#علميًّا؛
فيه عندنا بالعين نوعين من الخلايا اللّي حسّاسة للضوء، المخاريط والعصيّ، المخاريط ما تهمّنا فهالموضوع، تهمّنا #العصيّ -اسمها كذا لأنّه شكلها يشبه العصا- هيّ المسؤولة عن الرؤية اللّيليّة، وذا بسبب إنّه فيها صبغة حسّاسة جدًّا للضوء اسمها #رودوپسِن.

حساسة جدًّا للضوء; معناها تلتقط أضعف إشارة أو أضعف وجود للضوء، بينما لو كان الضّوء مرّة قوي ما تتفاعل، وبكذا هيّ أنسب خليّة ممكن تساعدنا وقت اللّيل؛ لأنه بتدوّر على أضعف وجود للضوء وتلتقطه عشان تعطينا وضوح في الرؤية، المشكلة معها إنّها تاخذ وقت لحد تلقط مصادر الضّوء.

عشان كذا أوّل ما تطّفي عليك الكهربا، أو تدخل مكان مظلم، انتظر لكم دقيقة، وبعدها ملامح المكان بتبدا تتّضح عندك بعد ما تجمّع العصي الضوء اللي تحتاجه عشان تشوف، ولا تقعد مركّز ع قدام بس أو منطقة وحدة، غيّر مكان نظرك، شوف يمين وشمال، بس عاد لا تستهبل تلفلف كنك مجنون :).

طيب ليش باللّيل ما نشوف #ألوان الأشياء؟ لأنّه الخلايا اللّيلية اللي شغّالة معنا هيّ #العصي، والعصي ما تشوف غير اللّونين الأبيض والأسود :(، عشان كذا تنعدم من عندك الألوان، بينما خلايا المخاريط: تقدر تميّز الألوان لأنها تشتغل وقت ما موجود الضوء بنسبة كبيرة، مثل وقت النّهار ?.