اتكلمت في ثريد سابق عن الأفلام الأجنبية العالمية ذات القيمة الفنية واللي أثرت عليا وأثرت في تكوين شخصيتي وطريقة تفكيري وده معناه إن الفن عموما ( كل أنواع الفنون ) بيبقى ليها دور كبير في تكوين الأفكار وإثراء الشخصية وصياغة معالمها
وفي العصر الحالي بتعتبر السينما من أهم أنواع الفنون ذات التأثير ،،،، وبمناسبة الهراء السينمائي والتليفزيوني اللي احنا غرقانين فيه دلوقتي تعالوا نتكلم شويه عن السينما المصرية قديما وما كانت تقدمه لعقل المشاهد ،، واسمحولي احكيلكم تجربتي الشخصية يمكن حد يستفيد منها وده الهدف من ثريد
زمان فتحت عيني على أفلام فاتن حمامه وعمر الشريف وعماد حمدي وكمال الشناوي وشاديه وغيرهم من نجوم الزمن الجميل ده ،، ومثلا لما شوفت فيلم اللص والكلاب تجسدت لي معاني الخيانة في نبويه وعليش واستجدعت جدا شاديه وتعاطفت معاها بل وحبيتها عشان موقفها مع سعيد مهران ودعمها له
زي بالظبط ما تعاطفت مع فتاة الليل ف فيلم الوسادة الخالية وكنت ف وقت من الأوقات وانا صغير ف سن ال ١٥ معنديش مانع خالص اني اتجوز رقاصه أو فتاة من خمارة وتتوب على ايدي وتبقى ست محترمة ( محدش يضحك ) دي أفكار طفل ليها تقديرها واحترامها ولازم حد يتعامل معاها بوعي وحكمة
ولما شوفت فيلم نهر الحب ( قصة تم تعريبها عن رواية أآنا كارنينا ) وتعاطفت مع خالد ونوال وازاي نجح صناع الفيلم في شيطنة طاهر باشا وخلقوا تعاطف كبير مع خالد ونوال وكذلك فيلم بين الأطلال عن رواية بنفس الاسم ل يوسف السباعي ،،،، كل ده كان مؤثر فاعل في تكوين أفكار المتلقي
وهنا تكمن الخطورة اللي بتكون في توصيل رسالة للمتلقي تخالف الفطرة السوية والقيم الراسخة ،، وهنا لازم أذكر الدور التربوي لأب واعي زي بابا الله يرحمه واللي كان بيتناقش معايا وانا طفل ويعيد ترتيب منظومة القيم في عقلي عشان ميخربهاش فيلم نجح صناعه في خلق تعاطف مع شيء غير سوي
وكان بيشرح لي ويناقشني فأدركت إن مينفعش تحت أي مبرر إن ست متزوجه تحب راجل تاني وإن الراجل اللي يصر على محاصرة ومطاردة ست متزوجة ده ندل وجبان يحاول سرقة حياة شخص آخر وليس بطل نتعاطف معه بذريعة الحب ،، وإن مينفعش أم تتخلى عن ابنها عشان أي شيء ف الدنيا أو مبرر الاحتياج للحب او الجنس
وإن الحياة لا تستقيم اجتماعيا في حالة ما إنسان من طبقة اجتماعية لها قيمها واخلاقياتها يتجوز رقاصه او فتاة ليل حتى لو تابت وحجت ،،، لامؤاخذة مع كل احترامي تتجوز بقه اللي يناسبها لكن مش انا طبعا ،، عشان كده لما شوفت دعاء الكروان عجبتني نهايته جدا اللي مات فيها المهندز احمد مظهر
وادركت ان مفيش استقامة خالص لو اتجوز آمنه ف نهاية الفيلم ، ولما كبرت وقريت الرواية اللي كتبها د . طه حسين موافقتش عالنهاية اللي كتبها واقتنعت بعبقرية هنري بركات اللي غير نهاية الرواية ف الفيلم ،، وعشان كده بأرجوكم متسيبوش الدراما التليفزيونية أو السينمائة تربي أولادكم
وتشكل وعيهم بعيد عن متابعتكم ورقابتكم لأنها ممكن تخلق منهم شخصيات مايعه غير قادرة على التمييز بين الخير والشر والصح والغلط ممكن تهدم منظومة القيم جواهم وتقنع ابنك انه يصفق للحرامي الجدع اللي البوليس معرفش يمسكه او بنتك تقتنع ان المشي البطال ب مبرر الفقر او الاحتياج مش عيب
والهراء اللي عمالين يضخوه بشكل يكاد يكون متعمد وتصدير أشكال وسخه وتلميعهم على انهم فنانين وقدوه ده أخطر على أولادنا من المخدرات ،، وتدني مستوى الأعمال السينمائية والدراما التليفزيونية لمستوى بعد الحضيض ب عشر محطات لتحت .. دا غير الاسفاف في الأغاني والبذاءة ف الألفاظ المستخدمة
كل ده لازم يكون له تأثير سلبي على الأجيال الصغيرة لو احنا ما تابعناش وشرحنا وفسرنا وناقشنا أولادنا وعدلنا ف دماغهم منظومة القيم اللي بتتشقلب وبتهترئ يوم بعد يوم ،،،
شوية أفكار ف دماغي حبيت أشاركها معاكم ويا رب ميكونش الثريد دمه تقيل .
تحياتي &&&
شوية أفكار ف دماغي حبيت أشاركها معاكم ويا رب ميكونش الثريد دمه تقيل .
تحياتي &&&
جاري تحميل الاقتراحات...