قصتي مع المرض المفاجئ .. تحت هالتغريدة
نهاية هالقصة راح أكتب أهدافي من القصة .. قراءة ممتعة :)
نهاية هالقصة راح أكتب أهدافي من القصة .. قراءة ممتعة :)
بدت المشكلة معي تقريباً من قبل سنة كانت تجي كحه قويه وبعدها بفتره كتمه وضيق تنفس فجاءة وتروح وكنت مهملها لأني كنت معتبرها شيء عادي ويروح ومشيت على هالحال إلى تاريخ 1439/10/21هـ ، بدت تقوى هالكتمه لدرجة كنت ما أقدر أتنفس زين وصرت أخذ جرعت أكسجين في البيت بمحلول ملحي
علشان الهواء النقي وبعدها أرتاح وأنام وفي يوم الخميس 1439/10/28 هـ ، صارت جرعة هالأكسجين ما تسوي شيء من قوة الألم وفي صباح الجمعة 1439/10/29 هـ ، قررت أروح للمستشفى وداني أخوي محمد لمستشفى الملك خالد الجامعي ودخلنا قسم الطوارئ وبعد الفحوصات والأشعة قالوا فيني ألتهاب في الرئة
الرئة قررو علي تنويم وبدو يعطوني أدوية عن طريق الوريد مع جلسات أكسجين لمدة تقريباً أسبوعين وتحسنت حالتي من ناحية الرئة بس كنت أحس بكتمه إذا مشيت في الصدر وقلت لدكتور عنها وقالي من ناحية الرئة فهي سليمة بس بنسوي لك أشعة مقطعية لصدر كامل وبعد ماسوو لي الأشعة أكتشفو تضخم في القلب
وحولوني على دكتور القلب المهم أنه عطاني أدوية وكتب لي خروج في تاريخ 1439/11/11 هـ .
أستمريت على الأدوية لمدة 6 شهور بس كانت حالتي تدهور وصرت ما أقدر أبذل جهد ولا أقدر أمشي كثير وزادت نسبة السوائل عندي وكنت كل ما أروح لموعد يزود لي جرعة العلاج
أستمريت على الأدوية لمدة 6 شهور بس كانت حالتي تدهور وصرت ما أقدر أبذل جهد ولا أقدر أمشي كثير وزادت نسبة السوائل عندي وكنت كل ما أروح لموعد يزود لي جرعة العلاج
بعدها قرر يسوي لي ( كي لعضلة القلب ) علشان يعالجون رجفان القلب لكن زادت حالتي سوء وصرت أقوم من نومي بسبت هالكتمه وجاني أنتفاخ في البطن بسبب السوائل المهم خلاص ما عاد تحملت هالتعب ووداني أخوي محمد مرة ثانية للطوارئ تاريخ 1440/5/4 هـ ، وبعد الكشف قالوا نسبة السوائل عاليه مرره
وقررو يعطوني مدرات للبول عن طريق الوريد ويشوفون نسبة السوائل اللي تطلع وحاطين علي جهاز تخطيط القلب وشافو أن فيه زيادة في ضربات القلب وعدم أنتظام وقالوا أحتمال نسوي لك ( صدمة كهربائية ) علشان نحسن ضربات القلب والحمدلله أنهم ماسووها
المهم كانوا كل يوم يمرون علي ويقولون ترانا ندرس حالتك طبعاً كانوا مستمرين يعطوني مدرات البول على الوريد وفجأة جتني الممرضة قالت لي أنهم كتبو لي خروج تاريخ 1440/5/15 هـ أنا أستغربت منها لأني أحس أني تعبان بس أنبسطت لأني طفشت من المستشفى وعطوني موعد بعد يومين عند الدكتور
