مع اقتراب نهاية العام الدراسي، ورغبة العديد من المبتعثين والمبتعثات خوض تجربة التدريب في الولايات المتحدة بعد التخرج، ولكن لايعرف من أين أو كيف يبدأ. هنا انقل لكم تجربتي في خوض الOPT التي شارفت على اكمال سنتي الاولى فيها. انقل لكم تجربتي والخطوات لعلكم تجدون فيها الفائدة المرجوة.
الـ Optional Practical Training اوOPT هو برنامج تدريب اختياري للطالب الدولي ليمارس تخصصه بعد التخرج في بيئة عمل حقيقية لمدة عام (قابل للتمديد لسنتين اضافيتين لبعض التخصصات بمجمل ٣ سنوات). هنا ساحاول ان اشرح الخطوات بالتفصيل، وماهي الاخطاء التي تمنيت لو انني تلافيتها من البداية.
للتوضيح: رخصة العمل او التدريب اسمها Employment Authorization Document وتعرف اختصاراً بـ EAD Card راح احرص اني اذكر الاشياء باسمائها من غير ترجمة حتى تسهل عملية المتابعة. وهاذي الرخصة اللي بحصولك عليها تكون مخول بالعمل حسب تاريخ بدايتها ونهايتها اللي بيكون مذكور على البطاقة.
و الـ OPT هو البرنامج نفسه ككل اللي انت راح تكون منخرط فيه اثناء هذه الرحلة. والـOPT تقدر تاخذه بعد كل مرحلة دراسية، يعني خلصت بكالوريوس وقدمت على OPT وتدربت سنة وخلصته و قررت تكمل ماجستير. ايضاَ تقدر تاخذ OPT ثاني بناءً على درجة الماجستير. وهكذا مع الدكتوراه.
اولاً، التجهيز المبكر.
للتقديم على OPT يتطلب بطبيعة الحال مستندات معينة اشرحها في التسلسل القادم. من اهم شروط التقديم، انك ماتقدم اوراقك لطلب رخصة التدريب الا ٩٠ يوم قبل التخرج. وللاسف الكثير يبدأ بتحضير المتطلبات في فترة الـ٩٠ يوم هاذي. والمفترض انك تكون جاهز من قبل دخول الـ٩٠ يوم للاسباب التاليه:
الـ٩٠ يوم مخصصة لادارة الهجرة لان تعمل على معالجة طلبك للبت في الطلب. فالمفترض انك ماتضيعها على تحضير مستنداتك، وخصوصاً ان المستندات المطلوبة تستطيع معرفتها من خلال البحث في موقع ادارة الهجرة (الجهة اللي تصدر رخصة التدريب)، فا انت مو مجبر تتقيد بتوقيتهم حتى تكون جاهز، ابدأ بدري
من ضمن الشروط ايضاً توفر نسخ من الـ I-20 اللي حصلت عليها، سواً لغة، جامعة سابقة، الخ.. احيانا تكون فاقد نسخة او ببساطة تخلصت منها لاعتقادك انك ماراح تحتاجها. فا عشان تحصل على النسخ القديمة الامر يتطلب منك التواصل مع جامعتك او معهد اللغة السابق حتى يزودونك بنسخ من I-20
وبالمناسبة، لايكفي فقط تصور الورقة الاولى من كل I-20. المطلوب توفر نسخه من الورقة الاولى والورقة الثانية اللي فيها التواقيع. (صفحة التواقيع تغيرت مؤخراً بالتصميم الجديد للـ I-20 وصارت هي الصفحة الثانية، في التصميم القديم كانت الصفحة الثالثة) تاكد من اوراقك قبل لاتسلمها.
