رتبها

الحقيقة الكاملة عن حرب أكتوبر
شوف الـ Thread

- حرب اكتوبر اللي أغلب الشعب عنده فكرة عنها ، الصورة موصلتش ليهم بشكل كامل إلا الحاجات اللي كانت مسموحة إنها تتقال فقط ، لكن في حقايق كتير ناس كتير متعرفش عنها حاجة بسبب تسليط الضوء علي بعض الحقائق لخدمة بعض الشخصيات فقط

- حرب أكتوبر كان الهدف منها إستعادة سيناء و ده تم فعلاً ، يبقي كده الحرب حققت هدفها ، أما الحرب نفسها فبتنقسم لجزئين :
١- جزء عسكري
٢- جزء سياسي
—
و الحقيقة اننا مكسبناش الحرب عسكرياً ، لكننا رجعنا الأرض سياسياً

- تبدأ وضع خطة حرب أكتوبر بين الفريق سعد الشاذلي رئيس الأركان و الفريق أول محمد صادق وزير الدفاع ، و حصل بينهم خلاف في وجهات النظر ، الشاذلي كان شايف إن الخطة المناسبة هي خطة دفاعية لتكبيد العدو أكبر خساير ممكنة مع الحصول علي جزء من سيناء

- و الفريق صادق كان شايف إن عشان الجيش يرجع سيناء لازم خطة هجومية و تستعاد سيناء كلها ، و ده كان سبب رفض الفريق صادق لفكرة خوض الحرب في الوقت ده ، لأن الجيش مكنش علي مستوي الإعداد في التسليح زي العدو ، هما كانوا متفوقين علينا بمراحل خصوصا الطيران

- عرضوا وجهة نظرهم علي السادات ، و ساعتها السادات اتعصب من موقف الفريق صادق لان السادات كان عايز يحارب ، و ده أدي بعدها لانه يشيل الفريق صادق و يعين المشير احمد اسماعيل وزير للدفاع في اكتوبر ٧٢

- المشير احمد اسماعيل و الفريق الشاذلي كان بينهم خلاف قديم من أيام وجودهم في الكونغو ، و السادات كان قاصد ده جداً عشان ميعملوش انقلاب عليه و ده يبينلك ذكاء السادات ، لكن ده أثر بشكل كبير علي الحرب لأن أكبر قيادتين في الجيش كانوا علي خلاف سابق

- المهم اتطلب من الفريق الشاذلي إنه يعد خطة الحرب ، و كانت الخطة عبارة عن استعادة ١٥ كيلو من سيناء ، بسبب إن دي المسافة اللي تقدر صواريخ الدفاع الجوي المصري تغطيها ، و تم تسمية الخطة بالمآذن العالية ، و دي الخطة اللي اتفقوا عليها و كانت سرية

- تم الإتفاق مع سوريا علي دخول الحرب مع مصر للضغط علي العدو من الشمال سوريا و الجنوب من مصر ، و اتطلب من الفريق الشاذلي يعمل خطة بديلة اتسمت [ جرانيت ] للوصول للمضايق و دي كانت خطة صورية عشان يقنعوا سوريا بس إنها تدخل الحرب

- لأن لو خطة المآذن العالية هي اللي قالوها لسوريا ، مكنتش هتوافق انها تدخل الحرب ، فكانت خطة جرانيت بتطوير الهجوم هي الخطة اللي حصر اتفقت بها مع سوريا ، لكن فعلياً مصر كانت مستعدة و تم الاتفاق علي تنفيذ خطة المآذن العالية ، لأن مستحيل يتطور الهجوم لأن قواتنا هتكون مكشوفة

- حصل الاتفاق بين مصر و سوريا علي موعد الحرب و كان في اواخر اغسطس ، و اختاروا الموعيد بناءا علي عدة عوامل زي المد و الجزر و القمر الخ ، و تم الاتفاق علي موعدين
١- من ٧ الي ١٤ سبتمير
٢- من ٥ الي ١٢ اكتوبر
و تم ترك اختيار الموعد للقيادة السياسية ، بشرط تبليغ الجيش قبلها ب ١٤ يوم