ورجعت للبيت وأحس أني تعبان فعلاً بس تحاملت نفسي إلين جاء الموعد ووداني أخوي سلطان يوم شافني الدكتور قالي أنت من طلعك أنا أنصدمت من رده وقلت له أن الممرضة جتني وقالت لي أنكم قررتو علي خروج بعد ما شيك على الجهاز حصل فعلاً فيه أستشاري ثاني كاتب لي خروج ثم ألتفت علي
وقالي الحين بسوي لك تنويم أطلع للقسم فوراً أنا توترت وخفت وأخوي سلطان زعل بسبت هالحركه اللي مالها مبرر المهم طلعت للقسم والحمد لله قالوا لي مافيه سرير حالياً وممكن نهاية اليوم يتوفر سرير . رجعنا للبيت وأنا تعبان ومتضايق والنفسية مضروبه خلاص شافني أخوي سلطان كذا
قالي قم خلنا نروح لمستشفى ثاني وفعلاً رحنا لمستشفى سليمان الحبيب وأنا في الطوارئ قابلنا جارنا وقالنا عن نظام ما كنا نعرفه قال ترا في نظام في وزارة الصحة أنهم يتكفلون بالعلاج كامل في المستشفيات الخاصة في حال عدم توفر سرير في المستشفى الحكومي (1) وفعلاً أخوي سلطان راح للإدارة
قالهم أرفعو أوراقنا للوزارة والحمد لله جتنا الموافقة من الوزارة في أقل من ساعتين بعدها خذوني لقسم العناية القلبية وصارو كل يوم يسوون لي أشعات لجميع أعضاء الجسم وتخطيط للقلب وبعد يومين تقريباً من التنويم جتني ضيقه قويه لدرجه قلت لهم ابي زوجتي تقعد عندي وكانوا يرفضون الاداره
بسبب أننا في قسم العناية لكن بعد محاولات وضغط نفسي معهم وإصراري أني بطلع من المستشفى قالوا خلاص خلها تجي من الصبح وتطلع اخر الزيارة طبعاً رضيت بالامر الواقع وانا نفسيتي تعبانه مرره وسببت لي هبوط حاد في الضغط جاني الإستشاري الله يذكره بالخير لولاً الله ثم هوكان أنا ماأدري وش فيني
قالي بالحرف الواحد تراً أنت جالس تضيع وقتك بالجلوس هنا وأنك بحاجة لزراعة للقلب ( هنا أول صدمه لي بس بدون تعبير لأن أمي كانت تسمع هالكلام ) لأنه أكتشف بعد الدراسة أن عندي فشل في القلب وعلاجي متوفر في مستشفى الملك فيصل التخصصي أخذ أخوي سلطان أوراقي والتقرير كامل وراح للجنة القبول
وقدم أوراقي بعدها بيومين راجعهم أخوي سلطان وقالوا أن الإستشاري جهاد البريكي يبغى يكلم الإستشاري كلمني سلطان وقالي ، بعدها كلمة الإدارة وعطوني الرقم وتواصلو مع بعض والحمد لله جتني الموافقة فوراً ونقلوني في الإسعاف ودخلنا مستشفى الملك فيصل التخصصي تاريخ 1440/5/25 هـ
نقلوني لقسم العناية التاجية سوو لي أشعات وتحاليل من أول وجديد وجاني الإستشاري جهاد البريكي وعرفني بنفسه وقالي أنه هو اللي راح يسووي لي زراعة القلب بس في الأول لازم تمر في مراحل لتجهيز لزراعة . بعد ما نزلت السوائل مني وتحسنت حالتي شوي قررو أنهم يطلعوني لقسم التنويم ماقبل الجراحة
