رتبها

موضوع جديد..
من زمان ما اتكلمت عن عملية خلق الأفكار وقرأت قبل فترة موضوع لـ شانت -مدير إبداعي- عن جلسة العصف الذهني او الـ brainstorming session فقلت أنقل لكم الموضوع مع شوية بهار من عندي..
يقول شانت ان جلسة العصف الذهني فاشلة ومضيعة وقت.. لييييييييش؟??

اهم مافي هذه الجلسة الأشخاص الحاضرين، اذا كنت تختارهم بشكل عشوائي فأنت بتضيع وقتك.
أنا شخصياً على مبدأ "كل الناس عندهم افكار" بينما شانت يقول "كل الناس عندهم افكار بس مو وقت ماتحتاجها منهم" وبالتالي لازم تختار الناس الصح..
كييييييف؟؟!??

لازم تعرف وتفهم انواع الشخصيات اللي تقريبا ما تخلو جلسة عصف ذهني منهم..
هي ١٠ شخصيات ??
١- شجرة الزينة او المكسوف:
ما يشارك! عنده كسوف إبداعي، يستحي يقول فكرته لأن ممكن يجي احد يضحك عليها، او مايعطيه وجه، ماعنده ثقة في نفسه..

٢- المكينة:
يقعد يرمي افكار.. ويرمي افكار.. ويرمي افكار.. مو شرط تكون جيدة.. بس كدا أي شي يجي في باله راح يقوله.. يقاطع نقاشات الناس وافكارهم وغالباً هو السبب في انه مخلي وردة الزينة ساكت ومكسوف يشارك..

٣- الخبرة:
عارف وفاهم كل شي.. أي فكرة بالنسبة له غلط.. مهما كانت عظيمة بيقولك لأ مايصلح.. لأ ماتناسب.. اهم شي لأ.. لأنه أخبَر منك..

٤- اللي هنا ومو هنا:
مشغول.. عنده سبعين اجتماع ثانيين، وعنده خمسين مهمة معلقة ويبغى يخلص.. مو مركّز.. وعصفكم الذهني هذا خليه لكم..

٥- المسلّكاتي:
موافق.. داااايماً موافق.. كل الأفكار صح وتحمس.. ماعنده افكار بس يثبت مشاركته بالموافقة والتسليك..مع الخيل ياشقرا..
تقول له فكرة الحملة مبنية على بصلة تفوح في المولات، يقولك عظيم خصوصا انها مناسبة للفئة المستهدفة من الاطفال..

٦- المحترف:
غالبا هذا تخصصه ووظيفته وفاهم السوق ولعبته الأفكار. يحضر وهو عنده افكار جاهزة لكن سكتم بكتم مايقولها! يبغى يحصد المجد لوحده. يعتبر الإبداع منطقته.
اذا جاته فكره اثناء الجلسة يسجلها ذهنيا بدون ما احد ينتبه ويروح ثاني يوم يقدم فكرته لوحده فينال تصفيق رئيسه لوحده!

٧- المنظر:
مو فارق معاه شي، غالباً جا مغصوب او بناء على طلب رئيسك. تكملة عدد..

٨- ابو جوال:
طول الوقت مشغول في جواله.
٩- السلتوح:
اللي جا عشان عرف إنكم حتطلبوا اكل.. او يمكن شافكم جايبين قهوة او شيبس.. ومعاهم حق.. مين مايحب سناكات المكتب..

١٠- الكبير قوي:
اللي هو غالبا الCEO.. أو مدير كبير.. أو راعي الحلال..
وجوده يخلي الكل مايفكر.. الكل خايف يقول فكرته..

من منيو الشخصيات اللي فوق ما تحتاج غير نوعين.. شجرة الزينة والمحترف..
بتنجح خلاص عملية العصف الذهني؟ لأ لسة..
اخترت الناس الصح، يللا جا الوقت نختار الطريقة الصح..ماينفع تستخدم نفس الطرق النقلية وتحاول تحلب منهم افكار..

هيء لهم مكان مريح.. مثلا روحوا لحديقة المكتب، البلكونة، محل القهوة اللي في اخر الشارع.
واذا كنت ملزم بالغرفة المملة اللي تستخدموها كل يوم، حاول تغير جوها، اطلب بسبوسة وقهوة، بيتزا، كلاون، رقاصة...اَي شي يحفّز خلاياهم الإبداعية ويخليهم يتشاركوا الحوار وبالتالي تنتج افكار!

الآن انت.. طالما انك انت اللي بتدير هذه الجلسة فمن المفترض انك تكون فيك صفات الـ: قائد، مبدع، مشرف، راعي الغنم..
لازم تقدر تعدل مسار الجلسة، تقدر تشارك وتحفّز وتطوّر..
احرص ان الجلسة تكون ممتعة مو بس مثمرة..

وأخيراً.. كل شخصية من العشرة ممكن تكون ذكرتكم بأحد.. منشنوهم..

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد