رتبها

خلاص قررت
راح اصير مليونير

عندي مشروع خطير وكل مالي الاحظ توجه الناس فيه وتغير الترند بالسعودية بس والشركات اامنافسة نايمة
مشكلتي بالمنتج كيف أصنعه مدري

هاي للحين ما صرت غني
بس حبيت اذكركم اني بصير غني
ضبطو علاقاتكم معي من الحين 😂

اليوم سويت أول خطوة جريئة للمشروع بتكلفني ألف وميتين وخمسين ريال ومادري وش بيطلع معي عاد. نقول ان شاء الله يطلع شي زين

اليوم سويت استبيان نادر عن دراسة السوق حتى أخذ فكرة عنه. هدفي ان ١٠٠٠ شخص يعبيه مع انه رقم خيالي صراحة زين لو وصلت ١٠٠ 😥

الحمدلله جمعت ١٤٠٠ رد ع الاستبيان 😍 اكتشفت من خلاله معلومات ذهبية
والحمدلله المورد رد علي بس لسى ما عطاني الأسعار
يارب تكون أسعاره منطقية ☹

للحين ما صرت غني بس ترى بصير ✋لحد يزعلني.
راح اسوي تجارب على اللي موجود بالسوق. بتكلفني هالتجارب حدد الفين ريال بس بطلع منها بمعلومات ذهبية ومافيه اي دراسة بالنت عن هالتجارب👌.
وبناء عليها راح اصمم المنتج

وانا قاعد اكتب الايميل للمورد وخلصت خفت من كمية البيانات اللي كتبتها بناء على تفاصيل الاستبيان اللي سويته! يعني تخيل مثلا يعجبه مشروعي ويسحب علي ويروح يبيع ع التجار بالسعودية؟ 🙂. رحت وشلت التفاصيل والدراسة اللي سويتها عشان ما يطمعون. والحين بانتظار الرد. يارب الاسعار زينة😭

قبل فترة صديق عزيز علي طلبني اسوي له بزنس بلان. والحمدلله قدرت افوق توقعاته. وكانت ثاني مرة بحياتي اسوي بزنس بلان لكن تعلمت منها امور كثيرة خصوصا لما استشرت صديقي الفنان بالمحاسبة! ي جماعة ادرسو #محاسبة تراه فن! وبس يعطيني المصنع الاسعار بسوي البزنس بلان.

اكتشفت شي
التاجر السعودي اكثر شخص ما راح يفيدك. حتى لو بتفتح مطعم برجر وهو يبيع موز وتستشيره يحسب انك بتبيع برجر بالموز وتاخذ زباينه.
🙂

رد علي المصنع ووافق يعطيني عينات. لكن رغم ذلك ما عطاني الاسعار للحين. واضح ان المصانع ومحلات الجملة ما تحب تعرض اسعارها لكل المنتجات قبل تحدد النوعية اللي تبغاها. توي أدري 😅. وزاد شعور الخوف عندي، ايش لو فشلت؟ ايش لو خسرت؟ ايش لو ذا كله احلام وردية؟ الله اعلم!

اتخذت خطوة جريئة. حسيت اني مو فاهم ابد بالمشروع اللي بدخل فيه. واشتركت بكورس اونلاين ب ٤٠٠ ريال تقريبا على موقع
masterclass.com
عبارة عن منصة مدربينها محترفين على مستوى العالم بكذا مجال. هل قاعد اخسر فلوسي وبنسحب من المشروع قبل ابداه؟ الله اعلم!

www.masterclass.com

فعلا التخصص يؤثر بالواحد. بمشروعي قاعد أفكر تسويقيا وحملات ومدري ايش، وانا المفروض أفكر بالمنتج وكيف أصنعه! بس قدرت أطلع برسالتين لمشروعي تقوم عليها كل أركان المشروع. يلا قاعد مو امشي خطوة للأمام، قاعد أزحف ١ سم للأمام 😅.

مدري هو الناس لما تقولهم ابي اسوي مشروع وابغا خدمة تسحب عليك وتصير ضدك او حسد او ايش ماني فاهم. اللي تعلمته، لما تبغا تسوي مشروع اعرف ان محد بيوقف معك. حتى خدمة بمقابل مادي مو محصل 😅. والشي الثاني، لما تكون بعيد عن المشروع اعرف ان انجازك ٠%.الموضوع صار عناد مسويه مسويه 😡

والمشكلة اللي يقدم لك خدمة وتنتقد خدمته بتنحط بموقف "احمد ربك عطيتك من وقتي" فتنحط فموقف الشرير. لا ي حبيبي اذا خدمتك زي وجهك من الاساس لا تقدمها زين؟ 🙂. كذا ارتحت لما فضفضت

قاعد ازحف ١سم بكل خطوة والخوف والقلق يزيد مع ازدياد الجدية.
واخيرا لقيت الشخص اللي أدور عليه ووافق يخدمني بمقابل. صدمني السعر لكن احترافه خلاني ما أقدر أجادله بس اجاباته ع استفساراتي واقتراحاته تسوى ذهب. بشوف العينة المرئية بعد اسبوعين! 😥 وبيكون اول تجسيد للمشروع. حماس مع قلق

اي صح وكلمت وكالة دعاية واعلان ع اساس يصممون لي هوية للبراند وادارة محتوى وتصوير منتجات. بس لسى ذي شي بعدين بس حبيت يكون عندي تصور مبدئي للتكاليف.

توي خلصت من اجتماع وكالة الدعاية والاعلان. واخذت مني تفاصيل المشروع واحتياجاتي. استغرق تقريبا نص ساعة الاجتماع وتكلمت مع مصمم. عجبتهم فكرتي (بس يمكن يسلكون لي هههههههههه). قالو الاحد بنعطيك التسعيرة كاملة بالتفاصيل. حلو حلو! بضيفها للبزنس بلان حقتي. هوية+باكج+صناعة محتوى+تصوير.

الله يستر لا يكون اهتمامي بالمشروع هو بسبب هروبي من كتابة رسالة الماجستير اللي لازم أسلمها ب 21 أغسطس! تعرفون كذا لما يكون فيه شي غصب تسويه, تصير تبغا الهروب من الواقع وتقعد تشتغل ع اشياء ما تهمك في الوقت الراهن. الله يستر ويصير ذا كله هياط :).

