رتبها

تفاصيل التجربة بالتغريدات القادمة ..

طبعا بالبداية وبعد ماخلصت من الثانوي والتحصيلي وحوسته اخذت بريك راحة وكنت ناوي بعد العيد اتوظف , ولكن قررت اخليها تدريب منها استفيد بمجالي ولو كان معه مدخول مادي فأكون ضربت عصفورين بحجر او على الاقل اطور نفسي بالمجال واللي كان اهم بالنسبة لي , بديت اقدم على شركات كثير وبدون اي رد

سألت بكذا مكان وقالوا لي افضل شي للتدريب بهالمجال هو المستشفيات بما ان غالبا عندهم أنظمة وسيرفرات وشغل كويس للمجال , وقتها كنت سبق وقابلت مدير تقنية المعلومات بمستشفى الملك سلمان " طارق العلي " بالمؤتمر الدولي للأمن السيبراني بجامعة حائل وكنت معجب فيه جدا

كلمته وقال بسال لك مدير التدريب وبنفس الوقت قدمت على مستشفيات كثير منها الخاص والحكومي , بعدها بكم يوم جاني ايميل - الصورة - ما اخفيكم كانت صدمة لاني ماتوقعت اي تفاعل وكان عندي أمل خفيف انه ممكن المهندس طارق هو اللي يعطيني وجه فقط , بسرعة ارسلت الطلبات وبعدها بربع ساعة تقريبا

جاني اتصال منه واخذنا بالحديث مايقارب ال 15 دقيقة شرح لي كل شي واللي ودي اتدرب عليه وخبراتي ووش اشتغلت عليه والخ... ووش ودي اشتغل عليه وكلام كثيير وبعدها قال انتظر الرد هاليومين , وقتها ماصدقت انه

فيه احد عطاني وجه ولاكملت مع المهندس طارق وتابعت مع المستشفى هذا , مرت 10 ايام بدون اي رد .. ما اخفيكم حسيت انه بيسحبون علي وارسلت ايميل اسأل عن الموضوع وكان هذا رده - الصورة - كان رده مطمئن جدا وجلست انتظر الرد , بعد مرور شهر بدون اي رد وانا مع كل اتصال من رقم غريب او ايميل

اتوقعه منه ولكن للاسف شهر بدون اي رد , ارسلت ايميل اخر أسال فيه عن اخر التطورات ورد لي بالاعتذار على التاخير وقال بإذن الله الايميل بكرا راح يكون ايميل توجيهك واذا نسيتك ذكرني برسالة ايميل , فرحت وقتها واول ماصحيت مباشرة فتحت الايميل ولاكان فيه اي رد , ارسلت له تذكير نفس ماطلب

بعد بدون رد , مرت يومين ورجعت ارسلت ايميل ثاني وبرضوه بدون رد , بعد الايميل الثاني بثلاث ايام رد وقال كل التاخير الحاصل بسبب اننا نحاول نخلي جيتك لنا نظامية باكبر شكل ممكن واني مانسيتك , وبنفس اليوم وصل الايميل المنتظر , كان شعور جميل وفرحة كبيرة .. ولازلت اتذكر بنفس هاليوم

اعلن مستشفى الملك سلمان إطلاقة تقنية البلوكتشين بالمستشفى , لحظتها حسيت بالحسرة والندم اني ماتابعت موضوعي هناك .. وبنفس الوقت كانت فرحتي كبيرة لنجاح المهندس طارق وسعدت بالخبر .. صحيت قبل موعد مقابلتي بساعة , تجهزت واخذت اوراقي ونسخة من السيرة الذاتية بحال طلبوها

وصلت المستشفى على الوقت واتصلت عليه وقال تعال عند الموارد البشرية , دخلت وتوجهت للإدارة وقابلته وقالي انتظر لحظات بس , بعد كذا دخلت على مديرة الموارد البشرية عندنا ووقعت عقدي البسيط بمسمى يعكس لك الحقبة التقنية اللي هم عايشينها واللي مثلت الصدمة الاولى لي " مبرمج حاسب إلي "

خلصت توقيع العقد وبدون اي مقابلة او غيره توجهت مع مدير التدريب لقسمنا وعلى الباب كان مغلق بلوحة الكترونية والدخول عن طريق البصمة فقط او رقم سري , لحظتها كنت متوقع شي كبير خلف هالباب , فٌتح الباب وكانت مكاتب عادية لابعد درجة , قال لي تعال من هنا , - قلت بنفسي ايه شكل فيه شي احسن

وليتي مارحت معه , دخلت وكانت مكاتب اسوأ من سابقتها , كان مدير القسم برأسه يقعد بين ملفات الارشيف على مكتب كله غبار وكراسي بنفس الوضع , صح بالمناسبة وانا واقف على الباب مع مدير التدريب اعطاني خبر ان القسم مافيه الا موظفين فقط وهنا كانت صدمتي الثانية , عموما عرفني عليهم وخرج

سألني مدير القسم عن اخباري وبعد ثواني كان فيه فني من خارج المستشفى بيوصل خط شبكة جديد , قال روح معه شوف ازاي يأرج , كانت صدمات كثيرة عجزت استوعبها رحت وراه وانا منفس وكمية حرقان , غرفة بلا تكييف وتخيل باول يوم تباشر اشغال ماتستوعبها بدون شرح او تعريف للقسم او اي شي ممكن يساعدك

فتخيل الشعور عاد , مرت ال10 دقائق او اقل اللي قضيته معه وحسيت انه سنين ومجرد ماقال " خلصنا ياباشا " خرجت مسرع ابحث عن مديري الجاهل , وللاسف مافيه احد باي من المكاتب اللي حولنا ولامكتبنا , قعدت انتظر 15 دقيقة لين شرف حضرته وجلس يكلمني ويشرح مهامي وعن ايش درست ووش اعرف والخ..

تعمقنا بالحديث وتوالت الصدمات علي , بداية من ان النظام من شركة مشغلة ولاعندهم اي إمكانية بتعديله او التحكم فيه او غيره وكل شي يروح لدعم فني خارج حائل , بديت وقته احس اني اخطيت بهالتدريب وليتي جهزت لمشروع عشان مسابقة إجازتك واللي وقتها كان باقي 7-9 ايام تقريبا على اخر موعد تسليم

استمر بحديثه وقال لي " شغلنا زي الاسعاف اللي برا نروح نخلص الشغل ونرجع نوقف مكاننا كدا " , صدمة ورا صدمة وهو مستمر بحديثه وقال لي بتعرف - تسطب ويندوز ؟ - هنا عرفت مستوى العمل الحقيقي واي مرحلة من التطور التقني واصلين لها , كل شي كان غير مطمئن , وشعور الغبنة بداخلي كبير

قال لي ان عندنا شاشة متعطلة وهذي بتكون اول مهامك , توقعت انها شاشة عادية وقلت بنفسي وش دخلني ؟ لكن قلت خل اشوف الوضع اول .. استاذنته وقلت راح ابدا دوامي من بكرا وبما اني ما استلم شي منهم كان دوامي مريح جدا وعلى راحتي اخذت شفت 4 ساعات وفترة مسائية ومحد يهتم حضرت او غيره للأسف

رجعت البيت وكتبت هالتغريدة اللي كانت تدل على اني كنت مبسوط وفعلا كنت كذلك لكن اني كنت متردد كثير ومنغبن بنفس الوقت ولكن قلت بجرب اول وبعدين احكم , مابي استعجل .. جيت على موعد الدوام ومافيه اي احد , بعد ربع ساعة جاء الموظف اللي مسوؤل عن تدريبي سلم علي

وراني الشاشة وشرح المشكلة وطلع وخلاني , المشكلة سخيفة وغبية , ومع نهاية الدوام كانت الشاشات جاهزة للتشغيل , وقال لي " اه انا كنت عارف الحل بس ماكنتش فاضي " عموما قبل نهاية الدوام قعدت معه وتكلمنا عن وضعي والخ.. , ودعته وطلعت ومن بكرا سلمنا الشاشات لقسم التسويق وشرحنا لهم كل شي

طبعا الشاشات كانت ذكية ( تشتغل بنظام اندرويد ) وكانت موظفة التسويق هي اول موظفة اقابلها من خارج قسمها واتعامل معها , كانت رهيبة جدا ومن افضل اللي شغالين بالمستشفى , عموما كملت بقية الاسبوع مابين الجلوس لساعات طويلة بالمكتب بدون اي فائدة وحتى مكتب مالي , كنت ازاحمهم على الكراسي

او اكون اشرح شي بالشاشات لموظفة التسويق , عموما كان يعطيني بهالوقت مهام غبية نفس تأريج الاسلاك واللي سبق وقلت له اني سيء باي شي خاص بالهاردوير او الاعمال اليدوية واتوقع واضح بالصورة ليش , قعدت تقريبا 3 ساعات عشان اخلص سلك واحد وهو ضبظ اغلبه بعد .. وبأول الايام طلبت منه

اشوف غرفة السيرفر اللي عندنا والشبكة والخ... رحت وشفتها وكانت صدمة داخل الغرفة موظفة السنترال والشغل سيء جدا واجهزة مفقعة باطراف الغرفة ومناظر تعكس لك الاحترافية , عموما طلعت وشفت الباك اب سيرفر ولا اقدر اذكر التفاصيل بعد للأسف , وشفت الشبكة كاملة وكيف موصلينها

