دا ثريد للرد عن الاسئلة الشائعة عن السفر عبر الزمن و السياحة الزمنية و الات الزمن الموجودة فى السوق حاليا ... المعلومات دى مش موجودة فى الويكيبيديا و جوجل فياريت نخلى بالنا
بدئا ذى بدء ، السفر عبر الزمن تم اعتماده رسميا فى الستينات و ابتدى فى مصر بكثرة مع مطلع الثمانينات و شركات سياحة الزمن موجودة بقالها فترة بس كله فى دواير سرية مغلقة دخولها اجرائاته معقدة قليلا بس هنحاول نبسطها
اولا ... السفر عبر الزمن سواء كان بغرض السياحة او اغراض خاصة بالالات الجديدة اللى اصبح بامكان اشخاص امتلاكها بيتطلب استخراج جواز سفر زمنى من وزارة الزمن و هى واحدة من ٤ وزارات سرية فى الحكومة
استخراج جواز السفر الزمنى بيتطلب بطاقة رقم قومى و ٥ صور شخصية بالحجم الطبيعى و استمارة فيش و تشبيه و وصل نور او ميه و اقرار من المتقدم بالحرص على سرية الأمر نظرا لخطورته على العوام
بعد كدا و على حسب انت عاوز تسافر لفترة زمنية مقدارها قد ايه بتكون التأشيرات ... فيه اغراض ممكن تسافرلها على طول من غير تأشيرات و دى بتبقى الأغراض الشخصية مثلا لو عاوز تشوف نفسك و انت بتتولد او تقابل عزيز ليك توفى و تشوف نفسك و انت بتاخد قرار غبى فى حياتك و هكذا
السفر للزمن مهواش زى الافلام اللى شوهن الموضوع... السفر الفعلى بيكون انك كتواجد فى قلب الحدث بس محدش شايفك و لا سامعك و مستحيل انك تتفاعل... مجرد بتشوف اللى بيحصل فى مكان معين كمتفرج على فيلم ... كدا كدا الماضى ممنوع تغييره و قانون تنظيم الزمن واضح فى النقطة دى
بعد كدا بقى فيه التأشيرات ،.. و هنا كل بلد لها سفارتها اللى بتروح تقدم على تأشيرة زمن و لازم تخدد فيها انت عاوز تروح تاريخ ايه بالساعة و اليوم و هتفضل قد ايه .. عادة لازم تحجز مسبقا فى فندق من فنادق الزمن اللى بتبقى موجودة للفرجة من بلاكوناتها
الات الزمن الحديثة بتاعة الرحلات الجماعية امان جدا يمكن اكتر من الطيارات و حتى الان الحوادث اللى حصلت كان فيها اصابات خفيفة مش اكتر
اجرائات السفر : بعد استخراج الجواز الزمنى و التاشيرات و الحجز بتروح على المطار و بتدخل بوابة ٧ السرية .. دى منها بتطلع منها الرحلات السياحية ...
اكتر الرحلات اللى عليها اقبال حاليا هى : معركة التل الكبير ، سبوع وليم شكسبير ، افتتاح هرم خفرع ، حرب المعيز ، ليلة اكتشاف النار و ليلة اكتشاف الخيار
معلومة قلتها قبل كدا بس احب اكررها هى ان فيه ازمنة و اماكن محظور تماما السفر ليها و هى اى احداث حواليها جدل تاريخى او سياسى او دينى زى مثلا البيج بانج و اكتشاف البليلة و اى حاجة لها علاقة بإسحق نيوتن او عبد الحليم حافظ ... الاستثناء الوحيد هنا بيكون للنقاشين و عمال المحارة
الجزر المخلل هو الغذاء المفضل للمسافرين عبر الزمن و غير مسموح باصطحاب الكلاب او الالات الموسيقية او الارانب الكاليفورنى
مع بداية الالفينات ابتدت تظهر الات الزمن الخاصة و كانت شركة carrot الاميركية اول من صنع الة الزمن المنزلية و لحق بها فيما بعد شركة le temps الفرنسية و شركة لادا الروسية و فى مصر كانت شركة الشمعدان بعد تغيير نشاطها
الات الزمن الشخصية تعمل بالطاقة النووية حيث يتم تشغيلها بزيت نوى البلح الزغلول ٩٥ المحظور استخدامه دوليا الا للأغراض الشخصية مع امكانية استبداله بأى مشروب غازى كالببس او السينالكو
مؤخرا اقتحمت الصين محال صناعة الات الزمن الشخصية و دا عمل انتعاش جامد للسوق دا خصوصا فى المناطق الشعبية خصوصا بعد ظهور فيزبة الزمن و التوكوك الزمنى و دخول فئة جديدة من المجتمع هذا العالم الغريب و المريب
بس اعتقد كدا كفاية عليكم مضطر استأذن رايح اتفرج على يوليوس قيصر محترع السلطة و هو بيتقتل . مع السلاموعليمو
بالنسبة للسفر للمستقبل فدا ممكن بس اللى بيبقى اتجاه واحد فقط ... استخدامه الرئيسي بيكون للى حاطين فلوس فى البنك و عاوزين يقبضوا الفتيدة بعد ٩٠٠ سنة و هكذا
جاري تحميل الاقتراحات...