعي في ثقافة مهووسة باستهلاكه في الصناعة وفي الـhook-up culture.
ودا بيفكرني إني عمري ما شفت بنت عندها مشاكل بادي إيمدچ بقت أحسن عشان عمالين تقولولها إنها جميلة طول الوقت، دا عادة بيحملها هي المسؤولية لإنها مش بادي بوزيتيڤ كفاية ولإنها مستسلمة للإنسكيوريتيز، زائد إنه بيأكد مخاوفها إنها لازم تكون جميلة، وفق أي معايير، عشان تعيش معانا.
أحيانًا بنات بتحاول تتصالح مع كونها مش حاسة إنها جميلة فالناس ترد عليها بإنها جميلة بالعافية، والمفروض إن دا بقى inclusive وقبول غير مشروط، رغم إنه مشروط جدًا لإنك بدل ما تقول لشخص إنك بتحبه بغض النظر عن موهبة ما بتقولله إنها عنده حتى لو هو مش شايفها، دا يكاد يكون gaslighting.
طبعًا اللي بقوله دا لا يعني بأي شكل من الأشكال دفاع عن التنمر أو قلة الذوق أو عن المعايير غير المنطقية للجمال ولا إن الناس تبطل تهتم بنفسها وتحاول تبقى جميلة، وإنما بس هجوم على مركزية فكرة الجمال كلها أصلًا في حياة الإناث تحديدًا، وفي الختام:
جاري تحميل الاقتراحات...