وكان شوي ويرسم مخطط الشبكة لي لين فجاءة قال اصبر لين تتحدد مهامك ماينفع اعطيك اسرار المكان ومن هنا بدا الوضع يصير زبالة وبعدين جبت له حل لمشكلة طالب مدير المستشفى نطبقها على الشبكة ولما جينا نطبقة ونتاكد من جودته , طلبت بعض البيانات الخاصة بالشبكة وامور داخلية .. قام

وسوا نفسه مشغول واخر اليوم قال لي ماينفع اعطيك لين تتحدد مهامك وهذي اسرار مكان وو , بديت احس ان الوضع صار زبالة واني ضيعت على نفسي فرص افضل من هالمكان , عموما قعدت باقي الاسبوع زي ماذكرت سابقا اخلص مهام غبية ومعظم وقتي جالس ابحث عن فرص التطوير الممكنة بالمستشفى لمجالنا

جاء ببالي اشتغل مع قسم التسويق عندنا على البيانات واطور من الشغل والخ.. , ومنها اطلع من سالفة اسرار الشركة والخ.. واصير انا اشتغل علطول مباشرة معهم بدون مايصير فوق راسي أحد ويشغلن , مع نهاية الاسبوع رحت وقعدت مع المدير وقلت حدد مهامي وانك تاخرت والخ , بدا يكتبهم عشان يرسلها

لمدير التدريب عندنا وكتب :
- صيانة اعطال الحاسب الالي
- اعمال الدعم الفني
قعدت اراعي له وقلت الا غيره وش عندك ؟ وجالس يحاول يقنعني انه الواحد مايدري وين رزقه ولازم يتعلم من كل شي شي , قلت كلامك صح بس بالنهاية الواحد حاط لنفسه خطه ويمشي عليها , ليه اضيع شهر على اعمال دعم فني

يسويها خريج تقنية او اي واحد بعد , بدال ما اركز على مجالي ؟ , قلت اسمع انا لو تبي امسكها لك لحالي ماعندي مشكلة بس ابي شي يفيدني وقلت له ابي اشتغل على الشبكات وارفع مستوى الامان فيها والخ.. , قال ماينفعش وو , بعد كذا قلت خلاص خل الموظف الثاني يكون مشرف علي ووافق , وقتها كان اهم شي

انه يوافق اشتغل مع قسم التسويق لانه هو الشي اللي انا مركز عليه وراح يفيدني , اول ماقلت له الموضوع ارتفع صوته وكان بيوقف قلبه وانه كيف تشتغل على بيانات المرضى والخ.. وانت متدرب وروح شركات تدريب تسوي لك هالشغل واحتدم النقاش وكنت شوي وامشي واتركهم وبعدين هو لطف الجو وهدينا شوي

قلت خلاص انت وافق ولاتشيل هم بياناتك ماراح اقربهم وتفاصيل كثير ما اقدر اذكرها , عموما وافق بعد ما اقنعته اني ماراح اقرب لاسرار الشركة , واستمريت على وضعي , مهمات سخيفة جدا وقليلة وبنفس الوقت ابحث عن خطتي الجديدة مع التسويق وارسمها واطورها وبما اني قاعد معظم وقتي بالمكتب فكنت ارد

على تلفون القسم دايم واغلب المكالمات كانت
اهلا " فلان" موجود ؟
لا
وبعضهم يشكرك وبعضهم يصبخ السماعة بوجهك
عموما استمريت على الوضع وشرحت لموظفة التسويق اني بشتغل معهم ولاتعمقت بالموضوع لين ارسم خطتي وعرفت منها ان فيه مديرة فوقها بس عندها اجازة , استمريت على وضعي

وبيوم جيت بدري قبل الموظف الثاني " بالمناسبة مديرنا ماسك ادارة 4 اقسام وماهمه قسمنا المفقع اصلا فكنا الاثنين لحالنا فقط" واول ماجلست على طاولتنا المتحاشرين عليها وشبكت جهازي الخاص لان ماعندي جهاز بعد اتصل تلفون المكتب ورديت قالت لو سمحت "فلان " موجود ؟
قلت لا , لكن امري ؟

قالت عندي مشكلة بالشبكة تقدر تحله؟
قلت اي قسم ؟
ونزلت له وجربت كم حل وبعد مافصلت الشبكة ورجعته اشتغلت ورجعت القسم , بعد ربع ساعة اتصلت ونفس المشكلة نزلت تحت وبعد محاولات كثيرة بدون اي فائدة وخصوصا اني ما املك اي صلاحيات على يوزر الادمن او غيره فكنت احاول بحلول عامة

جاء الباشا وبدا يحل المشاكل بما انه معه صلاحيات وانا مزهرية بجنبه , الحركة كانت تنرفز وسكتت لحظتها انا بعد ماخلصنا كان باقي مشكلة بالطابعة واحتاج يوزر الادمن عشان احلها وطلبته منه وقال خله انا اسويها قلت طيب عطني انا تراني معكم بالقسم وبيننا عقد بنبرة غير عادية , تركته وهو يتكلم

رجعت القسم وشرحت لهم الوضع ورجعت مكتبنا , جاء واحتدم النقاش بيني وبينه على الصلاحيات واني احتاج اكلم المدير فقلت له طيب هو حطها بالصلاحيات ليش ارجع له مره ثانية ؟ اجل وش متوقع اسوي يعني اجي اعلمك وش المشكلة ؟ قال ايه انت خط اول دعم فني , قلت طيب هم اصلا دقوا وشرحوا المشكلة

طلع حساس خوينا وزعل , وبدا مايكلمني ولايعطيني وجه اصلا , يومين بس وجت إجازة العيد ووقتها كنت خلصت خطتي ورفعت كل الطلبات اللي احتاجه لقسم التسويق وبعد العيد طلع خوينا الزعول اجازة فمسكت انا القسم وكان مجبر المدير يخليني امسكه مع انه خايف على اسرار الشركة , وهنا كانت نقطة التحول

بديت انعرف واكون علاقات ومسكت كل شي تقريبا الا النظام اللي ماعندي صلاحية عليه ولاتدربت عليه اصلا وكنت احول كل شي للمدير الغثيث , بهالفترة كنت بالبيت احاول اطور خطتي وانتظر البيانات تجيني ووقت الدوام امسك اعمال الدعم الفني , وكانت تجي طلبات غريبة وتصير مواقف تبقى بالذكرى

طبعا كموظف دعم فني عادي جدا يكلمك واحد ويسأل كيف ينسق ملف وورد عشان اذا طبعه بالعرض يطلع شكله مرتب , وعادي يسألك واحد كيف يسوي سيرة ذاتية , تقريبا اي شي بالاجهزة ننسال عليه سوا لنا دخل او لا وكنت اشوف اجهزة ماتنفع تفتح نتفليكس , رامات 1 قيقا واقل , اطلب قطع عشان نسوي لهم ترقية

او اجهزة جديدة وحسب مزاج المدير العلة تجي الموافقة مع انه فيه اقسام تحتاج اجهزة بمواصفات عالية ومع ذلك مايعطيهم وجه ويقول " يكفيهم واحد " كنت اعاني منه بس بنفس الوقت احاول اسوي اللي اقدر عليه واطلب من مدراء الاقسام يزعجونه بالطلبات والايميلات وبنفس الوقت مركز على خطتي وتدريبي

وبما اني اشتغل بمستشفى فبصراحة فيه مواقف تضيق الصدر كثيير , فعادي تشوف مريض يتم تجهيزه لغرفة العمليات وتشوف النظرات على وجهه ومشاعر اهله وهم يمشون وراه لاخر نقطة يقدرون يوصلون لها , كنت اكره طلبات العناية المركزة ومشاكلهم , احاول ادخل بدون ما اناظر للوضع حولي , واخلص المشكلة

واطلع بسرعة , ومع ذلك اشوف مواقف كثيرة , فمثلا تشوف واحد توه طالع من عملية يدخلونه للعناية بكامل وعية ويشوف وضع اللي حوله , احس هذي لحاله تجيب الهم والمرض .. مواقف تخليك تستشعر عظم نعمة العافية وتحمد الله عليها , أنين المرضى خلفي بالعناية , نظرات اهلهم وقت الزيارة وحديثهم

كلها امور كانت ضمن الجانب السيء بعملك بالمستشفى , وبحكم طبيعة العمل كنت اروح اي مكان واي مكتب , ولكن مع الوقت الامور تبدا تصبح طبيعية لك وماتكون نفس تأثير اول مره , تشوف الناس وهي تنتظر نتائج تحليله او لحظة استلامهم النتيجة , ناس تنتظر دورها للتحليل , ناس تنتظر عمليتها والخ..

