من الذكريات تخرجت من الثانوي وقدمت على الجامعة ، إنقبلت تخصص انقلش لكن إختبار القبول فشلت فيه وتم تحويلي للغة العربية ، أول يوم دوام كان الدكتور يتعامل معنا وكأننا حيوانات ما اسمع الا كلمتين حرمان وطرد ? قلت هذا موب مكاني وتركت الجامعة. قدمت على الأمنية وجاني قبول في دفعة ١٤٢٦
كنت مستعد أني أبدا الدورة العسكرية ولكن والدي قال أمنيتي أنك تكمل البكالوريس ورضاي أنك تكمل رجعت وقدمت على كليات القصيم وأنقبلت لغة انجليزية وفعلاً كلمت البكالوريس بعدها اخترت اني اروح دراسه في كندا لمدة ٤ شهور كتقوية للغة، وهنا بدت فصول جديدة من حياتي.
اتذكر اول يوم وصلت فيه كندا عام ٢٠٠٨ كانت هي أول مره أركب فيها طائرة بحياتي لدرجة أني ما كنت اعرف أهمية البوردنق فأول شي سويته بعد ماقصوه لي ودخلت الصاله رميته ?
أول درس تعلمته في الأدب من موظف الجوازات ، تجاوزت السرا وجاني هواش أشد من هواش جدتي لولوه رحمة الله عليها اذا عرفت أن فيه تلفزيون في البيت ، ولكن أنقذني وعلمني أن فيه خط المفروض ما أتعداه لين يقولي موظف الجوازات تعال حتى لو كان ماعنده أحد ?
وصلت العائلة وكل الكلمات اللي أعرفها ، بورك ، سكول ، هوم ستاي . ووصلت المعهد وبعده العائلة علمتني وشلون اروح للمعهد على الباص ولكن واجهتني مشكلة الباص أحيانا يوقفني قدام المعهد واحيانا يوقف قدام ٧ موقف حوالي ربع ساعه مشي. وبصراحة كان قاهرني بحكم أني كنت أأشر له ? ومايوقف
كلمت صديقي فهد الشهري من الرياض وكان الولد متحضر جداً ويفهم مع انه كنا في مستوى واحد في اللغة لكن كانت لديه ثقافة عامة أفضل مني بكثير وشكيت له مشكلتي ، المهم جلس يضحك لدرجة كل اصدقائنا عرفو ان فيه شي. وأخر شي قالي الباص فيه حبل او زر ستوب ويوقف عند المحطه. ?
بصراحة مأخفيكم كنت منبهر جداً من كل شي أشوفة بعيني ولعل واحد من أصعب المواقف هو موقف أبو العايلة ، كان ويكند والرجال عازم أصحابة في البيت وفيه وكانو بوضع غير طبيعي ويحكون مع أم عائلتنا ومع كلامهم كانت فيه كلمة fuck وانا مفهومي للكلمة تعني الجنس وبصراحة وقتها أخذتني الحمية والغيره
قلت الحين أبو العائلة بيتهاوش معهم وبيقول عيب عليكم ، مدخلكم بيتي وانتم تحاولون في زوجتي وكنت أقول في قرارة نفسي لو مد يده عليهم لابد أني افزع معه أكون شهم ?
المهم آخر الليل اكتشفت الوضع عادي وكأن شي ماصار وكل واحد يودع الثاني والوضع جداً تمام. من بكرا رحت لزميلي فهد وشرحت له السالفه وأطلق لقب خصني فيه مازال أصدقائي القداما في الغربة يطلقون نفس هذا اللقب ?
أصدقاء السوء هناك علموني كيف أفتح حساب على الفيس بوك ووقتها كنت أحس نفسي أفضل مبرمج بالتاريخ. ومازلت أحتفظ في الحساب و ٦٠ صديق فقط ? ويمكن لو وضعت جزء من صوري هناك لأصبحت حديث الأصدقاء ?
