رتبها

قررت نحكي !
زمان في عمر العشرين كنت مرفهة بشكل لا يمكن وصفه ، كانت حياتي عبارة عن دراسة ، مطاعم ، ثياب جديدة ، سيارة جديدة و ما نعرفش شن يكون الهم و لا البكاء

بعد نكبة ١٧ فبراير الثورة " اللعينة " اصبحت كلمة حثالة الشعب " هي العليا انقلب الحال ١٨٠ درجة و بديت نعرف شن معناها الواحد يمرض من الهم

تفكرت كيف كنت عايشة مرفهة من غير ما نحمد الله و كيف كنت نبطر بالنعمة و كيف كنت آمنة في سربي معافى في جسدي و كيف كان يومي كله يمر علي من غير ما نحمد ربي ع الي اني فيه

نقطة التحول كانت سنة ٢٠١١ بداية اللعنة الي كتفت كل شريف ما يقربش في مال الحرام و نقدر نقولكم ان من ٢٠١١ إلى ٢٠١٩ كانوا فاقد في حياتي

باختصار شديد ٨ سنين مشوا في حرق الدم و النكد ، زهرة شبابي ضاعت في الكفاح عشان " طموحات و أحلام " تعتبر حقوق مشرعنة في دول أخرى

و وصلنا لمرحلة أنك تبي بنزين ؟ شد طابور يستمر من ساعتين إلى ٨ ساعات تحت شمس حارقة / تبي تسافر ؟ لازم تكون عندك واسطة قوية او تدفع مبلغ و قدره !

تبي تطلع تتفسح ؟ الا و ما تلقى ولاد الحرام يخربولك فرحتك ! / تبي ضي ؟ مش ح تلقاه لان اغلب الوقت منقطع و المكيف عندنا شبه حلم

تبي معاشك الي خدمت عليه بعرق جبينك ؟ اوقفي ٦ ساعات او اكثر عشان يتمننوا عليك بربع او نص معاشك بحجة نقص السيولة و ولاد الحرام يخشوا قدامك يطلعوا بالفلوس بورزات بورزات

القصة ما وقفتش لهني و مش ح توقف ،،، سنة ٢٠١٨ جي رجل يخدم في الجمرك و اقسم يمين مغلظ ان في عصير اطفال خش للبلاد مسرطن بنسبة ١٠٠٪ و وقفاته هيئة الرقابة الغذائية

لكن الشخص الي مستورد العصير استعان بشياطين الإنس " المليشيات " و دخلوه لميناء طرابلس و باعوه خلال أيام و وقتها عرفت ان أزمة ليبيا ابلغ و أعمق من محض " بنزين و كهرباء "

سنة ٢٠١٧ في مستشفى طرابلس الطبي تسرب مقطع فيديو لأمهات داخل المستشفى يجروا في الممر و يبكوا بكاء التمست فيه نبرة " القهر " و تبين بعد مدة ان

ان الممرضات حقنوا أطفالهم بدواء فاسد تسبب في تدهور حالتهم الصحية كمرضى سرطان و نتفكر بنت صديقتي لما حكتلي ان جلد بنتها محروق و يتفترش

فأنا سألت اختي و قالت لي انها حضرت احدى المؤتمرات الي تكلمت عن دخول كميات كبيرة من دواء الأطفال فاسد و فعلا بمجرد ما غيرت الدواء حالة بنتها اصبحت ممتازة

بداية ٢٠١٩ انتشر قول عن ان المليشيات مهددين وزارة الصحة من انها اطلع اي احصائية حقيقية لمرضى السرطان الشئ الي يخليك تستغرب علاش ؟

نرجع بيكم لسنة ٢٠١٦ السنة الي تعاركوا فيها قبيلتين و طبعا نحن كشارع كنا لا ننتمي للقبيلتين تخيلوا ان وحدة من القبائل هذي كانت تضرب من شارعنا

و كانت القبيلة الأخرى ترد عليها و المتضرر حني ، كنت على تكاثف النيران نحاول نقنع خوي اني نبي نقعد معاهم و لكنه اصر اني نطلع مع خواتي ، كنت وقتها نبي نموت بطريقة شرعية لان الانتحار ابعد على قلب المؤمن بعد المشرقين

و حني في الطريق ساعة واحد في الليل ماشيين سيارتين معانا ماما و خوتي و خواتي و نساوين خوتي ، و في نص الطريق طلعولنا زوز ملثمين شهروا سلاحهم على سياراتنا

و وقتها السيارتين على لسان رجل واحد نعيطوا بأعلى صوتنا :
" عيلة ، عيلة ، وقفواااا " نزلوا سلاحاتهم و وصلنا بأمان و الشابين جي من قتلهم في مكانهم

نهاية ٢٠١٦ كانت ماما تعالج في عيادة خاصة من مرض السرطان ( و انتم عارفين ان المرض هذا يبي نفسية مرتاحة ) و خشوا عليهم مجموعة من المسلحين و قتلوا كل الجرحى الي في المستشفى

الي لابسين عسكري و الي كانوا في الجبهة ضدهم و يمكنكم ان تستشعروا وقع الرصاص على من يقارع الموت على ساحات الأوجاع !

من حاجة شهر كنت نتابع في بنت سعودية كانت مسجونة في وحدة من السجون النسائية و كانت لما تتكلم ع أيامها في الحبس و كيف انه عندهم مكيف و تلفزيون و كتب نتمنى ان يحبسوني بدلها

رديت عليها بطريقة فكاهية ان يا ريتني بدلك هههه ! هي تعتقد اني قلتها من باب مزح لكن الواقع كبر على أناملي أن تخط الواقع بصيغة درامية فتزيد علي أوجاعي أوجاعا أخرى

كان خاطري نكمللكم باقي الأحداث ، اقل شيء نحكيلكم ع سلسلة الاغتيالات الي طالت ٥٣٢ جندي من خيرة ابناء الوطن ، و نحكيلكم اول غرفة عمليات قطرية ليبية سنة ٢٠١١

و نكمل نحكيلكم ذبح داعش لشابين كانوا يحرسوا في المنشآت النفطية ، و الأب الي قتلوه قدام صغاره و نكمل نحكيلكم بالتفصيل عن ١٢٠ قتيل في ساعة وحدة من خيرة شباب ليبيا في معسكر توكرة و ٤٢ الي تم تصفيتهم بدم بارد من بينهم زميلة

لكن ، خلوني نختم فائدتين عظيمتين أولاهما : ان الترف مع التسخط و إن طال الزمان ستنقلب إلى نقمة لذلك احمدوا الله كثيرا على نعمة الأمان

و ثانيهما : ان الحاكم و ان جلد ظهرك و أخذ مالك لا تفكر يوم ان تخرج عليه او تشتمه لانه ببساطة بفضل الله ثم هو شاد عليك شر مستطير و إنا لله و انا اليه راجعون !

فلوس الليبيين