مع الايام صارت مناظر عادية , وكنت اقضي معظم وقتي خارج المكتب بين الاقسام والعيادات , احاول قد ما اقدر اوفر لهم كل اللي يحتاجونه واوصيهم يشغلون المدير العلة اللي ماهو مستوعب دورنا وللاسف كان يعطل العمل بشكل كبييير لمعظم اللي قابلتهم , ما امدح نفسي ولكن الكل كان مبسوط بوجودي

لاني كنت اخلص موضوعك وانا اضحك واسولف معك واشرح لك كل شي بدون لف ودوران عكس خوينا الزعول , اللي يجيك مشغل مود النفسية ويعيط .. بهالفترة اخذت حرية اكبر ومكتب بعد ! , مديري مشغول عني واتجنب ارجع له الا بالضرورة القصوى , وانا الوحيد بالقسم فكنت مستمتع بالعمل وانتظر البيانات

مرات اطول وانا احل مشاكل بعض الاقسام فتلقاني اصلا ابدا اساعدهم بشغلهم وافهمه من كثر ما امر عليهم , ويروح اليوم بين الاسياب والسوالف والطلبات الغريبة والمواقف المؤثرة والانتظار .. وتقريبا باخر اسبوع ونص , كلمت مديرة التسويق وسالت وش صار على البيانات ؟ قالت كلم المدير العام

اذا وافق اعطيك اللي تبي بس مايحملوني مسوؤلية , قلت وش دورك كمديرة للقسم اذا ماتملكين اي قرار بيدك ومن هالكلام , عموما بعدها بيومين جابت لي مايشكل 5% او اقل من البيانات اللي طلبتها واللي ماراح تفيدني باي شي .. قبل هالسالفة باسبوع عرضت لهم مشروع وطلبت تنفيذه بفعالية خارجية

راحوا يوم ومافعلته لسبب معين , على اساس بكون معهم اليوم الثاني وفجاءة قالت مابنكمل مافيه اي تفاعل .. للاسف ضاع المشروع مع هالقرار , وسكتت وقلت خلاص بخليه لهم بعدين ويقدرون يسوون باي وقت ثاني , عموما بعد ماصدمتني بردها باخر اسبوع ونص اضطريت اغير خططي للمرة الثالثة

وقبل لا اكمل بموضوع الخطة الجديدة ودي اقولكم انه بالاسبوع الاول لما كان مسحوب علي وتقريبا محد يعرفني الا موظفة التسويق وتقريبا هي داومت معهم قبلي بشهر ومحد عرفها الا بعد ماطلعت مديرتها اجازة " الفترة اللي انا جيت فيها " ومرة كلمتها اني بشتغل معكم وان الوضع فوق عندنا خياس وو

قالت يامعاذ روح للمدير الاداري وانه كويس ووو , حسيت الموضوع غبي وماينفع اروح واقوله ولابغيت احرج مدير التدريب معي ولاسمعت كلامها , عموما بعد ماجحفلتن مديرة التسويق بكلامها كنت قبلها بكم يوم شفت المدير الاداري وسلم علي وعرف اني متدرب وطلب اني اشيك على جهازة وخلصت موضوعه

وطلب مني امور ثانية وكان الشغل معه متعة وشخص فاهم والاداري اللي الكل يتمناه , عموما قررت بعد اللي صار اني اعطيه خطة عشان نطور قسمنا وباللي اقدر عليه اعطي موظفة التسويق اللي اثق في شغلها الخطة حقت قسمهم , قعدت اخر اسبوع ونص اشتغل يوميا بالبيت على مشاريعي وبالدوام اكمل الدعم الفني

استمريت على هالوضع , وقبل اكمل ودي اشرح لكم التنظيم الاداري بالنسبة لي عشان تستوعبون , بالبداية كنت مرتبط مع مدير التدريب مباشرة وكان سعودي , بعد اسبوعين نقلوا موظفة من قسم الى قسم التدريب عندنا وصارت مساعدة له تقريبا او هي اللي مسكته بشكل اكبر بحكم ان مدير التدريب دكتور بعد

فكان التنظيم الاداري كذا : انا - الموظفة الجديدة - المدير , وتعتبر هي كتنظيم اداري اعلى مني وممكن ارجع لها لو احتجت شي بحكم انها مساعدة المدير او تقريبا هي اللي ماسكه الجزء الاكبر من الشغل , وبعد كذا نجي لقسمنا , انا - الزعول - الغثيث .. وبما اني مزعل خوينا هذاك وهو بإجازة بعد

والمدير الغثيث ناشب بحلقه انا ومخلي كل احد يغثه لذلك يحاول قدر الإمكان يتجنبني والجانب الإداري كانوا رهيبين ومعطيني راحتي فلذلك تقريبا كنت اشتغل بدون اي ادارة كل هالفترة واسوي اللي ابيه واللي ببالي بدون مايغثك احد عشان " اسرار الشركة " او غيره .. عموما تقريبا باخر ثلاث أيام

جيت الدوام وكان هالمنظر خلف كرسيي بالمكتب , مادري انزل اسفل به او اخربه معه او مادري وش اسوي - طبعا المدير المتخلف هو اللي قال حطوا الاغراض هنا , مدري ليه مايجمعهن بمكتبه - , جاني اتصال ونزلت اخلص بعض المشاكل وهديت شوي لذلك طنشته ولاكلمته بالموضوع ابد , كل اللي سويته