المهم جداً وبعد عودتي من كندا ، أصبحت شخصاً مختلفا بكل المقاييس ، أرتفع معدلي الجامعي من ٢.٤الى ٤.٨ في السمستر وكذلك لم أعد ذلك الشخص نفسه. أصبحت مهتم بالعمل والتطوير والخ وحتى تخرجت من البكالوريس. بعدها توجهت إلى أمريكا وكل ما أملكه هو مبلغ مشروعي مغسلة الملابس في شارع البخاري
قررت بيعها والذهاب إلى أمريكا وفعلا بعتها بمبلغ ٦٠ الف ريال ، حصل على نصفها شريكي ونصفها الآخر ذهبت فيه إلى أمريكا وهناك بدأت حياة جديدة في مدينة بتسبرغ ولاية بنسلفانيا الأمريكية
في أمريكا كنت شخص فعلاً جاي يرجع بشي مختلف ، لذلك قررت أبدأ اول مشروع في حياتي وهو السيارات. وفعلا صرت أشتري سيارة بمبلغ ٢٥٠٠ دولار الى ٣٠٠٠ دولار واسنعها شوي وأبيعها على اصدقائي ولكن كرهت المشروع بعد ٧ شهور بسبب مشاكل السيارات وفعلاً أعتبر هذا المشروع من أفشل المشاريع حالياً.
المهم بعدها فكرت في العمل كمندوب للباحثين عن المنتجات في السعودية وفعلا عثرت على منتج واحد وكان هذا المنتج عبارة عن هبة في السعودية وهو من منتجات الكيراتين المخصصة للشعر وقررت اني استورده وصرت استورد هذا المنتج ومن إرسال حبة واحدة من هذا المنتج حتى أصبحت أكبر مستورد لهذا المنتج.
وحققت أرقام تجاوزت جميع الموزعين في أمريكا. ولكن كانت لدي قناعة وهي أن صاحب المنتج الواحد سوف يسقط مع سقوط هذا المنتج ?
هنا أصبحت أكثر علماً ونضجاً وتوجهت لأخي عمر @omarilayan36 الذي كان له الفضل بعد الله فيما أنا كثير مما فيه. وقلت له وش رايك نسوي متجر إلكتروني ؟ وفعلا دخلت الفكرة في راسه وقرر يستاجر مقر في القصيم بريدة وهذا هو المقر
فاصل إعلاني ، أعتقد واحد من أهم أسباب التوفيق في حياتي هو وجود هذا الأخ.
المهم أكمل قصتي قررنا نبداء نايس ون وكنت وقتها في أمريكا وأخي عمر في السعودية وفعلا ، سوينا اول مقر في القصيم وبعد ٤ شهور حسينا مقر في القصيم مثل مقبرة في زيلامسي، مهما تكون خضراء وجميلة في النهاية يسكنها أموات ولذلك قررنا الإنتقال الى الرياض ?
إستجرنا أول مقر لنا في شارع الضباب ولو واحد يسألني ليش هناك بقولكم السبب أهلي كانو يستاجرون في شقق لمار لأنها اقرب للفيصلية والمملكة والسوق ? يعني مافيه أي تخطيط للموضوع ويمكن أقولكم قصة المكتب وبناءه لو حسيت قيه تفاعل وناس مهتمه ?
أول ما إستاجرنا المكتب نبحث عن مقاول في الرياض وجانا لبناني المهم قال لعمر أنفذ لك المكتب ب ١٨٠ الف ريال ومن زود البجاحه فيه سوا المخطط حق المكتب بدون عقد ، آي لكان مفكر حاله بس بندفع ، المهم اخوي عمر قرر انه يسوي المكتب بنفسه وكل اللي كلف علينا ٧٠ الف ريال مع التكييف المركزي
فاصل : في الصوره اليمنى كنت كذا كنت اشحن المنتجات لأخوي عمر وفي الصورة اليسرى حجم نايس ون ومعارض آستر للتجميل ❤️
فيه سر تعلمته في التجارة وهو التخصص قبل لا نبداء نايس ون كنا بتاع كله لكن قبل بيوم شخص اقنعني في التخصص وفعلا وقتها خسرت بضاعه ب٣٠٠ الف ريال من أحذية وملابس لكن هذا الشخص حتى اليوم أنا مدين له
وللحكاية بقية.
جاري تحميل الاقتراحات...