الشخص اللي بيساعدني اقترح علي مجموعة كتب. عندي تقريبا 4 كتب كل واحد أكثر من 400 صفحة لازم أقرأهم عشان أثقف نفسي بهالمجال + دورة بهالمجال ما خلصتها لسى. ماتوقعت البزنس يبغاله تثقيف لهالدرجة. مدري كيف الناس تسوي مشاريع بدون دراسة ولا خرابيط. اي والله التوفيق من الله!

أعوذ بالله من الشيطان يوم بغيت اكمل كتابة رسالة الماستر رد علي تاجر الجملة وعطاني الأسعار. الأسعار صراحة حلوة وعجبتني. يعني بيكون الوضع ممتاز والربحية بتكون عالية. برسل ايميل للشخص اللي بيساعدني وبقوله عن الاسعار واشوف رايه لان قال لي سعر منتجك لازم ترفعه لأنك مابتربح. نشوف.

بشارككم بعض التعليقات من الناس اللي قلت لهم عن فكرتي: "الناس عجازين ماراح يسوون هالشي"، "ياعمي لو المنافس نزل سعره مية ريال بتخسر"، "فكرتك مافيها شي يميزها"، "لا تسوي كل شي مرة وحدة"، "السوق مليان"، "وش يضمن لك الناس بتشتري؟". "سعرك مرة مرتفع بيشترون من السوق ارخص".

ردو علي وكالة الدعاية والاعلان وعطوني الاسعار. توقعتها أكثر بس لما ناظرت بالخدمات مقابل الخدمة حسيت ان المبلغ كبير. مدري محتار بستنى واشوف مع اني ماسالت غيرهم. ويبقى السؤال للمشروع الناشئ: أسوق بنفسي أو أصدّر التسويق خارجيا

مثل ماقلت قبل، هالثريد هو مدونة لمشاعري. سويت البزنس بلان واكتشفت اني احتاج اغامر ب ٣٠ الف. المضحك ان هالرقم هو اجمالي مدخراتي وانا لسى ماتزوجت وماعندي سيارة. فيعني لو خسرت هالرقم ببدا من الصفر حالي حال اي واحد توه متوظف. الحين تأكدت ان راس المال مو المشكلة، المشكلة هي قوة القلب

كثير يقول نبغا نسوي #بزنس بس مشكلتنا راس المال. أرد عليه: صدقني مو هذي المشكلة. لان حتى لو عندك راس المال، بتكون جمعته بكد وتعب. وبيصير صعب جدا عليك انك تسوي بزنس بسبب الخوف. تخيل تخسر راس مالك او بمعنى اخر "فلوس من عمرك". خل اوضح لك الخوف بطريقة أخرى. وهي تحويل الفلوس الى عُمر.

خل نفترض راتبك ١٠الاف بالشهر. راس مال ٣٠ الف يعني مجهود ٣ شهور عمل من عمرك. لو خسرت، كأن ٣شهور من عمرك تبخرت.
طبعا هذي نظرة سوداوية جدا. لكن هذا الواقع اللي أعيشه من قلق وخوف. لذلك المشكلة مو راس المال. المشكلة لو عندك راس المال، هل مستعد تغامر؟

بكلا الأحوال انا بغامر ب٣٠ الف. حطيت عدد معين من المنتجات لو قدرت أبيعه بطلع راس المال. وبجرب لمدة ٣شهور. ان ظليت خسران، بنسحب 💔. هبدأ في ١اكتوبر وتنتهي التجربة ب ٣١ديسمبر.

اليوم ثاني اجتماع وكالة الدعاية والاعلان بفاوضهم ع السعر لان مرتفع جدا ع حجم مشروعي حاليا. ميزة الوكالات انها تريحك من التسويق والتخطيط والتصميم. لكن لو استغنيت عنهم بتصير انت الكل بالكل وبتضطر تتعامل مع فري لانسرز صحيح أرخص بس بتكون أنت محور التنسيق والربط.

جبت العيد جبت العيد لالالالا قاعد اغني
اكتشفت غلطة سويتها كبيرة جدا بمشروعي. يجماعة دارس تسويق بكالوريوس من البترول وباخذ الماجستير بالتسويق الدولي الاستراتيجي (الف خط تحت استراتيجي) من اقوى جامعات بريطانيا، واشتغلت بالتسويق، ورغم ذا كله سويت غلط ما يسويها خريج دبلوم ماعنده خبرة

اول سويت استبيان قلت لكم وجمعت بيانات ١٤٠٠ شخص صح؟ ومستانسس وشوفو كم صار لي من سويته وتوي اكتشف حجم الغلطة!
ي جماعة، نسيت احط سؤال بنهاية الاستبيان عن اذا اطلقت مشروعي هل اتراسل معهم واعطيه خصم! 💔💔 باختصار جمعت بيانات ذهبية عن ١٤٠٠ شخص بدون وسيلة تواصل

اه ي قلبي ي غباااائي
انتم تعرفون حجم هالغلطة وش يعني؟ البيانات اللي جمعتها دقيقة، لو طلبت من الشخص يدخل ايميله كان بمجرد اطلق مشروعي بيكون عندي قاعدة بيانات ضخمة اقدر بكل سهولة اني استهدف الشريحة المناسبة لي وارسلهم وكان بيكون تسويق مجاني ذكي وببضمن لي مبيعات وقت الاطلاق

توي خلصت اجتماع مع وكالة الدعاية والاعلان. الحمدلله سوو لي خصم صغنون. حاولت اقلل التسعيرة وقالو حنا من الاساس مسوين لك خصم لاننا نعرفك.
لكن اكتشفت شي ماكنت اعرفه، طلعو راح يمسكون خدمة العملاء. شي جميل والله.
وفوقها بيصممون لي المتجر الالكتروني!