اخذت عفشي ونزلت عند مديرتي تحت كاني اصلح اجهزتهم وقعدت اصلح جهازهم ثلاث ايام لين خلص تدريبي وانا متكي عندهم وصراحة ماقصروا كانوا مستقبليني بصدر رحب ومنها كنت اساعدهم بالشغل, عموما قبل اخر يوم تدريب ارسلت ايميل للمدير الاداري به كل التفاصيل الخاصة بالخطة وطلبت منه يحدد موعد اجتماع

معه ونفس الكلام مع موظفة التسويق , جيت اخر يوم وقعدت مايقارب الاربع ساعات بين الاجتماعين وكانت ممتعة ممتعة ممتعة جدا , المدير الاداري تمنيت لو جيته قبل , العمل معه متعة وهو المدير اللي الكل يتمناه .. اليوم الاخير كان ختامية جميلة جدا , كل شي خططت له وكل مشاريعي

اللي توقفت بسبب " اسرار الشركة - مركزية العمل- الخ " ذكرتها وشرحت كل شي لهم , ردة فعله خلتني اندم واتحسر اني ماجيته من بدري .. عموما داومت بعده بيوم وخلصت اخر اجتماع معه وودعتهم وانتهى تدريبي والتعاون بإذن الله بيستمر معهم اذا فيه إمكانية بالنسبة لي لكن بشكل غير رسمي

التجربة كانت مليانة تحولات واحداث وحاولت اختصر قد ما اقدر واطلع بشي ممتع للقارئ خصوصا وانه مافيه اي شي كبير بمجال التخصص واللي فيه ما اقدر اذكره للاسف , ولكن تعلمت ان السعودي مهما كان زبالة فهو غالبا افضل من الاجنبي بمراحل , تكاتف السعوديين شي يٌدرس ويحسسك بالفخر , بإختلاف

الاقسام والتخصصات والوظائف والمسميات السعوديين غالبا كنا مع بعض , عملت مع اشخاص رهيبين والعمل معهم لحاله متعة , تشرفت بالكثير من العلاقات وكانت تجربة ثرية ولو اني ماتعمقت فيها بتخصصي بسبب العوائق الكثيرة ولكن بالمقابل طلعت بفائدة عملية كبيرة ولله الحمد

تركت تفاصيل كثيرة منها الممل ومنها اللي ما اقدر اذكره , حاولت اختصر واكتبها باسلوب رهيب , حاولت اتكلم بلهجتنا بدون ما ادخل العربي الفصيح معها .. اعتذر لو فيه اي أخطاء إملائية او غيره , واعتذر لو كنت ممل او تعمقت بتفاصيل مالها معنى .. بيئة العمل بالمستشفى كانت طاردة

ولكن فيه اسماء دامها موجوده المستشفى ماعليه خوف بإذن الله والعمل معهم متعة وشرف , دائم لاتلتزم بخطة وحدة وخل خطتك فيها مرونة فممكن يصدمك اللي تثق فيه او ممكن تتغير التنظيمات فجاءة او غيره , بهالتجربة عرضت شغلي على اللي اثق فيهم وماصعدت لرأس الهرم , تطوير القسم ماعرضتها على مديري

عرضتها على اللي اثق فيه , التسويق عرضتها على موظفة وماهو مديرة القسم .. اثق فيهم وفي شغلهم وبإذن الله بيستمرون بالتطوير والإبداع .. تجربة ثرية وممتعة وجميلة بظل وجود كل هالسوء اللي فيها الا اني استمتعت بشكل كبير , شكرا لكل شخص ساهم وكان سبب بعد الله سبحانه في إتاحة هالفرصة لي

ودي امنشنهم واحد واحد واشكرهم سوا كانوا من اللي اشتغلت معهم او من اللي كانوا سبب لإتاحة هالفرصة الرهيبة لي .. تفاصيل كثيرة ونقاط تعمدت اتركها حفاظا على سرية المعلومات ، حاولت اكتب الشي اللي ممكن يفيدك كقارئ سوا لك بالتقنية او لا وبطريقة ممتعة

اعتذذذذر جدا لو اطلت او نسيت شي او كان التسلسل غبي او كررت كلامي اكثر من مره .. واعتقد ان اللي قالوا لي اكتب متحسفين الحين ??‍♂️? .. اتمنى تستمعون بالقراءة واي استفسار بالخدمة ?♥️
- انتهت

@Rattibha رتبها لو سمحت

لقراءة اسهل واريح :
rattibha.com

rattibha.com

ثريد دسم بالطريق " خلاصة شغل 3 اشهر "

اول ما انتهى التدريب كان فيه خطة اني اشتغل معهم بشكل غير رسمي مع ثلاث اقسام ولكن للاسف بعد مايقارب الشهر وعليها , المدير الاداري واللي كان ماسك موضوعي رجع يشتغل بوزارة الصحة وبعده بفترة موظفة التسويق اللي كنت شغال معها تركت المستشفى فتقريبا انتهى هالموضوع بهالبساطة ..

