ثريد عن إستقالتي من الجامعة الوطنية.
طبعاً انا زي أي طالب أستقال من الجامعة دي، عشان الظلم و سرقة القروش والإستغلال الحاصل فالإدارة والجامعة كلها، والمشكلة انه في طلاب كثار مقتنعين انه الجامعة الوطنية هي أفضل جامعة فالسودان ???.
انا دخلت طب و جراحة، تخصص احبه و داير ابدع فيه و بالفعل درست و شديت حيلي و امتحنت و كل حاجة، لاكن للاسف انظلمت بالدرجات. قلت ما مشكلة، عندي ملاحق. و امتحنت الملاحق ولاكن رسبت في 5 مواد.
طبعاً ح تقولون لي غبي و غلطان عشان رسبت في 5 كورسات. طيب راح اعطيكم أسباب منطقية.
أولاً: الجامعة كانت شغالة وقت المظاهرات و فض الاعتصام و كل الأحداث الحزينه اللي حصلت فالسودان. (مدنييياااااوووو)
ثانياً: النت كان قاطع فترة الامتحانات والملاحق، يعني مافي طريقة ارجع للنت أترجم او اشوف شروحات او اَي حاجة. و في كورسات ماكان يدو محاضرات. يعني مادة اول مرة ادرسها ف حياتي مستحيل افهمها براي.
ثالثاً: الجامعة بدأت الملاحق بعد فض الإعتصام ب يومين او ثلاث، يعني لما كنت ماشي ل إمتحان الملحق كان في تاتشر دعم سريع لاحقني و انا جاري. زبدة الموضوع انه الجامعة ما تهتم ب طلابها ابداااااااا، دايرين القروش لا اكثر.
طبعاً ح تقولو انه انا باطل و ما اعتصمت والحصة وطن، حقكم علي لاكن لما تدفع 8000$ (عشان انا عراقي) او (اجنبي)و انت عندك فرصة واحده عشان تمشي سنة ثانيه وقتها ح تعرف انه انت مستعد تعمل اَي حاجة. ترى كنت اطلع مواكب و مظاهرات ويشي ???. بس فترة الملاحق دي ما سمحت لي.
يلا بعد ما عرفت انه راسب ف 5 مواد الجامعة قالت انهم ح يعملو ملاحق مرة ثانيه، هي حاجة كويسه لاكن ما ح يكون في عدالة بالموضوع. هم دايرين قروش الملاحق بسسسس. و على فكرة عشان تمتحن الملاحق لي لازم تكون دافع قسط السنة الجديدة. غباء صح؟
ليش ادفع قسط السنة الدراسية الجديدة عشان امتحن الملاحق؟ يعني ما عارف اذا ح انجح او ارسب فيها. و هذا النظام طبقوه السنة دي. والمشكلة انه ما ح تقدر تعمل اَي حاجة فالجامعة الا اذا دفعت قسط السنة، مهما كانت معاملاتك. يعني انت قاعد فالجامعة سااااي.
تخيل معاي انك دافع 8000$ عشان تمتحن ملاحقك و لا سامح الله ترسب. و يوم تكون داير تستقيل و تسحب القروش من الجامعة يا اما يشيلو مبلغ منها او ما يرجعوه زاتو. حتى لو قال رئيس الجامعة ح ترجع لك القروش كامله، الواحد يكون ما واثق.
يعني انا عشان اقدر امتحن الملاحق بدون ما ادفع القسط جبت صاحبتي عشان تحنكه (اشغالك ما ح تنتهي الا اذا لبست طرحة) و كلمت المسجل و وافق امتحن الملاحق بدون ما ادفع القسط و دفعت رسوم الملاحق، و يا ليتني ما دفعت.
يوم السبت كان عندي ملحق الBiochemistry، الدكتورة قالت لي أمشي للمسجل عشان اجيب ورقة الحضور للامتحان، مشيت و جبت الورقة و ما لقيت اسمي موجود.. كلمت المسجل قال "ما ح تمتحن عشان ما دفعت قسط الجامعة". طيب والكلام اللي قلته؟ قال "ما أتذكر و أصلاً ما حصل"
يعني زي ما شايفين في نصب كبيييييررر فالموضوع عيني عينك. حاولت اشوف لي حل لاكن قلت ل نفسي استقيل و اريح راسي، ليش أهين و اتعب عشان جامعة نصابة؟
انا بس حاب أنبهكم انه اللي ناوي او يفكر او انقبل او يعرف حد ماشي الجامعة الوطنية نصيييييحةةةةة ما تمشو، لان ح تتمرمطو و تتجرحرو و تعيشو حياة سوووودددااا. تمشي جامعة نظامها صعب الف احسن من انك تكون مظلوم و مكتئب 5 سنين. و بالتوفيق للجميع ♥️.
الحاجة المزعلاني شديد انه احتمال كبير اترك السودان ???? و انا ما داير اترك البلد دي ابدا، ما داير اترك اصحابي و المواقف والذكريات اللي حصلت هنا. صراحةً أجمل شعب ممكن الواحد يعيش معاه ♥️.
و دبل فك للعسكريه والجامعة الوطنية والكيزان و كل واحد ناوي شر للسودان، و نقول مدنيييااااووووو ?????.
للمعلومة: دي 10٪ من الجوطة اللي حصلت لي فالجامعة الوطنية، والليلة بعد ما استقلت و مشيت استرجع قروش الملاحق اللي ما امتحنتها قالو لي لا :) يعني قرصنة عيني عينك.
جاري تحميل الاقتراحات...