علشان يدرسون حالتي صارو يعطوني علاج عن طريق الوريد علشان ينظم ضربات القلب ومركبين لي جهاز تخطيط لمتابعة الضربات وبعد كم يوم جاني الإستشاري وقالي أنهم قررو يركبون لي جهاز مضخات للقلب مؤقت إلين يلقون لي قلب لأن قلبي ما يضخ دم للجسم وأرتفعت وظائف الكلى عندي
وخافوا على الوظائف الثانية ( بعد كلامه جتني صدمه ثانية وبدون تعابير لأني ماني مستوعب اللي يصير فجاءة ) المهم خذوني للأشعة المقطعية وبعدها الرنين ورجعت للقسم جاني الإستشاري الجراح فراس خليل شرح لي الوضع أن عندي فشل في البطين الأيسر والبطين الأيمن
وأني أحتاج أركب جهازين من نوع LVAD & RVAD مو جهاز واحد وشرح لي أنها أجهزة داخلية وبتطلع سلكين من البطن وبتكون مربوطه بأجهزة أشيلها معي وراح تجيني ممرضة تشرح لي الجهاز ونوعه وشكله وطريقة تركبيه وطلع ( وأنا مصدوم بشكل عجيب بدون ردت فعل لكن هالمره ماعاد تكلمت لمده 3 ساعات تقريباً
مدري لساني أنبلع ولا علق من الصدمات زوجتي تكلمني والممرضة اللي كانت بتشرح ما كلمتها وأخوي سلطان جاء يواسي لكن بدون أمل والحمد لله على كل حال ) بعدها وصلو أهلي أبوي وأمي وأختي وعمي جلسو يواسوني ويحاولون يقنعوني وأنا كنت ما أتقبل كلام أحد وحاط في بالي أني ماراح أركب هالأجهزة
ورافض الفكرة نهائياً جاء اليوم الثاني ودخل علي الإستشاري جهاد البريكي وحاول يقنعني ويشرح لي أن الوضع ماينفع تأجيل ولا تأخير لأني قلت له أبي أفكر برى المستشفى يعني أطلع على مسؤوليتي وبعد ما أفكر وأوافق أرجع لكم طبعاً أنا حاط في بالي أبي أتعالج بالطب الشعبي قالي
مانقدر نطلعك وأنت في هالحاله بعدها تواصلنا مع شخص له خبره في الطب الشعبي قالي علاجك فالمستشفى يأست وتضايقت يوم تذكرت الأسلاك والأجهزة وكيف بقدر أتعايش معها وكلام هالأستشاري اللي يقول ماينفع تأجيل رضيت بالأمر الواقع وقلت لهم أبي أقابل هالممرضة علشان تشرح لي هالأجهزة
فعلاً جوني ممرضين ثانين لأنها ما كانت متواجده وشرحو لي وضع الأجهزة وأنها حديثه والحمدلله أن الدولة موفرتها بالمجان وقيمة الجهاز الواحد أكثر من نصف مليون ريال(الله يعز حكومتنا الرشيدة ويحمينا من شر هالعدوان)(2) وجاء الإستشاري اليوم اللي بعده وكان معه دكتور ثاني أجنبي وبلغني عن
العملية متى راح تكون وأني أول شخص يركبون له جهازين في المملكة ورابع شخص فالعالم وأنهم أستدعو مساعد من خارج المملكة اللي أجراء أول عملية تركيب جهازين في العالم علشان يساعدهم .
وجاء يوم العمليه تاريخ 6/6/1440هـ
وجاء يوم العمليه تاريخ 6/6/1440هـ
كان شعوري متلخبط مدري خوف مدري تبلد ماكنت ادري وش بيواجهني بس توكلت على رب العالمين كانت عمليتي الساعه ٦ الصبح بس أخروها لين الساعه ١٠ الصبح وجاء الاستشاري وبلغني انه اخر العمليه ولا سألته ليه ولما جت الساعه ١٠ جتني ممرضه من قسم العمليات قالت لي مستعد قلت ايه قالت لاتخاف
انا قلت اني متوكل على ربي وقتها زوجتي طلعت من الغرفه واحس انها انهارت من الصياح لانها رجعت وعيونها حمر وانا كانو يغيرون لبسي ويجهزوني للعمليات بعدها خلاص طلعتي بالسرير وكنا متوجهين للعمليات اول مادخلنا قسم العمليات جاني حق التخدير وعرفني بنفسه وقالي بعطيك ابره مهدئه
ولما عطاني إياها جلس يدفني ومن بعدها انا ماحسيت بشي جلست بالعمليات تقريبا ٧ ساعات لما طلعت كان وقتها تقريبا الساعه ٥ العصر رفضو يدخلون اخواني وعمي وزوجتي علي (حسب كلام زوجتي) بس وقتها قالو لهم ان الحمد لله مبدئياً العمليه ناجحه بس لازم يمر ٢٤ ساعه يخافون يجي نزيف او شي لاقدر الله
بعدها بفتره سمحوو لزوجتي واهلي يدخلون يشوفوني وصارو يدخلون ويطلعون وانا مو حاس بالي حولي جوني اليوم الثاني ولما زوجتي سألت عني بلغتها الممرضه اني بديت افيق واني طلبت ورقه وقلم وكتبت ابي مويه ومتى تفكون الجهاز الي بفمي (لان وقتها حاطين لي تنفس صناعي ) ومن بعدها
جوني الاطباء وفكوه مني بس وقتها انا مو حاس بالي حولي يعني شوي افتح وارجع انوم لما احد يكلمني امسك يده ماكنت ابي زوجتي واهلي يفارقوني بس نظام العنايه المركزه معروف ٥ دقايق ويطلعون كانوا يتناوبون علي وما تركوني ولا دقيقه لدرجة انهم صارو يسببون مشكله مع الممرضين بس عشان ما يتركوني
والحمد لله وضعي كان مستقر ويوم عن يوم بديت اصحصح وبدو يأكلوني على خفيف ويجلسوني على الكرسي لين بديت اتحسن شوي بس اللي كان متعبني رئتي كنت مقدر اخذ نفس قوي وكنت معتمد على الاكسجين مرره احس لو يفكونه مني يمكن اموت
وبعد ثلاث ايام بدو يخلوني امشي شوي ويرجعوني ووقتها الحمد لله قراءات الجهاز كانت كويسه والاستشاري مره مبسوط من وضعي كان كل يوم يمر علي ويطمني بعد تقريبا ١٠ ايام قررو يطلعوني للتنويم العادي الحمدلله مررره انبسطت اني بطلع من العنايه وانهم بيحطون معي مرافق كلمت زوجتي على طول
وقلت لها تعالي بينقلوني وجت وجلسنا تقريبا ساعه وجو خذوني للغرفه لمانقلوني جو وعلموني انهم بيبدون يدربوني انا وزوجتي على الجهاز وكيف تنظف لي جرحي وتعقمه وعلى طول بدو من اليوم الثاني صارت تجينا الممرضه وتشرح لزوجتي كيف تركب لي البطاريات وكيف تفكها وكيف تركب البطاريات على جهاز الشحن
والحمد لله زوجتي على طوول عرفت مع انها كانت متوتره في البدايه ولما شافوها اتقنت موضوع الجهاز صارو يدربونها على تنظيف الجرح وتعقيمه في البدايه خربطت شوي وبعدين اتقنت ، كملت اسبوع في التنويم العادي وكانو يقولون اذا خلاص الممرضه شافت ان زوجتك اتقنت كل شي راح نكتب لك خروج
لاكن قدر الله وماشاء فعل جتني فجأه حراره ولخبطت كل شي بعدها سوو لي (مزرعة دم ومزرعة بول وبلغم وبراز تكرمون ) يبون يشوفون فيه التهاب ولا لا بس كل شي كان سليم وفجأه صار اسفل الجرح يطلع دم فقررو انهم يرجعون ينقلوني على العمليات ماراح انسى هاليوم
جاني الجراح فراس خليل وقالي متى افطرت قلت الساعه ٩ قال خلاص لعاد تاكل شي لازم تصوم باخذك للعمليات الساعه ٦ المغرب بفتح الجرح وبسوي لك تنظيف لان عندك التهاب وبتجلس بالعنايه يوم وبرجعك للجناح وطلع ، لما طلع جتني ضيقه وزوجتي بغت تنهبل خلاص قلت يارب انك تصبرني
يعني برجع للآلام مره ثانيه ووللعنايه جلست زوجتي تهديني وبلغنا أهلي وضاقت صدورهم بس مافي اليد حيله الحمد لله على كل حال قلت لزوجتي وقتها لاتتركيني تعالي لي في العنايه اذا خلصت العملية لما جاء المغرب جوخذوني وقالو مدة العمليه ساعتين ودخلوني وخدروني ولماخلصو ودوني للعنايه جتني زوجتي
ودخلت وكانت متوقعه تلقاني صاحي بس تفاجأة ان علي الأجهزه وتنفس صناعي وخافت وانهارت قالت متى بيصحى وفيه ممرض الله يسامحه قال لها ماله داعي وجودك ماراح يصحى الحين وطلعها وكان اخوي سلطان متواجد بعد وطلعوو وكانت تبكي واخوي يهديها الا قابلت بطريقها امها واخوها
انهارت عليهم وجلسو يهدونها وام زوجتي اصرت تدخل وتشوفني ولما دخلت ومسكت يدي انا حسيت فيها وفتحت عيوني وجلست تقرأ علي ومن بعدها نادت زوجتي ودخلت علي الا كانت الممرضه تعطيني ادويه بالوريد وقررو دام اني صحيت يشيلون التنفس الصناعي مني ولما شالته ما أحكي لكم الألم
اللي أحس به وركبو لي التنفس اللي عن طريق الأنف على طول لاني باقي مكتوم ويالله اتنفس لان الرئه فيها انكماش وهالشي طبيعي بعد كل عمليه كبيره ومن بعد التنفس الصناعي كنت تعباان مره كنت احس بألم بصدري مو طبيعي وما اقدر اتنفس لان اكسجين الانف سريع هواه وغير الخوف
كنت احس اني خلاص نهايتي قريبه لدرجه مابي احد يتركني قلت لزوجتي لاتتركوني اقروو علي وجلست ام زوجتي تقرا علي الله يجزاها خير كانت هالليلة بالنسبه لي اصعب ايام حياتي تعبت تعب اكثر من العمليه الأولى تعب مافيه كلام ممكن يعبر عنه من بعدها اجبرو زوجتي وأهلها يطلعون انتهت وقت الزياره
وانا مابي اجلس لحالي
جتني الممرضه ورحمتني وكانت مسيحيه مسكت يدها وقلت لاتتركيني انا تعبان واهي جلست تقول لازم تكون قوي انت لسه صغير حتى جلست تبكي وتصلي صلاتهم جلست حول الساعه ماسكتني لين نمت ولما جاء الصبح كلمت زوجتي وجتني على طول وجلست معي
جتني الممرضه ورحمتني وكانت مسيحيه مسكت يدها وقلت لاتتركيني انا تعبان واهي جلست تقول لازم تكون قوي انت لسه صغير حتى جلست تبكي وتصلي صلاتهم جلست حول الساعه ماسكتني لين نمت ولما جاء الصبح كلمت زوجتي وجتني على طول وجلست معي
كنت مره تعبان يالله اتنفس وجوني امي وابوي واختي وجلسو يقرون علي وانا ماودي انهم يسكتون ولا يتركوني دقيقه كانو يتناوبون علي وكنت اسأل أمي أساله أنتم تحبوني أنا مقصر معكم أسئله ماقد قلتها لأمي أو أختي أو زوجتي وللأسف جلست بالعنايه حول ٦ او ٧ ايام كانو يبوني استغني عن الاكسجين
عشان ينقلوني التنويم وكثفت تمارين الرئه لين الحمد لله بديت اتحسن وجاء الفرج وقالو بيرجعوني للجناح والحمد لله طلعت وعلى طول كلمت امي وطمنتها وأول مافتحت الزياره كل اهلي وعماني وعماتي وخالاتي واهل زوجتي عندي والله يجزاهم خير كل يوم عندي ماتركوني ولا دقيقه
وبعد مابديت اتحسن واقول جاء الفرج بيكتبون لي خروج الا قدر الله ورجعت لي الحراره مره ثانيه ورجعوو يسون لي تحاليل واشاعات يبون يعرفون وين مصدر هالحراره والصدمه ان كل شي سليم كل الممرضين والاطباء مصدومين من وضعي انا وهالحراره جلست منوم تقريبا اسبوعين واهي رايحه جايه
بدون محد يدري عن سبب ارتفاعها بس جالس على المسكنات كلمت تعبت نفسيتي شويه كنت انسان محطم انسان منكسر انسان ضعيف احس خلاص مدري وش نهايتي بس دعوات اميمتي وابوي ووقفت زوجتي واهلي معي اهي اللي مصبرتني على هالوضع صرت لما اشوف نفسي نشيط شوي انزل اغير جو بحديقة المستشفى
وارجع للغرفه بعد اصرار زوجتي ولا مالي نفس حتى انزل وعلى هالحال ماندري من ايش هالحراره ، وفي يوم اختي كلمت بنت خالتي واهي متضايقه ومنهاره من وضعي لدرجة انها اهملت دراستها الجامعيه واجلت كورس ولما كلمت بنت خالتي وتقول لها ليه مانجيب احد يقراء على اخوي وضعه مو طبيعي كل ماخلصنا من شي
طلع شي جديد ووقتها ماقصرت كلمت لي واحد الله يذكره بالخير ويسعده ويوفقه وين ماكان لان كلامه لي بحد ذاته كان يعطيني امل صار يجيني ويجلس ويسولف علي ويقرأ وكانت تريحني قرأته مره ويجلس يسمعني كلام يقويني ويرفع من معنوياتي شوي شوي بدت تخف الحراره مني لدرجة كنت اقول لايكون هالحراره
تجي من نفسيتي لان نفسيتي تعبانه مره واحياناً يمر يوم كامل ما اتحرك من مكاني صار كل يوم يمر علي ويسولف ويقرا علي ويروح واميمتي وابوي واي احد صار يزورني يقرون علي صار الكل يجتهد وانا الحمد لله بديت اتعود على الجهاز واتأقلم صح يضايقني بس الشكوى لله اهم شيء اني ارتحت وبدت الحراره
تروح مني صارت قليل ترتفع والاطباء بدو يعطوني أمل ان طلعتي قريبه ولما جلست يومين بدون حراره انتظر احد يجيني يقول خروج قدر الله وجتني حساسيه بكل جسمي صار كل جسمي يعورني وجوني الاطباء ووقفو المضادات اللي اخذها لانها جابت لي الحساسيه وجاني دكتور الجلديه وكتب لي على مرهم
يخفف علي هالحساسيه ولما بديت اتحسن واقول خلاص هانت قدر الله ان خشمي ينزف لاحول ولا قوة الا بالله طبعا مو اول مره من زمان تصير معي هالحاله بس رفضوو قالو لازم يركبون لي زي الحشوه بخشمي رفضت وعصبت بالبدايه وقلت ياعالم خلاص طلعوني انا تعبت منكم
كل شوي طالع لي شي جو حقين الاجهزه يقنعوني اني اصبر وزوجتي تهديني الين رضيت بالامر الواقع واركب هالحشوه وانا خلاص ضاقت فيني الدنيا تعبت ابي اطلع ابي بيتي ابي عيالي ورضيت بالامر الواقع لان جاني دكتور وقال بس يوم وافكها وركبو لي الحشوه بالانف وما احكي لكم الالم طول الوقت اتنفس بفمي
ولما جاء اليوم الثاني من صحيت وانا اقول يالله فكوها واهم كل شوي اصبر نص ساعه اصبر ساعه بس يبوني اسكت وانا تعبت بس الي هونها علي ان اطباء الاجهزه قالو دامك من سكان الرياض اطلع لمدة ٦ ساعات للبيت غير جو وارجع الحمد لله وضعك مستقر والسيوله كويسه المهم انبسطت
وقلت يالله العوض ولا القطيعه وافقت ووقعت زوجتي الاوراق وجاء اخو زوجتي وخذانا ووداني للبيت وجوني بنتي ووليدي مره مشتاق لهم ومشتاق لامي وابوي واخواني وبيتنا اه بس ماودي ارجع بس الشكوى لله ولما كملنا ٦ ساعات رجعنا للمستشفى عشان فيه مضادات عن طريق الوريد لازم اخذها
طبعا نسيت اقولكم من اسباب تأخير خروجي من المستشفى كانو يبون ياخذون خُزعه من الغدد اللمفاويه يبون يتأكدون اهي سليمه ولا لا بس وقتها قالو لازم نخفف من دواء السيوله ولما نزلت السيوله خذوني وسووها لي وطلعت بعد ٣ ايام وكانت النتيجه سليمه وكنت متوقع هالشي لان الحمد لله ما اعاني منها
بس هم بسبت هالحراره صارو يشكون بأي شي وقالو الحين لازم نرجع نرفع لك السيوله مره ثانيه لانك مركب جهازين لازم تكون ٢.٧ وفوق يخافون من تخثرات الدم حول الجهاز ركبو لي عن طريق الوريد دواء اسمه هالبارين اتوقع ٢٤ ساعه غير حبوب للسيوله وكل يوم الصبح يسوون لي تحليل
ويعلموني كم زاد وكل يوم يزيد شوي خلاص كل همنا متى هالسيوله ترتفع واطلع تعبت نفسيتي من الانتظار خلاص صار كل شي يخوفني ابي اطلع وارتاح صرت اخاف من اي شي من اي عدوى يمكن تنتقل لي من احد صرت حتى اتضايق من الزوار اخاف من الالتهابات والبكتيريا صرنا نحرص الزوار
انهم يتعقمون ويلبسون ماسك وقفاز قبل يسلمون وكلهم والله ماقصرو يبون سلامتي وبعد كم يوم لما شافو وضعي مستقر والحمدلله ، زوجتي خلاص اتقنت الجهاز وتنظيف الجرح والتعقيم مثل ماقلت لكم طلعوني لمدة ٦ ساعات بس طلعت وانا بخشمي هالحشوه عيا يفكها ويوم رجعت وجلست يومين
جتني ممرضتي حقت الاجهزه احلام وقالت لي انهم بيطلعوني لمده ١٢ ساعة واذا شافو اني ماتوترت ولا زوجتي ووضعنا تمام خلاص خروج نهائي انا قلت لا خلاص بطلع وبنوم ببيتي واجيكم بكرا قالت لا مانقدر عشان السيوله اليوم ٢.٢ قعدت اترجاها وقلت لها ماتسوى اروح واجي قالت اوكي بشاور الاطباء
وراحت وجت قالت عطني البشاره خلاص اطلع ونوم اليوم ببيتك وبكرا الصبح تجي تسوي اشعه وتحاليل وخلاص خروج نهائي يوم قالته ياربيه احس معاد ادري وش اقول شعوري متلخبط واخيرا انتهت هالايام الحمد لله اتصلت وعلمت امي وخلاص بدينا نجهز ونشيل اغراضنا او بالأصح عفشنا
لأنها كثير ٣ شهور تنويم مو سهله لما خلاص شلنا كل شي جو حقين الانف والاذن والحنجره واخيرا فكو الحشوه اللي بخشمي وبعدها طلعت الحمد لله رجعت لبيتي وعيالي وامي وابوي واهلي جلست وتعشيت ونمت ولما جاء الصبح رجعنا للمستشفى سوينا التحاليل والاشعه
والحمدلله كل شي زين عطوني مواعيدي وتقرير طبي عن حالتي واجازاتي المرضيه والحمد لله لك يارب سوو لي خروج نهائي الحمد لله على كل حال انا حاليا مسجليني في برنامج زراعة القلب ينتظرون يلقون لي متبرع والقلب الي يناسبني الله ييسر امري يارب ويكتب لي اللي فيه خير
لا تنسوني من دعواتكم في ظهر الغيب ... :)
أهدافي من القصة :
(1)في كثير من انظمة الدولة ما نعرفها ودولتنا ما قصرت علينا لكن المشكلة في التسويق والإرشاد على هالأنظمة زي هالنظام الحمد لله وفر علي 70 ألف ريال تقريباً قيمة إقامتي والأشعات والتحاليل في مستشفى سليمان الحبيب .
(1)في كثير من انظمة الدولة ما نعرفها ودولتنا ما قصرت علينا لكن المشكلة في التسويق والإرشاد على هالأنظمة زي هالنظام الحمد لله وفر علي 70 ألف ريال تقريباً قيمة إقامتي والأشعات والتحاليل في مستشفى سليمان الحبيب .
(2)الله يعز حكومتنا والله العظيم ما تحس بهالشعور الا لما تحتاجه قيمة هالأجهزة مليون ريال تقريباً وفي دول العالم تُباع وأحنا في البلد الطاهر نأخذه بالمجان ( وبدون واسطات علشان محد يقول معك واسطه والله كانت واسطتي ايماني بربي )
(3)الهدف الرئيسي لازم تقوي ايمانك بالله لان بتجيك أوقات يضعف فيها ايمانك وثقتك بالله لكن تذكر ان فيه حالاتك اقوى منك وربي شافاهم والله اللي يعطيك القوة والله اللي يعطيك الثبات انت فالنهاية تراك ضعيف
(4)اهلك هم حياتك قسم بالله انك ما تسوى شيء بدون اهلك وامك وابوك هم تاجك دعواتهم هي أبواب طريقك
شكراً ربي على هالنعم اللي أحنا فيها ، شكراً خادم الحرمين الشريفين @KingSalman ، شكراً سيدي محمد بن سلمان @Badermasaker ، شكراً أبي ، شكراً أمي ، شكراً زوجتي ، شكراً أخواني وأختي الغالية ، شكراً أهلي كلكم ، شكراً وزارة الصحة @SaudiMOH
هذي صورة الاجهزة الداخلية في الجسم ( المضخات )
اليوم نبدأ في العلاج الطبيعي .. لأني أتعب من الدرج والمشي الكثير .. طبعاً أكثر شيء يتعبني حرارة الشمس لأنها تضعف بطاريات الأجهزة وتسبب لي حكه قويه مكان فتحات الأسلاك ..
نقول بسم الله .. اللهم ارزقنا شكر نعمتك وعافيتك ..
ونخلص من العلاج الطبيعي ونبدأ في تحليل السيوله .. طبعاً هالتحليل كل أسبوع أو أسبوعين على حسب التحليل السابق لأنه مهم علشان تخثر الدم ويخافون على المضخات أنها تتعطل إذا نزلت سيولة الدم .. مايحتاج أقولكم أنها إذا تعطلت هالمضخات إحتمال لاقدر الله وفاة ..
@G8Bez فعلاً الألم وقتها مايعرفه ألا المريض نفسه وتعاطف اللي حوله يخفف عليه شوي .. الحمدلله حمداً كثيراً
@xqz_nt الله يجزاك خير ..
جاري تحميل الاقتراحات...