لضيق الوقت اتفقوا علي اكتوبر و تم تحديد موعد ٦ اكتوبر لانه كان يومهارعيد الغفران اليهودي ، لكن حصل اختلاف بين مصر و سوريا علي ساعة الهجوم ، مصر شايفة إنه يتم مع اخر ضوء للشمس و سوريا شايفة إنه مع اول ضوء للشمس ، و اتفقوا انها تكون الساعه ٢ الضهر

- نيجي لاول معلومة علط :
حرب أكتوبر مكنتش مفاجئة بالعكس العدو كان عارف موعد الهجوم ، بسبب العميل المزدوج اشرف مروان ، اللي اخبر العدو بموعد الهجوم ،ًNetflix من سنة عملت مسلسل عنه و ده وثائقي تشوفوا القصة كاملة
youtu.be

- فلسفة خطة العبور كانت استنزاف و تدمير قوات العدو بشكل رئيسي ، لأن الكيان الصهيوني عنده نقطة ضعف ان وقت الحرب ٢٠٪ من الشعب بيتم تجنيده و ده بيأثر علي الحياة عندهم ، مفيش اقتصاد ولا تعليم ولا حاجة كله واقف ، فكانت الخطة هي زيادة مدة الحرب لتزويد الخساير

- كانت خطة العبور الساعه ٢ الظهر هيتم ضرب المواقع المهمة و مراكز الاتصالات و المطارات في سيناء و دي اتسمت بالضربة الجوية ، و بعدها تبدأ المدافع بدك خطوط العدو و تدمير مساطب الدبابات الموجودة فوق خط بارليف لتأمين العبور

- الحقيقة ان وقتها كنا محظوظين إن الدبابات محتلتش المصاطب بتاعتها لان المعلومات عند الصهاينة بتقول ان الهجوم هيبدأ الفجر و ده خلاهم يتأخروا في استدعاء الاحتياطي و هنا كان الخداع

- نجحت الضربة الجوية و حققت ٩٥٪ من أهدافها ، و بدأت بعدها موجات من المدفعيه علي طول القناة بمعدل موجه كل ١٥ دقيقة و تم تدمير مصاطف الدبابات علي طول الخط ، و ده سهل علي القوات العبور بدون مقاومة من العدو

- قبل الحرب تم شد فتحات النابلم علي طول القناة بواسطة الضفادع البشرية ، و كانت موجات العبور بتستغرق ١٥ دقيقة
الفيديو بيوضحلك التخطيط للعبور كان ازاي

- جت فكرة تدمير الساتر الترابي بواسطة مضخات المياة من أحد الظباط المهندسين و هو اللواء باقي زكي يوسف و تم تدريب القوات عليها قبل الحرب

- خطة العبور الأساسية كانت انه يتم عبور ٤ فرق مدرعة و و يكون في ٤ فرق احتياطي تفضل ورا القناة ، لأن كان معروف وقتها ان هيحصل ثغرة بين الجيش الثالث و التاني فالاحتياطي ده هو اللي هيتصدي للثغرة

- اتطلب من الشاذلي تعديل الخطة و يتم زيادة القوات اللي هتعبر الي ٥ فرق هي الفرقة ١٨ و ٢ و ١٦ و دول تبع الجيش التاني و الاحتياطي بتاعهم كانت الفرقه ٢١ مدرعة ، و في الجيش التالت اللوار١٠٥ برمائي و الفرقة ١٥ و ١٩ و الاحتياطي بتاعهم الفرقة ٤

- مميزات الخطة دي انها ذات كثافة نيرانية عاليه لكن المشكلة انه تم تفتيت الاحتياطي ، و حصلت مشكلة تانية و هي انه حصل خلاف بين الشاذلي و مدير المخابرات الحربية علي عبور كل كتايب الصواريخ المضادة للدبابات من طراز ماليتوكا ، الشاذلي رفض عبور كل الكتايب لأن مش هيكون في احتياطي

- عبرت فعلاً كل كتايب الصواريخ المضادة للدبابات و حصل شئ كارثي إن الكتايب دي مرجعتش تاني للفرق بتاعتها اللي في الاحتياطي و ده هيسبب مشكلة كبيرة في الثغرة

- كان الشاذلي شايف ان اي هجوم مضاد هيكون خلال يومين و ده اللي حصل فعلا ، لكن مدير المخابرات شايف انه قوات المشاه اللي هتعبر هتكون لمدة ٦ ساعات بدون دبابات فشاف ان كل كتايب اصطياد الدبابات تعبر مع المشاة

