إذا كان قدامك هدف مرسوم في حياتك وفعلًا رغبت فيه وسعيت له بتجيبه مهما كنت متوقع إنه بعيد لأن الرغبة والقدرة تصنع فارق كبيير بحياتك وبتحولها للأفضل بإذن الله
دائمًا الظاهر بكل الأمور شي ماينحكم بسببه، لاتحكم على شخص من مظهره او لبسه، لاتحكم على حياته ومستواها من الي يصوره، لاتحكم على تفكيره من موضوع واحد، اذا بتحكم على شخص لازم تعرف الي مر فيه وتعب معه والأوقات الي طاح فيها وكيف رفع نفسه
لا تستهينون بالمعروف البسيط، بعض الأشياء تسويها لغيرك ماتدري وش وقعَها عليه وكيف بتأثر عليه وممكن تخلّي يوم واحد صار يوم مميز وحلو بسبّة شي بسيط تسويه له
وقفوا التفكير بعاطفتكم وشوفوا المنطق بتلاحظون أشياء كثير تغيّرت وغالبًا لصالحكم
الإنطباع الأولي شي مهم جدًا ترا، حاولوا قد ماتقدرون يكون الإنطباع الأولي عنكم جيّد لأنه في أغلب الحالات يدوم
ولا تحكمون على شخص من النظرة الأولى او اللقاء البسيط الأول، لأن يمكن تاخذ فكرة سيئة عن شخص مرة كويس أو حتى العكس
دايمًا خل هدفك الأول هو انك تكون أنت الي فوق، حاول قد ماتقدر يكون إعتمادك على نفسك بدرجة عالية، مو عيب تحتاج لأحد لكن العيب انك تطلب أشياء لو اشتغلت على عمرك بتقدر تجيبها، لاتصير عالة على نفسك والي حولك
عزّوا أنفسكم، حطوا لنفسكم قدر ولا تخلون احد يقلل منه، لاترضون الشين على أنفسكم واعرفوا مقداركم عند غيركم والي يقلل منه بعدوا عنّه
لاترضى تعيش بأقل من الي انت تحس انك تستحقه، ولا تعيش تحت رحمة أحد كائنًا من كان، وحط في بالك ان الشخص الأول المسؤول عن حياتك هو أنت، ولاتعيش على هواك دايم لأن الشيء هذا يسبب مشاكل
إذا كان في نصيحة ودي أقولها للشخص المتضايق، بتكون "لاتكبت عصبيتك وغضبك لأنها بتضرك، فرّغها بأي طريقة، لاتفكر بالماضي وأخطائه، أنت الحين بالحاضر وفي صفحة جديدة لازم تعدل فيها أخطائك، لاتختار أشياء كبيرة ومصيرية تحت تأثير الغضب لأنها مابتكون عقلانية بالشكل المطلوب وبتسبب لك مشاكل
لاتصير حقود، سامح لكن لاتنسى، ولا تخلي أحد يجبرك على شيء أنت ماتبيه أرفض بأي طريقة، أحسن الظن وتوقّع الخير من الي حولك لكن بعد خلك حذر، وأخيرًا، عامل الناس زي مايعاملونك وماعليك من نواياهم ولاتشك فيها، أنت خلك بالظاهر والله يتولى الخافي، وأحسن ظنك بالله، وتوكّل عليه.
الماضي السيء مو غلطة او شي تندم عليه لو تعلمت منه درس
بالسابق قلت "النصيحة الاولى حلوة ومقبولة، الثانية شبه مقبولة، الثالثة ومابعدها ز*ق كلامك ونصايحك لانها صارت تغث" لكن هالمرة ودي أضيف وأقول أن طريقة توصيل النصيحة تفرق بعد، سواء كانت الأولى ولا الأخيرة إذا ماكان أسلوبك يالناصح يناسبني برضو احشرها بخشمك سواء الأولى أو الثالثة
الإنسان الناصح دايم يكون مهتم لغيره، لكن وش فايدة الإهتمام اذا ماعرفت توصله او وصلته غلط؟ على طول نتيجته بتصير عكسية وهذي ردة الفعل الطبيعية
مع بداية الشهر الي مليان اختبارات ومشاكل في كلام بسيط ودي أقوله، قبل شهرين من اليوم كنت طايح بمشاكل كثيييير لكن الي ساعدني فعلًا شي واحد، جملة "هذا الوقت سيمضي" لكن مو بس أبيه يمضي، أبيه يمضي وأكون لما أتذكره وأتذكر المشاكل أكون فخور بالإنجاز الي سويته رغم الظروف
لما تكون بوسط ضغط ومشاكل واختبارات اعرف بالتأكيد ان هذا الوقت سيمضي لكن أنت بتحدد كيف سيمضي، بحلطمة ومشاكل يشتتونك عن هدفك ولا بتخطيط وهدوء يساعدونك بالوقت الي لما تتذكر فيه الفترة السيئة هذي تكون فخور بالإنجاز الي سويته.
جاري تحميل الاقتراحات...