عموما بديت مشروعي بمنتصف شهر اكتوبر بعد ما موظفة التسويق مسكت حسابات التواصل الخاصة بالمستشفى ومسكت ادارة التسويق , وكان الهدف اني احلل اداء القسم بعد مامسكته ومنها يكون جزء من شغلي اللي كنت بشتغله معهم وكملت هالمشروع حتى بعد ما راحت فرصة الشغل معهم وحتى بعد ماتركت الموظفة العمل

وبعرض لكم خلاصة الثلاث اشهر واداء القسم في الربع الاخير من 2019 .. او تقريبا اخر شهرين ونصف -3 شهور وببدا استعرض احصائيات الحسابات واحللها هنا .. يوضح الشكل هذا احصائيات حساب تويتر والزيادة بعدد المتابعين والتغريدات في الفترة من 20 اكتوبر - 28 ديسمبر , مع التنبيه على انه من بعد

25 اكتوبر كانت الحسابات مع شركة تسويق والفترة اللي قبلها ماسكينه نفس قسم التسويق وطبعا النتائج كارثية كارثية والحساب يعتبر فشل , فشلاً ذريع بعد ماحقق فقط 27 متابع زيادة وبمعدل 1.35 تغريدة لكل يوم

اما بالنسبة للانستقرام ماكانت النتيجة بعيدة عن تويتر بعد ماحقق فقط 23 متابع زيادة ومعدل 1.45 بوست لكل يوم

الاشكال هذي توضح تفاصيل كل شهر ومقدار الزيادة .. مع التنبيه على انه الزيادة في عدد المتابعين للربع كامل تختلف عن مجموع الزيادات لكل شهر لاني احسب الفروقات كل نهاية اسبوع وبعض الاحيان تكون بعض الايام خارج حسبة الشهور ولكن موجودة بالحسبة الاخيرة للربع الكامل+ السناب مو شغال شهر 10

نلاحظ بهالشكل زيادة كبيرة بالمعدلات لشهر نوفمبر بالمقابل زيادة طفيفة باعداد المتابعين ماتجاوزت 12 متابع على مستوى الحسابين كامله مما يدل على تفاعل سلبي وبلا معنى " مزعج"

3 اعلانات للمشاهير طوال الربع كامل وكلها بلا معنى لعدة اسباب ,منها :
1- كل الاعلانات على نفس المنصة
2- ماوزعت على الشهور بشكل متساوي
3- الاعلانات عامة وماركزت على افضل ماعند المستشفى او اهداف المستشفى والخ..

بالنسبة للعروض كانت بمتوسط 2.66 عرض لكل شهر وركزت بشكل كبير على عيادتي التغذية والنساء والولادة .. فقط عرض واحد من اصل 8 عروض كان بمناسبة حملة " يوم عالمي او غيره " البقية بتوقيت عشوائي .. نوفمبر كان الاكثر عروض ولكن اقتصر على عيادتين فقط " تغذية ونساء وولادة"

أكتوبر الافضل بعرضين متنوعة وواحد منها متزامن مع حملة مقامة وكل العرضين يستهدفون شريحة كبيرة ومتنوعة من المجتمع , اما ديسمبر بالعرض الاقوى وبرنامج كامل + عرض تسليكي (تنشيطي )

خريطة توضح اماكن ومناسبات وتواريخ حملات الربع الاخير من 2019 .. ويوضح الشكل اعداد الحملات وتوزيعها بالنسبة للشهور وبمتوسط 2.33 حملة لكل شهر

ونلاحظ المناطق الحمراء توضح تواجد 4 حملات بنفس المكان .. حملتين - حملتين
ثنتين من هالحملات اقيمت بنفس المستشفى (نسبة انتشار اقل )

وتوضح المناطق الحمراء بهالشكل الحملات المقامة لنفس السبب " المكررة" وهي 4 حملات اي مايشكل 57.14% من اجمالي الحملات

الشكل هذا يوضح الحملات بالنسبة للاماكن العامة " المزدحمة وله قابلية انتشار اعلى " من اصل 9 اماكن قدروا يغطون 4 اماكن مايشكل نسبة 44.44% من اجمالي الاماكن , اللي عليه اكس هذا غطوا مكان قريب منه جدا ( احتمال الانتشار بنفس المكانين متقارب )