ولان الامر يحتاج وقت، فخطأ كبير تضيع وقت الـ٩٠ يوم حقت التقديم في مطاردة مكاتب الطلاب الدوليين بمعهد لغة ولا جامعة سابقة حتى تحصل نسخ I-20 قديمة لك. فجهز كل شي تقدر عليه قبل دخول فترة الـ٩٠ يوم ماقبل التخرج، وأترك الامور اللي ماتاخذ منك يوم لاخر شي (بشرح وش أقصد قدام)
طيب لحظة! في شخص قرر انه يقدم ودخلت فترة الـ٩٠ يوم وباقي ماعمل شي ولا جهز اوراقه، هل هذا يعني راحت عليه؟ لا طبعاً، تقدر تقدم حتى بعد تخرجك بـ٦٠ يوم! لكن خلي في بالك ان اجراءات ادارة الهجرة تاخذ قرابة شهرين الى ثلاث شهور حتى توصلك الرخصة اللي هي EAD Card
وبسيناريو بسيط، انت قدمت بعد تخرجك بشهر ونصف، والاجراءات اخذت شهرين ونصف حتى وصلتك EAD Card . هاذي ٤ اشهر انت جالس فيها بدون مصدر دخل مثل ماكنت متعود لما كنت مبتعث، بتكون مهلكة للكثير. لذلك انا أحرص ان الطالب يقدم اول مايدخل فترة الـ٩٠ يوم قبل التخرج حتى توصله بالتزامن مع تخرجه.
فتخيل انت جالس ٤ اشهر في انتظار EAD Card . لكن هذا لايعني بالضرورة اول ماتوصلك البطاقة بتلقى عمل! قد تضطر تجلس ٣ شهور اضافية تبحث عن عمل على الـ ٤ اشهر الافتراضية بالمثال السابق. هاذي ٦ اشهر ! متخيل سوء الموقف؟ لذلك انا اقول قدم اوراقك اول ماتدخل الـ٩٠ يوم قبل التخرج.
المتطلبات الاخرى:
ايضا مطلوب فورم Application For Employment Authorization ويعرف بـ I-765، يتكون من ٧ صفحات تلقاه اونلاين. لاتعبيه لوحدك، اطبع الفورم واطلع لمكتب الطلاب الدوليين بجامعتك و بيساعدونك. هذا الفورم الرئيسي في طلبك، وبناءً عليه تصدر لك EAD Card لذلك اشرافهم ومساعدتهم لك ضرورية
بعد ماتكمل نسخ I-20 ويساعدونك الجامعة في تعبئة فورم I-765. مكتب الطلاب الدوليين بجامعتك بيصدرون لك I-20 جديد مدته عام، يكون مخصص للـ OPT. بعد ماتاخذه تعمل نسخة منه وتضيفها لنسخ I-20 السابقة (كل I-20 الاصل تبقى عندك ماترسلها لاحد، ترسل فقط النسخ، الاصل عندك انت فقط)
مبروك عليك بكذا انت خلصت اهم الاشياء اللي تحتاج لها وقت للانستكمال. الباقي تقدر نخلصه بيومين، او حتي يوم لو جدولتها صح.
الاشياء اللي ماتاخذ وقت للاستكمال:
قبل لا اذكر المتطلبات. انصحك بمراجعة مكتب الطلاب الدوليين بجامعتك حتى تعرف المتطلبات، بحثت عن متطلبات الـ OPT وجدت ان الجامعات تختلف ببعض الطلبات البسيطة. فلذلك انسب من يفيدك بهذا الموضوع هم جامعتك لان فالنهاية هم مرجعك. فا إتبع اجراءاتهم بالتفصيل.
من ضمن الاشياء اللي بيوم واحد تخلصها: نسخة من تواريخ خروجك ودخولك لامريكا. اللي هو I-49 بكل بساطة تدخل موقع i94.cbp.dhs.gov وتكتب بياناتك، وبيطلع لك تواريخ دخولك وخروجك. تطبع البيانات وتسلمها من ضمن اوراقك الباقية لمكتب الطلاب الدوليين
ايضاً تقدر تخلص بنفس اليوم الصور الشخصية. مطلوب منك صورتين شخصية حديثة. تروح لـ CVS او اي مكان فيه تصوير وتقولهم انك تبي صورتين شخصية لاصدار جواز سفر. يصورونك ويسلمونها لك بنفس اللحظه غالباً. وتضيف الصور مع بقية اوراقك السابقة.
