بمناسبة الكلام عن الفساد
وانا رئيس مباحث جالي مواطن مصري بيشتغل مقاول في السعوديه
قالي انا ليا شيك على واحد وعايزك تجيبهولي وليك نسبة ١٠% من قيمته
قلت له مين قال لك أني حرامي قالي اعوذ بالله ليه يا باشا بتقول كدة انت بتخدمني وبعدين فلان بيه في قسم كذا وفلان بيه في قسم كذا

باتعامل معاهم كدة على طول (واحد من الاتنين دول كان مدير أمن بعد الثورة وتم استبعاده لأنه أخوان)
قلت له وانت عايز تضيفني للكشف ده لولا انك متعرفنيش واني جاي عندكوا جديد.كنت حبستك بس انا هاجيب لك فلوس عشان ده شغلي وانا باخد مرتبي عشان كده وفعلا جبت له الفلوس من خصمه

تردد عليا اكتر من مرة بعدها للسلام او في الأعياد للمعايده ومرة بيقولي انا عايز اقولك حاجه يا باشا بالصراحة انت .رحت مقاطعه وقلت له هتقولي انت احسن واحد جه عندنا وانت احسن ضابط مباحث
قالي بصراحه مكنتش هاقول عليك كدة وبعدين مين قال ان انت احسن واحد جيت عندنا ده انت اسوأ واحدجالنا

قبل كدة كنا بنجامل الضباط ونهاديهم ويبقى لنا عشم لما اعوز حاجه افتح الباب وادخل على رئيس المباحث لكن انت اقف برة واطلب الدخول ولو مشغول ومقابلتنيش ما اقدرش اتكلم
لا انا اريح لي الضابط اللي بياخد مني مش الضابط اللي مبياخدش
عرفتوا أن المصريين بيعشقوا الفساد وتعايشوا معاه وبيفضلوه