رتبها

بين سنة 1969و1971 لاحظوا إن في مشاهير كتير ماتوا بدون مقدمات،في اللي انتحر أو اتقتل وفي مات من المخدرات،مش ده الغريب اللي كان غريب فعلاً إن كلهم ماتوا عندهم 27 سنة..
ثريد عن أهم المشاهير اللي ماتوا في السن ده وأهم النظريات اللي بتفسر اشمعنا 27

اللي حصل ده خلي الناس تعمل حاجة اسمها the 27 club ده نادي وهمي يعني أي فنان بيموت وهو عنده 27 سنة بيبقي عضو في النادي ده

أول حد مات في السن ده كان روبرت جونسون، قال عليه اريك ليبتن إنه أعظم مغنيين البلوز الأمريكان، مات بعد ما شرب كباية ويسكي فيها سم كان حطهوله صاحب البار عشان كان بيعاكس مراته

بين 1969و1971 في 4 ماتوا أولهم براين جونز اللي أسس فرقة رولينج ستونز،لقوه غرقان في حمام السباحة في بيته بعد مازود جرعة المخدرات
تاني واحد كان جيم موريسون، المغني الأصلي في فرقة the doors، عمل معاهم 6 ألبومات ومات 3 يوليو 1971، وده نفس اليوم اللي مات فيه براين جونز قبلها بسنتين

بعدها ب3 أسابيع بس ماتت جانيس جوبلين اللي برضو مسيرتها كانت عبارة عن 3 ألبومات بس حققوا نجاح باهر وباعوا أكتر من 15 مليون نسخة، رابع ألبوم نزل بعد ما ماتت، عملت أغاني عظيمة لسه موجودة لحد دلوقتي، سبب الوفاة كان إنها زودت جرعة الهيروين

الرابع كان چيمي هيندريكس، بدأ كلاعب اليكتريك جيتار ورا مغنيين بس بعدها قرر إنه يبقي ليه طريق لوحده،كان بيستخدم تقنيات غريبة في العزف زي مثلاً العزف بأسنانه،العزف من ورا ضهره،رغم إن مسيرته مكملتش 4 سنين وعمل 3 ألبومات بس إلا إنه أعظم لاعب جيتار في تاريخ الموسيقي الأمريكية

في مشاهير تاني ماتوا في نفس السن زي ايمي واين هاوس وكيرت كوبين واللي لحد دلوقتي مش عارفين كان انتحار ولا قتل وحكايتهم طويلة ف خليها بعدين، دلوقتي خلينا نتكلم عن النظريات اللي موجودة علي نادي ال27

أول نظرية إن الموضوع كله صدفة مش أكتر، تاني نظرية وهي الأغرب إن الناس دول عملوا اتفاق مع الشيطان والاتفاق كان إنهم يوصلوا لأعلي درجات المجد والشهرة في مقابل إنهم يموتوا وهم 27 سنة

كان في قصة كده إن روبرت جونسون مكنش بيعرف يعزف عالجيتار بس في يوم العربية عطلت منه الساعة 12 بليل ونزل قابل راجل أسمر لابس بدلة وقاله أنا الشيطان وخد منه الجيتار وظبطهوله وخلاه من أعظم اللي لعبوا جيتار، اللي خلي الناس تصدق القصة هي أغنيته me and the devil blues وده كان كلامها

تالت نظرية هي إنهم ماتوا في السن ده عشان هم كانوا عايزين يموتوا صغيرين، وشهرتهم تزيد، ليدي جاجا طلعت في لقاء قبل كده قالت إنه في جملة مشهورة بين الفنانين وهي إنه لو أنت عايز تبقي أسطورة والناس تفضل فكراك علي طول لازم تموت وأنت صغير

لو ركزنا شوية هنلاقي إن الناس ديه لو مكنوش ماتوا وهم صغيرين كان هيبقي في احتمال إن مستواهم وشعبيتهم تقل مع الوقت وممكن يموتوا مغمورين، في ناس كتير بدايتهم كانت مميزة بس مكملوش، يعني مثلاً كيرت كوبين مبيعات أخر ألبوماته زادت 200% بعد ما مات، ف موتهم صغيرين بيخدم تخليد اسمهم

دول أغلب المشاهير اللي ماتوا في سن ال27 أنا حبيت اتكلم علي أشهرهم بس