صورة لجوازك الصفحة الاولى اللي فيها بياناتك، وصورة للفيزا، ( شفت بعض الجامعات تطلب صورة لختم اخر دخول بالجواز. لذلك ارجع لجامعتك حتى تعرف المتطلبات تحديداً لان جامعة عن جامعة تفرق)
ايضا يمديك تخلص رسوم بطاقة EAD وقيمتها 410. تروح لاقرب بنك او مكتب البريد وتطلب منهم Money Order ويكون موجه لـ U.S. Department of Homeland Security وتعطيهم المبلغ. والبنك بدوره يعطيك ورقة بحجم الشيك فيها قيمة المبلغ. وترفق هاذي الورقة مع المتطلبات السابقة حتى يراجعونها جامعتك
بالمناسبة، كل هاذي الاوراق والمتطلبات تكون مطبوعة على ورق وجه واحد، ماتطبع وجه وظهر مهما كان عدد صفحات الاوراق. بالاضافة الى انك ماتدبس الاوراق. خلها مرتبه حسب التسلسل وجه واحد وغير مدبسه.
بكذا تكون كملت الاجراءات لتكون جاهز للتقديم. بعد ماتخلصهم كاملة ويراجعونها معك جامعتك ويبلغونك ان اوراقك جاهزه للارسال مباشرة تطلع ترسلها لادارة الهجرة، (جامعتك تزودك بالعنوان) وتنتظر منهم ردهم الاولي يوصلك خلال اسبوعين او ثلاثة انهم استلموا اوراقك. وبعدين توصلك البطاقة الفعلية
بعد ارسال الاوراق وفترة الانتظار:
بعد ماترسل اوراقك وتنتظر وصول بطاقة EAD، هذا يعتبر وقت ذهبي جداً للعمل على تهيئة نفسك من ناحية سيرة ذاتية، و الخطاب التعريفي cover letter، وحسابك في موقع لينكدان لازم تكون جاهزة، وهنا انا وقعت في اخطاء تمنيت لو اني عرفتها من البداية حتى اوفر وقتي.
اعرف ان الوقت هذا انت فيه مشغول بالترم الاخير وقد تكون مشغول على مشروع تخرج او تطبيق او غيره، لكن لابد تعطي جانب البحث عن الفرصة وقتها. طالما انك باقي طالب استفد من وجود مكتب التوظيف بالجامعة، يساعدونك بمراجعة السيرة الذاتية و الخطاب التعريفي وايضاً يساعدونك تطور حساب لينكدان.
ومكتب التطوير الوظيفي بجامعتك غالباً غير مقيد بوقت معين مثل ادارة الهجرة في استلام الطلبات. ولا انت ملزوم تكون بالترم الاخير حتى يتساعدون معك. اطلع لهم واعمل مقابلات عمل وهمية، يساعدونك في طريقة الاجابة على الاسئلة بالمقابلات، الخ. هي فرصة عظيمة لاتفوتها.
لينكدان بحر وفيه اشياء عظيمة ولا ابغى اتشعب ويتشتت الموضوع عن الهدف الرئيسي، لكن حصولك على حساب مدفوع premium account بيفتح لك خيارات اكثر. انت بتكتشفها بنفسك او بعدين اشرحها في وقت ثاني.
ولاتوقف في بحثك على لينكدان، شخصياً استخدمت ziprecruiter.com glassdoor.com indeed.com monster.com بالاضافة الى بحثي في linkedin.com. كثيرة صح؟ صدقني كلها مفيدة. وبعض المواقع بتفيدك حتى وقت المقابلة اشرحها لاحقاً
طيب الان بعد ماجهزت سيرتك الذاتيه وحسابات التواصل وايميل رسمي يحمل اسمك ( احرص ان يكون ايميلك رسمي لايحتوي على اسماء مستعارة او ارقام مالها اي معنى) هل تنطلق باستخدام هذه المواقع مباشرة؟ لا انتظر في خطوة مهمة جداً لازم تاخذها الان قبل لاتقدم على اي موقع.
انت مقبل على استخدام مواقع التوظيف، وفي احتمالية كبيره ان ليس كل عرض وظيفي باحد هاذي المواقع هو فعلاً للتوظيف! قد يكون لجمع ارقام الاتصال للتسويق او حتى للاحتيال! طيب والحل ما اشارك رقمي في البيانات؟ في طريقة جميلة جداً بتريحك كثير وهي كتالي:
قوقل عندهم خدمة اسمها Google Voice هاذي خدمة تتيح لك تطلع رقم جوال خاص فيك مثله مثل اي رقم بناءً على المنطقة اللي انت تختارها. رقم جوال عادي جداً تشحنه بالمبلغ اللي تبي ويستقبل ويرسل مكالمات اذا ثبت التطبيق بجوالك. وايضاً تقدر تغير الرقم بأي وقت انت حاب.