- في حدود الساعه ٤ و نص العصر كان عبر حوالي ٢٠ الف جندي مصري و تم تأمين مناطق لعمل رءوس الكباري لعبور الدبابات و المجنزرات ، و في حوالي الساعه ٦ و نص تم عمل اول كوبري

- الساعه ٥ و نص العصر كان المفروض يكون في ضربة جوية تانية ، لكن حسني مبارك شاف ان ملهاش لازمة ، كان وقتها قوات الصاعقة هيعدوا خلف خطوط العدو و ينزلوا بالهليكوبتر عشان يقطعوا الممرات ، لكن بسبب عدم وجود حماية جوية او طائرات مصرية تم استشهاد نص رجالة الصاعقة في مذبحة الهيلكوبتر

- يوم ٧
——
تقدم الاحتياطي الاسرائيلي باتجاه القناة بواسطة ٣ فرق بقيادة شارون و ادان و ماجان ، و استمرت امدادات الدبابات الصهيونية لحد ما وصلوا لحوالي ١٠ الوية مدرعه

- يوم ٨
—
حصل اول هجوم مضاد باستخدام فرقة أدان علي الجيش الثاني خصوصا الفرقه ٢ المدرعة ،ولكن تم صد الهجوم و تدمير عدد كبير من دبابات العدو
—
تم بناء رأس كوبري موحد للجيوش الثاني و الثالث و تمركز الدفاعات

- يوم ٩
—
هجوم مضاد شرس في الجبهة السورية و ده بسبب قرب الجولان من قلب اسرائل فركزوا الهجوم علي سوريا و قدرت اسرائيل ترجع جزء كبير من الجولان ، و تدخلت القوات العراقية و الاردنية مع سوريا للمقاومة

- يوم ٩
——
كان السادات متفق مع سوريا ان يوم ٩ الجيش هيقف وقفة تعبوية عشان ينظم نفسه ، لكن محددش المدة قد ايه عشان زي ما قولنا مكنش في نية داخل الجيش المصري بتطوير الهجوم و ان الخطة اتحطت عشان سوريا تدخل الحرب بس

- يوم ١١
—
الضغط زاد علي سوريا و ابتدت قوات العدو تدخل في العمق السوري و طلبت من مصر رسميا سرعة تطوير الهجوم عشان الضغط يخف هناك

يوم ١٢
—
كان العدو شايف انه مستحيل يعبر القناة بسبب ان مصر كسبانة ارض و صعب يتغلبوا عليهم ، خصوصا انهم حتي لو عبروا في فيه احتياطي مصري ورا القناة ، لحد ما السادات طلب تطوير الهجوم وقتها و اتحركت فرق الاحتياطي و عبرت القناة و بالتالي مفيش احتياطي ورا القناة

- اعترض الشاذلي و قادة الجيوش اللواء سعد مأمون قائد الجيش الثاني و اللواء عبد المنعم واصل قائد الجيش الثالث و قادة الفرق كلها علي تطوير الهجوم ، لأن تطوير الهجوم خارج مظلة الدفاع الجوي يعني انتحار

- اقصي ما عرفوا يعملوه انهم يأخروا الهجوم لمدة يوم بدل ما يكون ١٣ يبقا ١٤ و استغلوا اليوم ده في تنظيم الفرق و القوات ، كان وقتها الوضع هدي في سوريا و بدأ الجسر الجوي الأمريكي لإسرائيل بطيارات و دبابات جديدة و بالتالي بقا كل الطيران مركز علي مصر

- يوم ١٣
—
صورت طائرة استطلاع امريكية الجبهة و اكتشفت وجود الثغرة و عبور الفرق ٤ و ٢١ المدرعه القناة و بالتالي مفيش احتياطي ، و ده شجع العدو علي العبور

كارثة تطوير الهجوم بالتفصيل ١

كارثة تطوير الهجوم ٢

تطوير الهجوم ٣

تطوير الهجوم ٤

كارثة تطوير الهجوم ٥

يوم ١٥ أكتوبر
—
بدأت أول قوات اسرائيلية تعبر القناة من الثغرة و محدش كان يعرف لأنهم استخبوا في منطقة زراعات

