رتبها

السلام عليكم ورحمه الله وبركاته
حابة أقول قصتي مع ان مافيه احد قاعد يتابعني 🙆🏽‍♀️
نبدا الـ #ثريد على بركة الله

اسمي ملك -حق الشهره-😂
عمري ٢٦ خريفاً
عاطلة ياحبايبي من تقريباً ٥سنوات ، انسانه عملية اجتماعية وفيني رهاب اجتماعي لاتسألون شلون 😂 أحب الناس لكن أخاااف من الاجتماع معهم
أول ماتخرجت قدمت على بكالريوس ثاني وانرفضت 🙇🏽‍♀️

ماتحملت العطالة ابداً قدمت بكذا مكان لكن بسبب جغرافية المكان القابعة فيه (لاتوجد وظايف متاحة حطي رقمك وبنتصل عليك)
فكرت وفكرت وش اسووووي ماني متحمله هالفراغ بعد ضوضاء الدراسه طوال حياتي

قررت اطلب منتجات اونلاين واوصلها لكن ماضبطت معاي قلت والعااااافيه ياعمري جربي شي غيره فقررت أبدا اجيب منتجات مستورده

جبت حلويات وقهاوي ووزعتها على محلات الاسر المنتجة والشغله مشششت معاي زي الفل لحد ماتمكنو اصحاب المحلات من الطريقه وصارو يطلبونها بنفسهم🙆🏽‍♀️

قلت الحمدلله على كل حال ندور شغلة غيرها ، قررت انسق هدايا وأوصلها وفشلت الشغله فشل ذريع لأن الناس تبيك تروحين السوق تصورين لها عشان تقرر وش تاخذ هديه وتقعد ساعه ماترد عليك وتتعذر انه وااااي معليش حمودي ولدي فتح كلامك مادريت

وتطلعين وتروحين لمحل الورد تغلفين وبعدها توصلين الهديه وتكاسرك على عمولة ٥٠ ريال🙆🏽‍♀️ شدعوه حبيبتي غاليه هالكثر ترا كلها هديه وصلتيها ! هذا غير انهم نصبو علي كذا مره

تركت الشغلة وقررت ارجع للاسر المنتجه بحكم اني من فانز قهوة المغرب والحلا استأجرت رف وبديت احط فيه حلويات ومشت لكن جو ناس سوو نفس اصنافي بسعر ارخص وماقدرت اكمل لاني لو حطيت بسعرهم راح اخسر وانا ماعندي مادة💸

وفي يوم بائس وصلتني رسالة عالجوال من صديقة لي تدعو للمساهمة والربح السريع ومبلغ الاستثمار بسيط مقابل الارباح للعلم أني أعرفها من الابتدائي وكانت معاي بجميع مراحل دراستي لحد ماتخرجنا من الجامعه

وبما أن معاي رهاب قلت ياسلام راح تجيني فلوس بدون أحتك بالناس ، ولو أني قريت كذا مره ان التواصل المستمر مع الناس يعالج الرهاب لكن انا تواصلت ونصبو علي😂هذا غير اللي يدخلون يسبون بدون سبب

فكرت قلت اللي اعرفه احسن من اللي ماعرفه! واعرف اهلها وبيتهم وكل عايلتهم مستحيل تغشني ، وقامت الذيبه عطتهم تحويشتها في أمل ان الارباح تجيها وتبدا لها مشروع خاص فيها (ماتابت من المشاريع) 😂

جاء وقت الحصاد ، الو فلانه وينك؟ مشغوووووله كلميني بعد اسبوع
هاااه الووو وينك؟ ولد اختي في غيبوووبه اهه ادعيلنا💔
ياحبيبي وينك؟ ..............
اكلم اهلها محد يرد ، بنات خالتها يقولون بترد عليكم انتظرو بس عطيتهم وقت ومحددد يمي والنهاية اكتشفت انها ،
انحاشت برا المملكه 🙆🏽‍♀️

قلت الحمدلله ، اللهم أعني ولاتُعن علي ودبر لي ف إني لاأحسن التدبير
قررت اتعلم تقديم و تحديث حافز وبديت فيه والحمدلله بديت فيه بنية زينه لكن البشر !!! لابد من حركات النصب اذا اللي قدامك كان غبي لكن ابشركم اشتكيت عليهم ورجعت فلوسي وخلو بقلبي نقطه سودا من هالأوادم

قررت اضيف لي شغلة ثانية مع التحديث لأن بصراحه ماجاني عدد كثير ):
وش اسوي وش اسوي؟ افتح لي سناب وبما أن حولي كذا شخص مشهور اعتقدت ان الموضوع سهل

الو فلانه انا قررت افتح سناب جولات اسواق ومطاعم وابيك تدعميني وانتي عارفه الوضع 🌚
-والله ياحبيييييبي كان على عيني بس والله كذا شخص طلبني وبعدها حلفت مااحط سناب احد
خلاص مو مشكله 🙆🏽‍♀️

الوو فلانه الثانيه انا بفتح سناب هاه شقلتي!
-والله ووووالله ودي اخدمك لكن سوري مو ستايلي انزل سنابات الا للمشاهير
لاعادي ياعمري من قال زعلت صفي من خويتك الثانيه

هاه يالفلانه الثالثه انتي عارفه جدي واجتهادي وسنيني هذي كلها وش رايك بالموضوع
-ابشررررري بسعدك هاتي سنابك وانزله الليله كم ملك عندي؟
-اختفاء في ظروف غامضه

طبعاً كلمت كذا حساب عشان أعلن بفلوس لكن الاغلب رفض لانه حساب شخصي مع اني كنت اذكر لهم اني اسوي جولات وانزل الهبّه وأنزل طريقه تحديث حافز لوجه الله

انقهرت جداً جداً جداً رحت بعت اسواره لي واعلنت ب٥٠٠ ريال (ماعندي ميزانيه اكثر) وجاني ١٠٠ متابع ابشركم🙆🏽‍♀️ وهذانا نتقهوى المغرب وانزل لعيونهم جولات يستاهلون 😂

جلست مع نفسي وقلت يابنت الحلال وش شغفك؟ وين مكانك؟ وأنا احب الفاشن فقررت أصمم لكن وين راس المال؟ مسروق برا المملكه😂 قررت ابيع ذهبي وابدا وهذا الفيديو توثيق لحلمي بالحياة (الباقي بالشنطه لاتخافون) 🥺💛 باذن الله راح يرى النور قريباً