من ميزة هاذي الخدمة ان رقمك الشخصي يبقى رقمك محد يعرفه الا معارفك، نطقة ثانية لو لاقدر الله طحت بمكالمات سكامز، بثواني تغير رقمك وانتهى الموضوع. وفي نقطة ثالثة بشرحها اخر شي وهي اللي فعلاً ماحسبت حسابها وانتبه لها مديري وسألني عنها وقت المقابلة.
ايضا هاذي الخدمة ليست فقط حصرية عند Google Voice كذلك Skype توفر نفس الفكره انك تطلع رقم جوال بناء على المنطقة.
فترة البحث عن الفرص:
اول شي ابتعد عن خبط العشواء بالتقديم. البحث عن فرص العمل ليس فقط بالتخصص، ايضاً يرتبط بالمكان. ركز بحثك بالبحث على منطقة اللي تبغاها وتتمناها وكذلك منطقتك الحالية اللي انت تدرس فيها. امريكا قارة والبحث اللي يكون على مستوى الدولة ككل مشتت لطاقتك.
الشركة المعلنة عن عمل بتعطي الاولوية للناس القريبين منها. ليس لسبب الا عشان اذا احتاجوا يعملون معه مقابله الا هو قريب ويمديه يحضر خصوصا لو الموضوع فيه اختبار. القريب حضوره سهل. بالمقابل اللي من ولاية ثانية يحتاجون يجدولون معاه وقت اطول حتى يمديه يتهيأ للحضور
هذا لايعني انك لو قدمت على فرصة بولايه ثانية غير ولايتك ان محد بيتصل عليك. لكن خلك في موقف الشركة. ماراح تخلي احد يجي من ولايه ثانيه حتى يعمل مقابلة وفي احتمالية انه مايُقبل، اضافة انها بتاخذ وقت اكثر بالنسبة لهم، فا ليش ينتظرك وهو يقدر ينسق موعد مع واحد في ولايته ويحضر بكره؟
وبعطيك مثال شخصي، انا تخرجت من ولاية Rhode Island اصغر ولاية امريكية فطبيعي الفرص فيها لاتقارن مثلا بنيويورك اللي تبعد عني كم ساعة. فا كنت اقدم على الشركات وماكنت القى تجاوب بحجم الفرص اللي تقدمت عليها. فبدأ يساورني الاحباط للامانه. او يكلمونك يعرضون عليك وظيفه بغير تخصصك.
فكونك OPT انت مقيد بالعمل بامتداد تخصصك وممنوع انك تعمل خارج نطاق تخصصك. فا ماكنت متوقع القلة بالردود. انتقلت لواشنطن العاصمة. وحدثت بياناتي في المواقع اني انتقلت الى واشنطن، الاتصالات تضاعفت! عرفت السبب مباشرة.
الخلل ماكان في شهادتي او طريقة التقديم، الخلل كان في مكاني. فا لو اني بقيت في Rhode Island وحدثت بياناتي في المواقع اني في واشنطن العاصمة مثلا او نيويورك كان ايضاً حصلت على مكالمات او ايميلات اكثر. فلذلك ذكرت فالبداية اعرف وين تبغى تكون قبل لاتقدم على الوظيفة.
طيب شخص في ولاية فيرمونت في اقصى الشمال والفرص فيها شبه معدومة بسبب قلة السكان. هل يكتب انه في Boston مثلا كونها اكبر المدن القريبة له؟ انا شخصيا اقول نعم. لان ان شركة توصل لمرحلة يتصلون عليك هاذي تعتبر مرحلة متقدمة. لو مابغاك من الاساس كان تجاوز سيرتك الذاتيه لشخص اخر
والمكالمات اكيد بتكون اكثر لو كان مكانك في مدينة اكبر من كونك في منطقة ريفية او قليلة السكان والفرص. فاذا كلمك وهو في بوسطن وانت في فيرمونت، تقدر تعرف من المكالمة هل الموضوع جدي ويناسبك او لا، اللي يهم هو ان المكالمات والايميلات تكثر لان هذا ايضا بيصقل تجربتك اكثر وتعرف الوضع.
واستكمالاً لموضوع المثال الشخصي، واجابة على الميزة الثالثة لـ Google Voice والموقف اللي صار بالمقابلة. سألني المدير. انت وين ساكن بالضبط؟ استغربت سؤاله قلت هنا قريب! قال لاحظت كود رقم جوالك من ولاية ميتشغان، وتوك تخرجت من ولاية رود آيلاند، وكاتب بالسيرة الذاتية انك من واشنطن!
فما اعرف انت وين تحديداً لذلك لاتستغرب من سؤالي، واكون معك صريح هذا من الاشياء اللي خلتني اتخوف لان ما اعرف انت وين هل تكون في ميتشغان ولا باقي في رود ايلاند ولا انت فعلا هنا. شكرته على سؤاله واني ماكنت منتبه لهاذي النقطة.
وهو نفسه اللي علمني على خدمة Voice من قوقل. ووضح لي ان رقمه الشخصي باقي نفس رقم ولايته الاصل اللي هو منها. لكن الرقم اللي يشاركه في اللينكدان ولا بموقعه الشخصي,الخ. هو رقم من قوقل على كود المنطقه اللي هو فيها حالياً.
اثناء المقابلة
السؤال الاول والاكثر تقريباً اللي راح تسأل عنه، هل تحتاج sponsorship؟ اجابتك ضروري تكون لا. انت كـ OPT امورك طيبة طول مابطاقة EAD تاريخها فعال. ماتحتاج sponsorship ابداً. يعاملك معاملة الامريكي عادي.
السؤال الثاني وهو مهم: لو سألك كم تتوقع الراتب؟ هاذي اجابة تحتاج منك ثقة بنفسك حتى لو ماعندك اي خبرة عملية سابقة. لكن اجابتك لازم ضروري تكون مبنية على حقائق وارقام. طيب كيف؟؟
بكل بساطة، موقع لينكدان و غلاس دور glassdoor.com فيهم خاصية يطلعون لك متوسط الراتب للمسمى الوظيفي و الولاية. يعني لو كتبت اسم التخصص، والولاية، ومستوى الخبرة بيطلع لك المتوسط. نسوي مثال؟
لو دخلت موقع غلاس دور وكتبت مثلا مهندس برمجيات مستوى مبتدئ، وبحثت في واشنطن العاصمة، بيطلع لك ان الراتب السنوي لهاذي الوظيفه بهذا المكان هو 80 الف سنوياً، والاحصائية هاذي مو من جيب الموقع، شوف التحديد الاحمر. بناءً على ٧ الاف راتب واحصائية حديثة فبراير الماضي.
يعني لو تجاوب وتقول بناءً على موقع غلاس دور ولينكدن، متوسط الراتب هو ٨٠ الف لشخص مبتدئ، وانا اشوف اني استحق نفس الرقم. انت اجابتك هاذي مو اعتباطية انك تبغى الراتب الفلاني وبس. او انت تقيم نفسك. هذا كلام معتمد على احصائية وبكذا الامور بتكون من صالحك ان شاء الله
ثانياً تأكد ان الشركه ما اعلنت عن وظيفة الا هم عارفين كم الراتب المتسحق. فبديهياً انه يعرض عليك مبلغ اقل من اللي تتوقعه. فإذا وافقت، كان بها واعطيته انت اللي يبي. واذا عرضت عليه احصائيات المواقع بيعرف انك باحث ومشتغل على نفسك وغالباً بيعطيك عرض افضل من عرضه الاول وانت الكسبان.
وموقع غلاس دور تحديداً ترا فيه ميزات عظيمة مثلاً عرض الاسئلة المعتادة بالمقابلات حسب التخصص والخبرة ايضاَ نفس موضوع الراتب. انصحك انك تدخل المواقع اللي ذكرتها فوق وتتفحص كل مميزاتهم وصدقني بتطلع باشياء جميلة تساعدك.
الى هنا انا اوقف واعتذر عن الاطالة واتمنى انها كانت مفيدة ولو في بعض جوانبها. حبيت اشارك معكم تجربة خضتها و اتمنى كل شخص يحرص على انه يخوضها. حاول وابذل الاسباب، وان شاء الله ييسرها لك. والله يكتب التوفيق للجميع ❤️
جاري تحميل الاقتراحات...