يوم ١٦ أكتوبر
—
السادات طلع في مجلس الشعب قال خطاب النصر و عبرنا القناة في ٦ ساعات ، بعدها بكام ساعة طلعت جولدا مائير في مؤتمر و قالت ان قواتها بتحارب دلوقتي في افريقيا ، السادات مكنش يعرف ان فيه قوات عبرت و اتجنن

- اقترح الشاذلي انه يتم سحب اللواء ٢٥ مدرع من الجيش التالت عشان يصفي الثغرة ،ولكن السادات ثار عليه و هدده بمحاكمةًعسكرية و أمر بأن مفيش بندقية واحد تنسحب من الشرق للغرب

الثغرة

الثغرة بين الشاذلي و السادات ١

رأي مبارك في الثغرة

- طب الحقيقة في الثغرة ايه كرأي محايد بعد دراسة القوات المصرية
- من كتاب المعارك الحربية في حرب اكتوبر للواء جمال حماد

- طلب السادات من السفير السوفيتي طلب وقف اطلاق النار ، و وقتها عبرت ٣ فرق مدرعه الي السويس بقيادة شارون و ادان ، و تم حصار الجيش الثالث الميداني و في يوم ٢٤ اكتوبر اعلن مجلس الأمن وقف اطلاق النار

- طبعا اسرائيل كعادتها ملتزمتش بوقف اطلاق النار و دخلت السويس و طلعت علي طريق القاهرة و تصدت لها المقاومة الشعبية من رجالة السويس و تم وقف اطلاق النار رسمياً يوم ٢٨ اكتوبر و تم حصار الجيش الثالث

- طلب الاتحاد السوفيتي من امريكا ارسال قوات مشتركة و لو رفض الامريكين كان هيرسل قوات سوفيتيه الي الشرق الاوسط ، و امريكا مش عايزة السوفييت يوصلوا الشرق الاوسط ، فكان العالم وقتها علي شفا حرب نووية ، أمريكا جهزت الصورايخ النووية و قاذافات القنابل كانت مستعدة للاقلاع

بدأت المفاوضات بين مصر و اسرائيل علي حصار الجيش التالت و وقعوا اتفاقية النقاط الـ ٦ ان كل الاسري يرجعوا اسرائيل مقابل انهم يسمحوا للأكل و الشرب بالمرور للجيش التالت و في يناير و قعوا اتفاقية فض الاشتباك

- خلصت الحرب و ابتدت المفاوضات للسلام ، و للأسف تم توقيع كامب ديفيد بتنازلات كتيرة جداً ، خلتنا نفقد السيطرة علي سيناء لحد وقتنا هذا
—
عسكريا : احنا خسرنا الحرب
١- الجيش التالت اتحاصر
٢- امريكا دخلت الحرب
٣- تدمير كبير لمعداتك و الدفاع الجوي
٤- الثغرة

- سياسيا : احنا استرجعنا الارض ، تحت مسمس اننا استرجعناها لكن ملكش اي سيادة عليها
—
كامب ديفيد اللي استقال فيها وزير خارجية السادات اعتراضاً علي التنازلات اللي فيها ، و اللي هنري كسينجر قال في مذكراته انه كان مستغرب موقف السادات انه بيوافق علي كل اللي بيتطلب منه

- كامب ديفيد : قسمت سيناء الي ٤ مناطق ملكش فيهم حرية التسليح ، ارضك و كل حاجة لكن ملكش فيها حرية انك تعمل قواعد و مطارات عسكرية أو تحط فيها عدد القوات اللي تعوزه ، فبالتالي وصلت سيناء لكل اللي هي عليه

- أي تنمية بتحتاج وجود الامن و الامان ، و البتالي لازم يكون لك وضع قوات في المنطقة اللي تحبها عشان تحميها ، لما تبني مصنع و لما تبني مدرسة لازم يتأمن كويس و بالتالي ده مش موجود

- ده ممكن يفسرلك ليه الجيش مش قادر يهزم ١٠٠٠ واحد من داعش و هو بسبب الاتفاقية دي ، عشان تدخل طيران او قوات زيادة لازم تستأذن اسرائيل الاول و بالتالي اسرائيل عايزاك واقع اصلاً
- سيناء دلوقتي اصبحت زي منطقة عازلة بين البلدين