بالنسبة لي هالشكل ماهو دقيق ابد ولكن حطيته .. مع انه مايناسب مدينة زي حائل صغيرة ولكن لو قلنا كل مكان بيغطي مساحة قريبة منه " نسبة انتشار محتملة " فتقريبا بتكون بالشكل هذا وهي نسبة جيدة جدا مع انها ماتغطي جزء كبير من جنوب وشرق حائل ولكن تغطية زي كذا خلال 3 اشهر تعتبر ممتازة

التوصيات المقترحة ل 2020 :
الربع الاول " تحسين اوضاع " :
- زيادة 25 متابع شهريا لكل حساب بمعدل تفاعل 1.0 لكل يوم
- مالا يقل عن حملتين واحدة منها جنوب حائل " نسبة الانتشار المحتملة اكبر "

الربع الثاني " موسم الزواجات " :
- زيادة 100 متابع شهريا لكل حساب بمعدل تفاعل 0.75 لكل يوم
- مالايقل عن 3 حملات ,ثنتين منه شرق وجنوب حائل " نسبة انتشار محتملة اكبر "
- عروض تجميل وجلدية متزامنة مع اعلانين مشاهير , واحد سناب والثاني انستقرام " ميكب ارتست حق الانستقرام "

- عرض تغذية واحد متزامن مع وحدة من الحملات
- عروض اسنان " تجميلية بشكل اكبر " متزامنة مع اعلان مشهور عام , سناب او انستقرام

الربع الثالث " العودة للدوامات " :
- زيادة 75 متابع شهريا لكل حساب بمعدل تفاعل 0.50 لكل يوم
- عروض تحليلات عامة " فيتامين د والخ .. "
- حملة وحيدة بالتزامن مع يوم عالمي " شمال حائل " نسبة انتشار اعلى في حال افتتاح المشاريع المقامة شمال في حينه

الربع الرابع " موسم الشتاء " :
- زيادة 50 متابع شهريا لكل حساب بمعدل تفاعل لايتجاوز 0.60 لكل يوم "يفضل الابقاء على معدل 0.50 لكل يوم "
- عروض تشمل جميع الاقسام
- 6 حملات , وحدة منها بالتزامن مع لقاح الانفلونزا الموسمية
اعلانين الهدف منها ابراز المستشفى واهدافه على اي منصة

النتائج المحتملة :
-750 متابع اضافي لكل حساب
- معدل تفاعل ثابت 0.50 لكل يوم مع بداية الربع الثالث
-تكثيف العروض على الجلدية والاسنان خصوصا في الربع الثاني
- 12 حملة بمتوسط حملة لكل شهر تشمل جميع اماكن الازدحام والتجمعات " نسبة انتشار محتملة اكبر "
5 اعلانات للمشاهير , 3 منها

لرفع نسبة الزيارات اثناء الربع الثاني , والاثنين المتبقية لرفع الزيارات مع نهاية العام والتعريف بالمستشفى وجديدها للتجهيز للربع الاول من 2021 " ماقبل موسم الزواجات "

ختاما : هالثريد مجهود شخصي وماهو مبني على اي اساس علمي بداية من طريقة جمع البيانات مرورا بتنقيحها وتصفيتها وصولا لتحليلها وعملية تصويرها وعرضها , الموضوع كله اني استمتع بالشغل على البيانات والتحليل بطرق بسيطة جدا واحاول اوضح بعض من افكاري .. احس اني طولت وتفلسفت واجد صراحة

لكن ما اخفيكم اني استمتعت جدا جدا وانا اشتغل طوال هالثلاث اشهر الماضية صح انه كان يربطك وغثيث خصوصا وقت جمع البيانات ولكن كانت تجربة ممتعة ورهيبة وتعلمت منها كثير .. ودي اكمل ل 2020 لكن الموضوع صعب و12 شهر طويلة ومتعبة لذلك اتوقع باكتفي هنا وبركز على امور ثانية ..

اللي يحب #البيانات وسوالفها اتمنى انه يستمتع بكلامي وتوصياتي وتحليلي لكامل النقاط وشاركوني ارائكم ومقترحاتكم , واللي وده يختصر هذا التقرير كامل : create.piktochart.com
وهذي صورة منه بعد

create.piktochart.com

بالنسبة للادوات المستخدمة :
piktochart.com
Google maps
استخدمها بعملية #تصوير_البيانات فقط .. الباقي مجرد ملف وورد عادي سجلت فيه البيانات حسب الترتيب اللي كان مناسب لي وبعدين صفيتها بطريقة بدائية وبسيطة واستخدمت الادوات اللي فوق لعملية التصوير ونشرتها هنا

piktochart.com

اتمنى انكم استمتعوا بهالثريد مهما كانت تخصصاتكم واهتمامتكم .. وشكرا

@Rattibha لو سمحت

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة