تغافلت " واجد " لين برانـي القانون
اثر لـ التغافل بعض الاحيان قدر وشان
وانا والله اني .. لا " مغفل ولا مجنون
لكن اتحمل زلة فلان لـ اجل .. فلان !
لذا لو سمحتو قدرو صدري المشحون
قبل لا ارتكب فـ احدكم الأثم والعدوان

للانسان صبر ولا انتهى كل شي يهون
متى تفهمون وركزو زيين فـ الانسان
يا كم مره ارفق لي على ناس ما يسون
انا ماني بـ " جمعية الرفق بـ الحيوان
اعاني من اللي جاابو الضغط والقيلون
عسى الله يلهم حالي الصبر والسلوان
واقدر جميع اللي مثل وضعي يعانون
واكيد الصبور معان دام الكريم معان

يا وجه الله من اللي على كبودنا يمشون
من العسر كن الارض ضاقت على العربان
تمشو بالارض الواسعه لين ما تفنون
كبود البشر ماهي مثل نجد والصمان
يا ويلي على الراحه لـ ادفع بها مليون !
ابا ارتاح من طاري هل .. الزور والبهتان
معاد احتمل صدمات ومخاطره وطعون
ولا احدٍ يكلمني ليا من جوي شان

لا شفت الرجال اللي يلفون ويدرون
اردد بـ نفسي .. يالله العفو والغفران
يا راسي لقيت اللعب كله على المضمون
ابا اعطيك كلمة راس مدام حنا اخوان
ترى اهل النفاق يقدمون الوفا عربون
يبا الفيت مابه واحدٍ بيننا "خسران "
وانا خاسرٍ معهم حيااه تعب وظنون
ولا فيهم اللي وده يشوفني فرحان

يقولون لي : نغليك .. وانقدرك وتمون
لكن ويش ابي في كلمةٍ مالها برهان
انا اشوفهم يغلون ما اشوفهم يغلون
لو ظلوعهم حزمة حطب جالها دخان
تلون وجيه الناس في كل يوم بـ لون !
عسى الله يستر لا يجيني عمى الالوان.