- كامب ديفيد

بالمناسبة كل المدن اللي في سيناء و اغلب الطرق اسرائيل هي اللي عملتها خلال ال ٦ سنين اللي قعدوهم ، مصر حرفيا معملتش حاجة في سيناء تذكر

المصادر
—
١- مذكرات خرب اكتوبر للفريق الشاذلي
٢- البحث عن الذات الرئيس السادات
٣- المعاركً الحربية في حرب اكتوبر ، و ده إهم كتاب لأنه بيشرح الحرب بالتفصيل و بيناقش قرارات السادات والشاذلي بكل حيادية ، تأليف اللواء جمال حماد عضو تنظيم الظباط الاحرار

ملخص قرارات الحرب من كتاب جمال حماد

عموما الحرب فيها تزييف كتير ابرزها تمجيد مبارك انه صاحب الضربة الجوية و النصر ، لكن محدش عارف انه السبب في مذبحة الهليكوبتر و استشهاد نصف رجالة الصاعقة ، و تهميش الشاذلي و نفيه خارج البلد

من الحاجات المهمة اللي لازم تعرفها ، ان السادات قضي في الجيش ٥ سنين فقط و اتخرج من الكلية الحربية بعد سنة واحدة بسبب الحرب العالمية الثانية ، فخبرته العسكرية = خبرة نقيب ، و بعدها اتجه للسياسه

- عشان منزليدش علي بعض ، حرب اكتوبر بدأت بنصر و خلصت بهزيمة عسكرياً ، الهزيمة معناها ان قواتك اتحاصرت و قوات العدو علي طريق القاهرة ، الحرب لو كملت عسكريا مكنش هتكون مصر موجوده

لدرجة انك كنت مذلول في المفاوضات عشان تفكًحصار الجيشرالتالت و الصهاينة بيفتشوا عربيات الاكل و يدخلوا الاكل يوم بيوم

مش هنزايد علي بعض يا جماعة

البطل محمد العباسي اول من رفع العلم في سيناء

الفريق سعد الدين الشاذلي رئيس اركان القوات المسحلة

الفريق اول احمد اسماعيل علي وزير الدفاع

اللواء محمد عبد الغني الجمسي رئيس هيئة العمليات

اللواء محمد حسني مبارك قائد القوات الجوية

اللواء محمد علي فهمي قائد الدفاع الجوي

اللواء سعد مأمون قائد الجيش الثاني و اصبب بسكتة قلبية بعد فشل تطوير الهجوم

اللواء عبد المنعم واصل قائد الجيش الثالث

اللواء عبد المنعم خليل قائد الجيش الثاني من ١٥ اكتوبر

النقيب زكي باقي يوسف صاحب فكرة تدمير خط بارليف بالمياه

اللواء محمود عبد الرحمن فهمي قائد القوات البحرية

لواء كمال حسن علي مدير سلاح المدرعات

لواء محمد سعيد الماحي مدير سلاح المدفعية

لواء جمال محمد علي مدير سلاح المهندسين

الشهيد / عميد احمد حمدي نائب مدير سلاح المهندسين و استشهد وسط المعركة اثناء بناء الكوبري

اللواء نبيل شكري قائد الصاعقة

الرقيب محمد حسين محمود سعد اول شهيد في حرب اكتوبر

الرئيس محمد انور السادات القائد الاعلي للقوات المسلحة

الفريق اول محمد فوزي ، من اعاد بناء الجيش المصري بعد النكسة و مهندس حرب الاستنزاف

الثريد ملخص كتاب ٨٠٠ صفحة لو عايز تقرأ بالتفصيل عن حرب أكتوبر بوجهة نظر محايدة شوف كتاب المعارك الحربية في حرب اكتوبر للواء جمال حماد

- حاجة مهمة : الثغرة كان ممكن تتصفي تماماً فعليا يوم ١٦ اكتوبر لأن عدد القوات اللي عبرت كان صغير و الشاذلي اقترح سحب لواء مدرع من الجيش التالت يقضي عليهم و يدمر الثغرة ، لكن السادات رفض

- لكن يوم ٢٠ اكتوبر كان عبر ٣ فرق مدرعة اسرائيلية بقيادة شارون و أدان ، و بالتالي حل سحب بعض القوات من الشرق للغرب كان سليم نظرياً ، لكن علي أرض الواقع كان مستحيل لأن العدد زاد و هما أكفأ منك و بالتالي عشان تسحب ٤ الوية زي ما الشاذلي كان عايز هتكون مواجهة قصاد ٨ الوية اسرائيلية

- فكان قرار السادات صح يوم ٢٠ بإنه لو سحب قوات هيتدمر حرفياً و تكون كارثة ، لكن السبب في الثغرة نفسها هو السادات لأنه كان في ايده يوم ١٦ يسحب لوا مدرع واحد يصفي الثغرة و الموضوع يخلص ، لكنه رفض اقتراح الشاذلي

ليه مكنش ينفع سحب قوات يوم ٢٠ اكتوبر بالتفصيل

نقطة مهمة كمان : الشاذلي هو القائد الوحيد اللي زار الجبهة في الحرب و بالتالي كان عارف كويس معنويات الجنود و شايف المعركة علي الواقع

هل حرب أكتوبر أثرت علي الإقتصاد بشكل كبير ؟
—
لا ، مجمل ديون مصر في حكم السادات كان ٣٠ مليار ، ديون مصر بعد الحرب مباشرة كانت حوالي ١٢ مليار دولار مع العلم إن منهم ٥ مليار ديون في عهد عبد الناصر يعني من سنة ٧٠ الي ٧٤ ديون مصر ٧ مليار دولار

نقطة مهمة : كل اللي عملناه في حرب اكتوبر كان اشبه بالمعجزة ، بداية من العبور و خطة الحرب ... ، لكن بعض الاخطاء ادت للي حصل ، خصوصا إن الجيش المصري كان اضعف بكتير من اسرائيل من حيث التسليح ، و كمان دخول امريكا في الحرب كان مستحيل مصر تعمل اكتر من اللي عملته

فكان الحل السياسي هو الحل ، لكن طول عمرنا هنفضل فخورين بالحرب لأن بغض النظر عن نهايتها لكن فخر لكل مصري اللي اتعمل في الحرب خصوصا انك بتحارب لوحدك قصاد ناس اكفأ منك و معاهم أمريكا ، حرب أكتوبر من أعظم حروب العالم وخطة العبور من أعظم الخطط في تاريخ الحروب وبتدرس برا في كليات الحرب

و ده السببراللي خلي السادات يغير من الاتحاد السوفيتي و يروح مع امريكا بسبب عدم دعم السوفييت مصر في الحرب زي ما امريكا عملت مع اسرائيل و لاحتي في التسليح قبل الحرب

حاجة مهمة : في اسرائيل عملوا لجنة تقصي حقايق لمعرفة أسباب اللي حصل في حرب اكتوبر بالرغم من انهم كانوا في طريقهم للقاهرة ، و ده عشان يتعلموا من أخطائهم و متتكررش تاني ، لكن في مصر حضل عكس كدا تماماً ، الشاذلي اتنفي و اتهمش و تم نسب النصر اللي حصل لناس بعينهم

علاقة كامب ديفيد بالارهاب في سيناء

- انا فعلا مش عسكري و لا بفهم في الحرب ولا اي حاجة ، و انا مجبتش حاجة من عندي كل اللي في الثريد من مذكرات الشاذلي رئيس اركان الجيش وقتها ، و كتاب المعارك الحربية للواء جمال حماد و كان من الظباط الاحرار ، و مقللتش من اللي حصل مش هنزايد علي بعض ، الثريد واضح حقائق عن حرب اكتوبر

و الموضوع براحتك ، عايز تاخد معلوماتك من الاعلام و يصدرلك اللي عايزك تعرفه براحتك ، فالثريد واضحويا جماعه والله إنه حقايق عن حرب اكتوبر متقالتش و ناس كتير متعرفهاش و كلها مثبته ، كفاية مزايدات الله يكرمكم

ها يا جماعة هتطلوعوني اسرائيلي امتي ؟

يا جماعه يا جماعه والله والله الثريد واضح انا مش بتكلم عنوالحرب كاملة بكل تفاصيلها عشان ده محتاج كتب ، الثريد واضح انه حقايق عن الحرب ناس كتير متعرفهاش ، و الطبيعي اني اركز علي حزء اننا منتصرناش عسكريا زي ما الناس فاهمة

السادات و قبول وقف اطلاق النار

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد