ثريد: ايه اللي لازم تعرفه عن عودة زحل … #ابراج #خرائط_فلكية
١. يعني ايه عودة زحل؟ ببساطة هي عودة زحل لنفس درجة وبرج زحل تبع خريطة ميلادك واول عودة بتمر بيها بتكون علي نهاية العشرينيات وبيبقي ليها اثر كبير علي مرحلة الثلاثينات في حياتك. واهم عودة لزحل بتكون الاولي لأن الشخص ببساطة بيكون مقبل علي فصل مختلف تماماً من حياته.
٢. بعيداً عن الدراما اللي بتتقال عن عودة زحل واللي بيحصل خلالها خلينا نركز شوية علي المرحلة العمرية اللي شخص بيكون فيها وكم التغيرات اللي بتبدأ تحصل في حياته. ٢٨، ٢٩ سنة اكيد طاقة مختلفة لأن في النهاية نظرتك لحياتك ومستقبلك بيبدأ يختلف ويبقي اكثر جدية.
٣. لو هتسأل عن قناعتي الشخصية هقولك اني مؤمنة "بالانسان" في اي وقت ومكان واي مرحلة عمرية وامكانية انك تتعلم دروس معينة او تمر بتجارب صعبة مش دايماً مرتبط بعودة زحل ولكن ده لا يمنع ان مرحلة عودة زحل ليها تأثير ونكهة مختلفة علي الجميع حابة اننا نتكلم عنها و نتعمق شوية فيها.
٤. اولاً لو انت مقبل علي عودة زحل الاولي او انت بتمر بواحدة بالفعل لازم تشوف وضع خريطتك كويس وتحديداً "زحل" هل مثلاً اتصالات زحل مهيمنة في خريطتك؟ لو اه هل الاتصالات دي سهلة/صعبة؟ في اي بيت في خريطتك الكلام ده هيحصل والاهم ايه هو وضعك وظروفك و طبيعة البيئة اللي انت عايش فيها؟
٥. الاسطورة بتقول ان زحل بيعاقب اللي يعمل وحش ويكافئ اللي يعمل كويس وده حقيقي الي حد ما لأنك بتلاقي ان عودة زحل بترتبط بنجاح ساحق لبعض الاشخاص وفشل غير متوقع لغيرهم وتقدر ترجع لخرائط مشاهير كتير وتشوف خلال المرحلة دي الطاقة دي بتشتغل ازاي بالظبط وازاي تأثيرها بيختلف من شخص لشخص
٦. عادةً الشخص اللي بيعاني اكتر خلال عودة زحل هو الشخص الحامي اللي صبره قليل واللي مش بيحب يبذل مجهود من الآخر ولذلك بنقول ان الاشخاص اللي عندها هيمنة لزحل واتصالاته نسبة تحملها وادائها بيكون افضل ولكن دي مش قاعدة لأن في جوانب تانية لازم تحطها في الاعتبار وقتها.
٧. خلال عودة زحل الاولي لا مجال للهرب لأن حرفياً دي المرحلة اللي مخاوفك بتطلع تجري وراك فيها وتقولك واجهني ولذلك اشخاص كتير ممكن تكتئب خلال الفترة دي او تنعزل لأنها بتحس انها محتاجة تعيد ترتيب اولويات كتير في حياتها ففي زي يقظة روحانية جميلة حقيقي بنشوفها هنا.
٨. الفكرة ان زحل معلم حازم فهو لازم يخليك تواجه حقيقة وضعك لازم ينبهك، انت بتبدأ تكبر، هتبدأ خطوط وشوية تجاعيد بسيطة تظهر، احتياجاتك، رغباتك وحتي صوتك وتعبيراتك هتختلف ودي عمرها ما هتكون حاجة مخيفة او حزينة دي اشارة انك لازم تستغل نضجك وطاقتك في شئ عليه القيمة ويستحق وقتك.
٩. عودة زحل بتفكرك انك مش هتفضل صغير للابد، وانك محتاج تبذل مجهود لو عايز تنجح او تلاقي شغل مستقر او علاقة كويسة. ماينفعش تفضل عايش بنفس العقلية والنمط وعشان تفهم ده لازم تمر بتجربة مختلفة، تحصلك حاجة جديدة ورجاءً بلاش تصنفوا اي تجربة او حدث خلال الوقت ده علي اساس انها "سلبية"
١٠. لو انت في علاقة فاشلة خلال مرحلة عودة زحل توقع انها تنتهي، لو انت مخدوع في صديق لازم هيظهرلك جوهره خلال عودة زحل، لو انت مش مرتاح في الشغل بنسبة كبيرة هتسيبه او تستقيل خلال عودة زحل. في درس لازم تتعلمه في النهاية لأن انت مش عيل خلاص ولا تستحق انك تتعامل بالطريقة دي.
١١. خلال عودة زحل مش دايماً بيحصل سلبيات، في البداية الوضع بيكون صعب ولكن علي نهاية المرحلة بتحصلك اجمل حاجة في حياتك وبيتم مكافأتك بشكلاً ما والاهم من كل ده هي اليقظة والجمال اللي بتكتسبه من المرحلة دي اللي عادةً هتحس بيه بعد انتهاء المرحلة و مش خلالها.
١٢. عودة زحل هي علامة انك بتكبر وان الحياة مش للابد زي ما كنت متوقع وان في ناس كنت متخيل ان صعب تروح بس للاسف راحت وان يمكن في منتجات وعمليات للحفاظ علي شبابك للابد لكن الحقيقة ان الوقت اقوي منها وان في نضجك جمال لا يمكن انكاره. عودة زحل بتعلمك تقدر وقتك وتقدر نفسك اكتر.
١٣. سواء مقبل علي عودتك الاولي او بتمر بيها استغلها علي قد ما تقدر و حاول تقلل مقاومة، استسلم للتغيير واشتغل علي اللي كان لازم تشتغل عليه من زمان لأن مش عيب انك تفشل او تنفصل او تخسر لكن العيب انك تكبر وانت بتكذب علي حالك بدون شجاعة علي خلق التغيير. وحقيقي من اهم الفترات.
١٤. في فيلم ل Julia Roberts اسمه eat, pray, love بعيداً عن انه من افلامي المفضلة بس شخصية جوليا في الفيلم ده وتطورها بتشرح طاقة عودة زحل بشكل رائع وكمية التسامح والنضج اللي بتشوفها في الفيلم ده بتمثل الطاقة بشكل يجنن فلو حد فيكم مهتم يتفرج علي الفيلم وهيفهم قصدي.
في النهاية اتمني للجميع النهارده مش بس يوم جميل ولكن "رحلة سعيدة" الحياة مليئة بالقصص وبالابطال اللي بيحاولوا كل يوم ومش بس اوقات عودة زحل. حب رحلتك، خليك مؤمن بقصتك واوعي تقبل بشئ اقل مهما كانت الظروف وافتكر انك هتفضل دايماً بطل حكايتك 🌟
لكل اللي بيسأل عن عودة زحل ☝
جاري تحميل الاقتراحات...