مع ان اللي بيصمم لي المنتجات قال بتستلمها خلال اسبوعين الا ان طلع الموضوع اصعب واطول ما تتخيلت.
فعلا مرحلة تصميم المنتج تاخذ وقت وفوقها حتى لو خلصت هالمرحلة برجع لها كل شوي عشان اطور المنتج لانه بيكون شي مبدأي.

هاي هذا انا ماصرت غني للحين
وحدة من الامور اللي تخوفني واللي هي نقطة ضعف فيني هي سوء الادارة المالية. فصرت استعمل تطبيق MoneyLover لادارة المصاريف الشخصية (متوفرة ع كل الانظمة). لان الموضوع يخوف لو تفكر فيها، اذا مو قادر تدير راتبك، كيف بتدير حسابات مشروع الاف داخله والاف طالعة؟

الثلاثاء إلى #جده عشان اقابل تاجر الجملة وتكون اول مهمة ميدانية

وصلت جدة وقابلت تاجر الجملة. اكتشفت ان قرائتي الدسمة للكتب فادتتي كثير لدرجة قابلت صاحب الحلال وانبهر من معلوماتي. حتى الموظفين عنده ماقدرو يلحقون معي بالمعلومات. ماتوقعت القراءة قبل تسوي بزنس مفيدة ولكن فيها عيوب بذكرها لاي شخص يبغا يسوي بزنس وهي مهمة جدا

القراءة فوائدها عظيمة خصوصا لو تقرا بالانجلش. لكن لو ظليت تقرأ عمرك ما هتتخذ اول خطوة بالمشروع ودلان القراءة هتخليك بمنكقة الراحة. لانك تقرا مع كوب قهوة ولا تشتغل ولا شي. وبنفس عشر ساعات قراءة يا دوب تغطي الخبرة اللي تكسبها من ساعة بحث ميدانية. لذلك.. يتبع

لذلك لما تبحث ميدانيا وتشوف المحلات والبضايع الخ، راح تكسب خبرة بوقت اسرع من لو ظليت تقرا وتقرا. اقرأ لك كم كتاب ولخصهم وخلهم مرجع لك وغوص بالسوق ي معلم. بكرا لي زيارة ثانية لمحلات الجملة 👌

وتأكدت من معلومة يمكن تصدم بعضكم. ترى كثير شركات ما يصنعون المنتجات بنفسهم خصوصا المحلية سواء ميك اب او عطور او غيره. يزورون معارض مصانع بمجالهم بمختلف دول العالم وياخذون عينات يجربونها ويعرضونها ع الادارة واللي يعجبهم يشترون من المصنع بالطن ويحطون الستكر حقهم عليه ويبيعونه

ان مشا المنتج كان بها، وشرو منه اكثر. ما مشى شافو غيره. وهكذا. لدرجة احد محلات العطور المحلية يشتري ١٠٠ صنف سنويا تقريبا ومايبقى منها غير ٣٠ يثبتون بشكل دوري. الباقين يسوون عليها خصم وما يجيبونها ثاني. لذلك معارض المصانع لعبة الشركات هنا 😂

والمشكلة ان شركة العطور ذي عندهم قسم اسمه فخم New Product Develooment
ولما سألت موظف فيها وش هالقسم. قال هذول اثنين بالقسم يزورون معارض بجنيف وفرنسا للمصانع ويشمون العطور ويجيبون شناط عينات يعرضونها ع الادارة. قلت بس؟ قال بس! لما قلت هالسالفة لابوي زمان، قال سياحة ذي 😂 انشهد!

وانتهت رحلتي الميدانية في #جدة الحمدلله بعد ما حصلت على معلومات ذهبية وعينات للمشروع. كلفتني هالرحلة توتال مع السكن والاكل وتذكرة ذهاب فقط والتنقل (استئجار سيارة) والعينات وكل شي ١٧٠٠ ريال من ١٠ سبتمبر الى ١٣سبتمبر.

تتذكرون لما قلت لكم اني كلمت وكالة دعاية واعلان قبل؟ مؤسس الوكالة لما قلت له عن مشروعي قال لي عن موظف عندهم له خبرة بالمجال اللي انا بدخله. وكلمت اليوم هالموظف واخذت منه معلومات ذهبية. البزنس علاقات. شخص يدلك على شخص يدلك على شخص وهكذا. واكتشفت انه عنده مصنع صغير يقدر يصنع لي 👌

الان بديت أدخل بموضوع اللوجستيات. ماتوقعت البزنس عبارة عن سلاسل متواصلة ببعض لهالدرجة. اي ضرر باي حلقة بين أي سلسلتين راح يدمر السلسلة كاملة. واكتشفت انك تقدر تشتري بوليصات شحن بالجملة اقل شي خمسين فاتورة ب٢٥ ريال الحبة عشان يطلع ارخص من لو تشحن فردي بفدكس ب١٠٠ ريال لعملاءك

امس كانت جلسة نقاش مع مصمم المنتجات. واخذت منه الفاتورة النهائية. كانت التكلفة أكثر من الرقم اللي حطيته بالبزنس بلان ب ٨٤% يعني تقريبا دبل. وبيستلم نص المبلغ خلال هاليومين. بمجرد توصل له الفلوس، ماعاد فيه رجعة. الوضع صار مو مزح! عقلي يقول لي يعمي وش لك بهالسوالففف ودوخة الراس

مثل ما قلت لكم، دخلت بسالفة اللوجستيات واكتشفت ان منصة سلة ممتازة للي يبغا يبدا يتاجر الكترونيا. الباقة عندهم ب ٩٩ ريال الشهر وتقدر تشتغل بدون سجل تجاري لو تبغا تجس النبض. وتقدر تشتري بوليصات شحن الحبة ب ٢٨ ريال واقل عدد هو ١٠ بوليصات لكن اكتشفت شي يخوف بموضوع الدفع الالكتروني

اذا تبغا تفعل خدمة الدفع الالكتروني مدى؛ حط ف بالك انك بتدفع لهم ١،٧٥% من قيمة العملية + ريال على كل عملية. واذا بتفعل فيزا وماستر كارد بتدفع لهم حدود ٢،٧٥% على كل عملية.
رحت اشيك ع سوق.كوم لقيته ياخذ من ١٠ الى ٢٠% على كل عملية بيع ونفس الشي امازون. سلة ممتاز ماياخذ نسبة

كلمت اللي بيصمم المنتجات قال لي ان شاء الله اخر موعد ١٢ اكتوبر. قال "مشروعك أطول من حياتي" لان اول مرة ينحط بهالقيود. رغم خبرته وشطارته الا ان مشروعي شكّل له تحدي الله يعينه. بمجرد يسلمني اياها بعطيها للمصنع عشان يعطيني تسعيرة الصناعة. وبنفس الوقت بكلم الوكالة يصممون الهوية.

تمدد الموعد النهائي الى ٢٢اكتوبر 😂.
لكن استغليت الوقت ونشرت استبيان ثاني وجمعت ٢٠٠٠ رد من تويتر لكن اكتشفت ان تويتر طبقته مختلفة جدا عن انستقرام وسنابتشات. فبضطر انشره عند مشهورات سناب وانستقرام لعل وعسى اوصل للتارقت ماركت حقي.
لكني اقتنعت اني ماهسوي اكاونت لمتجري بتويتر

نسيبي عجبته فكرة مشروعي وقرر يدخل معي ٥٠/٥٠ بالفترة التجريبية فقط بحيث ياخذ نص الارباح ويطلع. بمعنى اخر ما يمتلك حصة من المشروع.
وحاليا شغال على كتابة التقرير للاستبيان اللي سويته.
الشهر الجاي بيكون عاصف

اليوم انصدمت صدمة كبيرا. بكرا بحكيكم عنها.

#بحوث_التسويق
ماني قادر أنام من الصدمة ابغا افضفض قبل هالمشاعر تروح مع النوم. انا قلت لكم اني سويت استبيان ثاني وجمعت الفين رد من تويتر. ثم نشرته مرة ثانية قبل خمس ساعات عند مشهورة بسناب عدد مشاهداتها ٧٠٠ الف وجمعت للحين ٥٠٠. يعني توتال ٢٥٠٠ صح؟ مافيه اي اختلاف بالنتايج.. يتبع

بين اللي جمعت عندها الفين واللي جمعت عندها خمس مية. النتايح نفسها من ناحية #سلوك_المستهلك مثل السعر وعدد المنتجات اللي يستخدمونها الخ. لما وريت النتايج للي قاعد يصمم لي المنتجات ما اقتنع ابدا قال ارقامك مو حقيقية! مو معقولة ان هذول يدفعون كذا س على هالمنتج. (طبعا انا ببيع اغلى)

وقال انا اثبت لك. وسويت حركة ممتازة باني سويت ملف استبيان خاص فيه عشان ماتختلط النتايج. يعني كل شخص نشر لي الاستبيان عطيته ملف خاص فيه. جاني من هالمصمم ٥٥ شخص عبا الاستبيان وهنا الصدمة الكبرى! النتايج كلها تغيرت ١٨٠ درجة حرفيا!! كل الاسالة نتايجها تغيرت !!!! شكلكم مافهمتو بشرحلكم

يعني الان عندي ٣ملفات. واحد فيه ٢٠٠٠ من تويتر وواحد ٥٠٠ من سناب (ةهالفئتين نفس النتايج) وواحد من هالمصمم اللي نشر الاستبيان عند محيطه وعباه ٥٥شخص. الاول والثاني نفس الشي، الثالث مختلف جذريا! هذي اول مرة بحياتي اشوف كونسبت #الشريحة_المستهدفة على ارض الواقع! شكلكم لسى مافهمتو صدمتي

انا قاعد اسال عن نفس المنتج! هذول تستعمله وتدفع له بطريقة مختلفة تماماااا عن الفئة الثالثة! درست التارقت ماركت لين مليت لكن شوفته ع ارض الواقع شي يخوف! ليش؟ لان نتايج التويتر والسناب حطمتني الناس تدفع شي قليل مرة لهالمنتج. لدرجة شكيت بفكرتي قلت ياربي يمكن محد بيشتري مني بعدين!

بمعنى اخر، تخيل سويت المنتج واعلنته عند اللي نشر لي بتويتر او مشهورة السناب هذي. شريحة متابعينهم بتجلدني بالكلام ع اسعاري (رغم انها بتكون جودة وربحي مو زي ربح المنتحات الرخيصه اللي يشترونها ويتشكون منها) وبخسر هذا اذا ما تحطمت وبطلت اسوي المشروع من الأساس!

انا جمعت ٢٥٠٠ رد! هذا رقم مو سهل. لكن ماتوقعت ابدا ان هال٢٥٠٠ هم من نفس الشريحة حرفيا! اعتبره كأنه حوض سمك وتسحب منه. كل السمكات بتكون نفس اللون والشكل ما هيتغير شي. لكن ٥٥شخص خلوني انصدم ان فيه أحواض ثانية بأسماك مختلفة. والمصمم لما نشر الاستبيان عند محيطه سالوه... يتبع

سالوه قالو مين صاحب هالمشروع نبغا نشتري منه! مع انهم شافو فقط اسالة الاستبيان وحسو ان فيه جودة وتعب بالموضوع ويبغون يوصلون لي! الآن تأكدت أن زبايني موجودين وينتظروني ومستعدين يشترون حتى! الصدمة اللي حسيتها بالنسبة لي مكسب وعلم بال #تسويق لدرجة لو ماكملت مشروعي بكون كسبان!

بعطيكم زبدة دروسي اليوم
١/ مو كل المشاهير نفس الشي حتى لو عندهم خمسة مليون متابع. انتبه انتبه قبل تبدا مشروعك مين الزباين اللي قاعد تدرسهم بالضبط! لا تحطم نفسك ببيانات شريحة غلط
٢/ مهما درست، يظل الميدان عالم آخر
٣/ مفهوم #الشريحة_المستهدفة بال #تسويق ترى مو مزح! تراه جد ويخوف!!!

٤/ ترى منصة تويتر وانستقرام وسناب مو نفس الشي. الناس اللي فيهم مختلفين. انا كمثال اكتشفت ان تويتر كلش ماتصلح شريحته لمشروعي ولا هسوي حساب فيه. بمعنى اخر، فكر استراتيجيا مو تفتح حساب لمشروعك بكل المنصات وتضيع بينهم. شوف وين جمهورك وروح لهم. هفتح انا فقط بانستقرام+ موقع سلة.
انتهى

اوبس! توي اكتشف اني استعملت علامات تعجب كثير بالتغريدات اللي طافت. بس المهم واضح الصدمة 😂. اذا نجح/فشل المشروع راح اوريكم مقارنة لنتايج الاستبيان حق الشريحتين المختلفات بعدين.
Stay tuned for next episode!

الحين عرفت ليه اللي يفشل مشروعه تتكسر مجاديفه ويبطل يسوي مشروع ثاني. لانه فعلا متعب ويحتاج تفكير وشغل. اللي مشجعني الحين هو ان فيه ناس منتظرة مشروعي ينطلق عشان يشترون مني. اخ بس متى يجي ٢٢اكتوبر عشان نبدا شغللل

اليوم قابلت مليونير تاجر سعودي-أمريكي يصير خال صديقي. وعزمنا ع الغدا وتعلمنا منه أمور بالبزنس وطرحت له فكرة مشروعي. بالبداية انتقدها. ولماوقلت له حجم السوق قال "والله very big!" لدرجة ماصدق وعلمته كيف وصلت للارقام وقال صحيح. ولما قلت له عن الاستبيانات اللي سويتها انصدم اكثر

الجلسة معه خلتني اثق بنفسي اني scientific وقاعد امشي بدراسات مو 'طقها والحقها' وهالشي شجعني. لكن الميدان محد يختلف انه ممكن يشقلب كل شي. وبنهاية الغدا قال علمني وش يصير معك بالفترة التجريبية يمكن تحتاج مستثمر 👌. يلا هانت.

للأمانة وأنا قاعد احلل نتايج الاستبيانات اللي سويتها اكتشفت شي. ترى الزبون ما يبغا منك منتج خرافي. يبغاك تكون صادق معاه وتحترمه وما تستغبيه فقط.

يوم الاثنين إلى #الرياض برحلتي الميدانية الثانية وبتعتبر أهم رحلة. قلق وتوتر. الموضوع كل ماله يصير جد 😶. راح اقابل الوكالة +المصنع+الوكيل. بقضي فيها الى #الخميس

هنا الرياض. بما اني ابغا اصير بزنس مان صاير افكر بالتكاليف. القطار من الدمام للرياض ب ٧٨ ريال 👌. الطيارة كانت ب ٣٠٠. برمي اغراضي بالشقة ونبدا شغللل 👌. وترى استلمنا تصاميم المنتجات 😎. انتهت المرحلة الثانية بنجاح.

المرحلة الأولى كانت تخطيط واستبيانات
المرحلة الثانية كانت تصميم المنتجات بشكل مرئي
هالاسبوع: المرحلة الثالثة بتكون الحصول ع أصناف المواد والاسعار الدقيقة + تصميم الهوية
المرحلة الرابعة بتكون التصنيع: هذي تعتمد متى راح احصل ع المواد وقد ايش حساباتي دقيقة بالمرحلة اللي قبلها

جلست أمس مع الشخص اللي عنده معمل مصغر ووافق يسوي لي عينة 👌. وجلست مع مصمم الجرافكس وشرحت له الفكرة بالكامل وقال انه هذا اكثر مشروع متحمس له خصوصا اني معطيه الحرية الكاملة وهذي نادر تنعطى للمصممين وقلت له لك اكثر من شهر تروق ع الهوية. والحين بقابل تاجر جملة ثاني. يارب 🤲

فاصل اعلاني
#بلونا تفاح اطلق تفاح

قابلت تاجر الجملة ماكان فيه اي اختلاف بالاسعار الا بشي بسيط. وقابلت وكيل نسبة وهذا عبارة عن مكتب فقط يتعامل مع مصانع برا ويجيب المواد لك. ولما جلست اسولف معه عرفت ان الجمارك موضوعهم مو سهل. ويبغالي اقرا فيه لكنه نصحني نصيحة ابوية اني اشتري محلي لان ما بيفرق السعر ابد عن برا

قال لي الوكيل انه ميزة الاستيراد من برا انه يجيب لك المواد على طلباتك وتقدر تجيب شي مو موجود محليا. لكن كسعر يمكن يطلع اغلى حتى لان على حجم مشروعي مهما شريت ما هتكون كمية كبيرة لدرجة تنقص السعر. فلذلك الجود من الموجود. ع الاقل بالمرحلة الحالية 👌.

يعني بخصوص الجمارك مثلا: على حسب نوع المنتج له نسبة تتراوح بين ٥% الى ١٥% من قيمة الفاتورة. هذا غير رسوم القيمة المضافة +رسوم التنزيل والاجراءات+وطبعا رسوم الشحن اللي بتكون عليك. دوخة راس ع مشروع صغير صراحة.

ونرجع لسؤالي المهم: لو وفرت المواد؛ وين القى مصنع كويس يصنعها؟ كل ما تجاوب ع سؤال يجيك سؤال اصعب.
وشعوريا: قاعد اقول بنفسي هااه ترى يمديك تنسحب حتى لو خسرت مبلغ التصميم والتنقلات. يعني شعور الرغبة بالانسحاب يروح ويرجع. ماتوقعت ان اللي يسوي مشروع يصير له حرب نفسية مع ذاته.

خلاص بكرا هوقع عقد تصميم الهوية 👌 والاستلام خلال شهر كذا. مع ان الوكالات يخوفون. يعني شغالين بزنس بالنهاية يبغون يقفلون المشروع بسرعة فعادي عندهم يخلصون لك الشغل بيومين ويسلمونه لك بعد شهر ع اساس انهم تعبو فيه 😅. ويسوونها كثير ترى. لكن غالبا الهوية تاخذ ٢١يوم عمل.

أمس طلعت مع صديقي وجا صديقه محامي وجلسنا سوى. كانت أجمل سهرة قضيتها بالرياض وكنت طول الوقت اسال المحامي واخليه يسولف اتعلم من قصصه ومن قضاياه واهمية المحامي بكل شي وعن كمية جهل الناس بأهميته. واكتشفت ان الاستشارة عند محامي تكلف ٢٥٠ الى ٣٥٠ ريال بس! كنت احسبه اغلى. ومهمة بكل عقد.

وضعي غريب رايح للمول بشنطة السفر 😂. الحين متجه للمطار لاني ماحجزت قطار وخلصت التذاكر. يعني بدال ما ادفع ٧٨ للقطار سعر الرجعة دفعت ٣٨٨ سعر تذكرة 💔

عندي ملف اكسل جمعت فيه اسعار الجملة من رحلتي للرياض وجدة. وعندي البوم صور للمواد بالاسم والتفاصيل. اللي بيصمم لي المنتجات خلصها بدون الوان ومواد عشان لما يسلم لي المشروع يكون خلاص جاهز. لكن لسى ماشريت المواد بسبب تعدد الانواع. لكن بشكل عام التكلفة عالية ع الجودة اللي بسويها 💔

أعطيكم مثال، سعر منتجي بيكون اغلى ب ١٥٠% من اللي يدفعونه الزباين. لكن اغلب الزباين تشتري جودة جدا سيئة بسبب كثرة الغش بهالمجال ويتلف معاهم بسرعة. هل بيشترون مني لما تكون جودتي عالية؟ الله اعلم. الموضوع فيه تحدي كبير.

توي كلمت تاجر جملة انتظره يرسل لي صور المواد لي كم يوم وساحب علي ولما كلمته قبل شوي قال ممنوع نصور لزبون مانعرفه 😅. ي شيخ ع اساس منتجاتك جايبها من الجنة. *** عليك انت وبضاعتك. عطاني رقم الادارة أستاذن منهم. المشكلة اني جايهم من طرف زبون دايم عندهم. يبغاني انا اجيه للرياض واصور.

فاضي لك أطق مشوار من الدمام للرياض عشان كم صورة. لو بطق هالمشوار بطقه عشان اجي اتفل عليك وامشي. بكلم الادارة ناخذ الاذن منهم. ع اساس اذن من وزارة الداخلية. لو اني مو جايه من طرف زبون دايم يعرفه كان اتفهم عادي.

اي احد يبي يسوي بزنس ي يسويه بالرياض او لا يسويه. كل شي بالرياض 😡.
المهم اسف انفعلت. بس مثل ماقلت لكم بعبر عن مشاعري اول باول بهالثريد.

اكتشفت اني عجل جدا. لازم أروق المنقا. واضح المشروع بيطول لين يتم اطلاقه. كلمت تاجر جملة ثاني وبيرسل لي صور الثلاثاء يمكن وواضح انه متعاون. للحين كلمت اجمالي ٤ تجار جملة مواد غير اللي سالتهم ع السريع وغير المحلات اللي شفتهم.
كنت حاط ف بالي ١ اكتوبر اطلق المشروع. يحليلي بس.

سجلت بموقع B2B هندي حق مواد لمشروعي. اقرفو اهلي. المشكلة اني دخلته عشان بس ارسل مسج لمصنع محدد له حساب فيه. راح الموقع وارسل رسالتي لكل المصانع بالموقع وطفشوني بالواتساب وايميلات.
نفس الشي صار لي ب Alibaba.com
😡 سيبوني بحالي

Alibaba.com

شسمه ترى بهالتغريدة امزح موب لازم بس الرياض سوق ضخم. ماعلينا، بهالفترة هذي قاعد انتظر اللي يصمم لي المنتجات يضبط الاحجام والالوان وبنفس الوقت انا رجعت لاستبياناتي الثلاثة (توتال ٣٤٠٠ رد) وقاعد اصفهم بملف اكسل واحد عشان احللهم سوى. لاني حللتهم منفصلين

الوكالة يبغالها شهر عشان تصمم الهوية لي شعار وباكج الخ. التكاليف اللي دفعتها كلهااا مسجلها بملف اكسل بالتفصيل عشان لو لو لو بدخل معي مستثمر بعدين يعرف كم صرفت وما يجي يقول بعطيك ٥الاف وعطني ٥٠%.
بس تدرون، احس احتاج اجازة من الفكرة واروق والله. باخذ بريك من المشروع

اسبوعين بعيد عن الفكرة ولا شيء جديد. الوكالة ما سوو شي حتى اسم ما اختارو مع انه باقي اسبوعين ع التسليم. والمصمم تبع الوكالة ما كلمني غير مرة فقط سألني سؤال واختفى. كل موعد تسليم حطيته من بداية المشروع تمدد شهرين ع الأقل. خطتي الاصلية المفروض اني قاعد ابيع الحين.خيره ان شاء الله

رحت الكويت وقابلت هندي عنده معمل وطلبته يصمم لي عينة. الخميس بسافر الكويت بشوف العينة.
مصمم الجرافكس اطرد وراه عشان يشتغل ومؤسس الوكالة ماعمره رفع السماعة علي مادري على ايش مسوين وكالة تسويق صراحة.
اليوم بكمل شغل ع البزنس بلان ان شاء الله 👌
مرحلة العينات اصعب مرحلة

قاعد ادور سعوديين/ات متميزين يصنعون لي المنتجات ماحصلت. حاولت اتواصل مع كليات بهالتخصص ومايردون. كلمت بعض الطلاب وماهم مهتمين. واذا تخرجو قالو حنا عاطلين 😅. ي طلاب استثمرو وقتكم واقتنصو الفرص لا تنتظرون لين تتخرجون

انسحبت من الوكالة وأجلت موضوع الهوية لين أصنع عينات وأشوف الجودة. اليوم بروح للكويت عشان أستلم أول عينة. وبعد اسبوع ونص بروح الرياض عشان اقابل راعي مصنع. اسعار المصنع للأمانة غالية جدا ويجادل بأنهم جودة شغلهم عالية. نشوف!

امس كانت رحلة غريبة وصنعت أول عينة حية. اهلي طقطقو علي لين قلت بس 😂. مرحلة التصنيع عالم آخر. التخطيط صعب والتتفيذ أصعب.

ما زلت عالق في مرحلة التنفيذ. عندي التصاميم على ورق لكن مالقيت شخص ذكي كفاية انه يصنعها. اغلب المعامل مجرد مكاين يبغون تجيب لهم عيناتك كاملة وينسخوها لكن انهم يفكرو ينقلوها من ورق الى واقع ما يبغو يفكرو. واللي صمم لي المنتجات للاسف مايبغا يشغل نفسه بتنفيذها لضيق وقته.

كنت ناوي اروح الرياض اقابل معمل بس بكرا بكلمه بقول برسل لك ايميل التصميم وورني شطارتك ونفذه لي وارسله لي بريد. لو شغله مو تمام وقتها ماعرف شسوي صراحة.

اكتشفت الحين ليه الشركات يشترو منتجات جاهزة من الصين ويحطو اسمهم عليها. اريح لهم بكثيير بدون الحاجة لدراسات تسويقية وتطوير وتفكير.
وهذي ذكرتها سابقا ان اغلبهم كذا اصلا يشترون الاشياء جاهزة.
لو تبغا تسوي مشروع ومافبالك شي، جرب تسافر للصين 👌.

حاليا في فترة ركود انا. لاني خلصت مرحلة ومو قادر ادخل لمرحلة العينات والتصنيع. ماتوقعت الموضوع يمشي بطيء كذا.
لكن ان شاء الله خير بالأسابيع الجاية.
وبكلا الاحوال لو فشل مشروعي لا سمح الله راح أنتقل للخطة ب 😈. الخطة ب هي استهداف شريحة مختلفة بسعر أقل بكثير بس بمواد أرخص.

بدت تركب راسي فكرة الخطة ب. خطة عملية واغلب الاسواق ماشي عليها
اشتر منتجات جاهزة وصورها وبيعها 👼. ومتى ما منتجاتي المتعوب عليها ضبطت اسويها ببراند مختلف ع الاقل يكون عندي كاش وفاهم للسوق. خلاص بسافر للرياض بعد اسبوع وبحسم الموضوع.

قابلت اليوم علي العثيم ماني مصدددق
وقدرت اسرق من وقته وقطيت وجهي عليه وشرحت له مشروعي وقلت انا محتار بين خطة أ (هاي كوالياي وسعر عالي) وخطة ب (لو كواليتي تو ميديوم بسعر مناسب جدا) ووريته ارقام استبياناتي وحجم السوق.
قال لي: رح مع السوق الكبيررر!! ... يتبع

قال خطتك أ اصلا سعرك فيها يعتبر قليل! تعطي مواصفات روز رايز وتطلب سعر مرسيدس! دبّل ام السعر. لكن موب الحين. خلك بالخطة ب لين توقف ع رجولك وقتها تدخل بالخطة أ وتكون شوو تسويقي لك. واصلا مواصفات الخطة أ ما راح تقنع الشريحة بالسعر ذا بيقولون مستحيل الا اذا دبلت السعر تدبيل

ماني مصددددق اني قابلته 😭😭😭
بس عطاني نظرته كبزنس مان وهذا اللي احتاجه. البزنسمن يعتمدون ع الزخمم وحجم السوق بالمعيار الاول
وارقامي بالاستبيانات تصرخ وتقول روح لخطة ب

الحين انا بالغرفة التجارية بملتقى ريادة الاعمال وبستشير وحدة من المستشارين. وفيه واحد مستشار لسى ما جا بنفسس المجال اللي بدخل فيه بنتظره يجي. بجمع اكبر قدر ممكن من الاستشارات.

المستشار اللي فمجالي ماجا. لكن استشرت وحدة متخصصة في تطوير الأعمال وعندها شركة استشارات. وريتها ارقامي. كانت دفعة معنوية كبيرة. وقالت انه ما يمنع ابيع بسعر رخيص بجودة متوسطة لكن بتخسر قصة البراند عكس الخطة الأصلية حقتك لأن فيها قصة وتوجه واضح. لكن قالت ... يتبع

ما يمنع ابدا انك تبدا بواحد فيهم بعدين الثاني او كل واحد لحاله بنفس الوقت.
على كل حال, هبدأ بالشريحة الأكبر بالسعر المناسب (خطة ب) خصوصا ان عندي اكثر من 3000 ايميل بالاسعار المناسبة لهم غالبيتهم بالسعر المناسب وبيكون سهل اسوي حملة تسويقية ع الايميل باقل ميزانية للتسويق.

قاعد اسوي حساب للتوقعات المالية, على ربح 25% تقريبا (هذا المتعارف عليه بالبزنس تقريبا). يبغالي أبيع كميات كبيرة مرة عشان يصير ربح معقول. لما ازود خمسة ريال أو أنقص خمسة ريال بالتكاليف تلعب بالحسبة فوق تحت. عرفت ليه الشركات تحاول تقلل التكاليف قدر المستطاع

لازم اخلص مسودة البزنس بلان خلال اسبوعين. تقرير الاستبيان اللي سويته على 3400 عينة خلصته الحمدلله وكان الناتج 30 صفحة تقريبا. البزنس بلان بتكون بين 50 إلى 100 صفحة.

إلى #الرياض
شيئين استفدتهم من مشواري بهذا البزنس رغم اني ما سويت وانجازي صفر.
الاول هو اني صرت اسافر واروح اماكن ماعمري فكرت اروح لها
والثاني هو اني قاعد اتعلم كيف ابني مشروع

قبل ست ايام وانا بقمة التحطيم والحيرة كنت اتسائل عن منافسي الأول كم يبيع بالشهر. بمعنى اخر هل السوق اللي انا داخل له يسوى او لا؟ اليوم بالصدفة عرفت كم يبيع باخر يوم لي بالرياض. طلع يبيع رقم ما كنت أتخيله! معلومتي متأكد منها ١٠٠% وعرفت عنها بالصدفة. الى الان مو مصدق

لا اخفيكم اني أمس كنت خلاص افكر بشكل رسمي اوقف المشروع اللي اصلا مابدا حتى اني رحت السوق اليوم وانا ماني متوقع شي وكنت بريح ضميري عشان ارجع اكنسل الفكرة. كنت افكر اوقفه لاني خفت. طبعا الشي الثاني اللي حمسني، هو مقدار الربحية. السعر للحبة طلع نص اللي كنت راصد له تقريبا وهذا شي بطل

احس اني تخطيت عقبة

COUNTDOWN ! 64 DAYS 😳!

شركات الدعم اللوجستي تحسب لك المساحة التخزينية بالمتر المكعب بايجار شهري. وعندي تصور مبدأي لأبعاد الباكج للمنتجات, فقعدت أحسب كم منتج أقدر أرص بالمتر المكعب وكيف طريقة رص المنتجات بحيث تقلل علي التكلفة. رغم ان قانون الحجم يقول اني أقدر أرص 110 منتج, إلا أني أقدر أرص 86 كحد أقصى.

اتذكر مرة سالت فيها وكان سعر المتر المكعب ٤٠ ريال بالشهر. فيعني تخزين المنتج الواحد بيكلفني ٤٥ هللة بالشهر (٤٠ ر.س. ÷ ٨٦) وانا بالبزنس بلان كنت حاطه ٥ ريال احتياط 😮

قاعد أرتب ملف اكسل يحتوي على التكاليف التأسيسية للمشروع. المنتجات لحالها بتكلف 45% من رأس المال. والباقي مصاريف تأسيسية مثل هوية ومطبوعات وموقع الخ. وحطيت كاش إحتياط 50% زيادة من راس المال. توتال المبلغ هذا يشكّل 69% من إجمالي مدخراتي اللي جمعتها. يعني لو فشلت بيبقى لي 31% بس🤡

شرٌ لابد منه. بتجهز له وأرسم أكثر من سيناريو كيف بنسحب بأقل الخساير لو ما قدرت أبيع.

مقالة جميلة تتكلم عن ليش ٩٠% من التجارات الإلكترونية تفشل بأول ٣شهور. رقم يخوف. وأعجبتني جملتين
If u fail 2 plan, then u plan 2 fail
+
Starting any business, has no guarantee of success. Period!
قاعد اقرا عن قصص الفشل لان احس فيه شي طاف علي. ماعرف ايش هو
chrisducker.com

www.chrisducker.com

أحس فيه شي غلط بتخطيطي أو فيه شي ناقص. فيه امور متوقعها ممكن تخليني افشل وهذي اوك ع الاقل اعرفها. لكن ماعرف، فيه شي ناقص. فيه شي مو جاي على بالي ماعرف ايش هو. احاول أكون سلبي + واقعي لكن الخوف هو بالthings u don't know that u don't know
مش بال things you know that u dont know

راح أوقف كتابة بهذا الثريد لين ينطلق المشروع وأحقق الهدف اللي لازم أبيعه (أو أفشل). التغريدة الجاية بتكون بدايتها "نجحت" أو "فشلت".

بكرا نكمل وش صار ع المشروع 👌

سوالف واجد صارت لدرجة لما تذكرت شكثر السوالف تعبت 😂.

بعد ما شفت مبيعات منافسي لما عرفت انه يشتري بالجملة من سوق بالرياض، قررت بيناير اني ادخل وانافسه بما انه الخطة هي ب وتركز على السعر القليل. اشتريت عينات كلفتني كم ألف، لما وصلتني وكشفت عليها لقيت ان ٨٠% منها اخطاء مصنعية 🙃! جودة اقرب ما تتسمى بزبالة للاسف

كلمت المحل وقلت له المنتجات مليانة اخطاء هل تقدرون تعدلون عليها ؟ قال هذي بضاعتنا وهذي جودتنا لو عجبك حياك الله ماعجبك مانقدر نعدل لك. قلت طيب واذا شريت منك بالجملة وبعتها ولقيت فيها خطأ؟ هل تقدر ترجعها؟ قال لازم ترجع الدرزن كامل 🙃. قلت اها دام هذي علومك توكل بس

فخلاصة الكلام، المنافس هذا باسعاره هذي، المحلات بالشارع تبيعها بنص سعر المنافس هذا. اللهم انه حاط بوكس حلو ويسوي اعلانات ولا اي شخص يقدر يشتريها من اي محل بالشارع او يروح سوق الجملة يوفر لنفسه ٦٠% من السعر. وبعد ما شفت حسابه بتويتر لقيت انه العملاء مستائين منه .. يتبع

وبسبب كثرة مسابقاته التويترية صعب تلقى تجارب العملاء كلها مسابقات منشن ورتويت وسبحان الله الخ. لكن لو تبحث بتلقى الناس المستائين. من بعدها غيرت رايي وتركت هالسوق لهم وقررت ارجع للجودة العالية بالسعر المرتفع لكن نقصته شوي. وتكلفة منتجي دبل ونص تكلفة منتج المنافس

بس طبعا مع ارتفاع الجودة والسعر هختلتف الشريحة المستهدفة.
هو يستهدف ال Low middle class وانا استهدف الhigh middle class
بعدها قعدت افحط ادور شخص يصنعها لي ولقيت اخيرا شخص وافق يصنعها لكن بتكلفة عالية وللاسف مب فاضي ينقلها من ورق لواقع

يبغاني اجيب له المنتج جاهز. وبسبب كورونا صار فيه تعطيل كبير.
رجعت للي رسم المنتجات وطلبته يصنعها لي ووافق بمبلغ وقدره. وخلصنا كم عينة الحين ولله الحمد 😻 يمكن يحتاج شهر كذا نخلصهم كلهم. وارجعهم للمصنع يصنعهم لي

سويت السجل التجاري وكلف ١٠٣٠ ريال سنتين مع اشتراك الغرفة. واشتركت بمنصة @SallaApp سلة بلس ب٩٩ ريال وشريت دومين ب ٥٠ ريال. البنك للاسف عقدوني وتعاملهم سيء جدا الاهلي ولما حاولنا نفتح بالانماء قالو لازم صورة لواجهة متجركم فاضطرينا ناجلها يارب بكرا نخلصها

الآن قاعد أفكر بالباكجنج. كانت عندي فكرة باكج وللأسف ما تتنفذ هنا بالكميات اللي أبغاها أسويها لازم الصين. والصين تحتاج كميات بالآلاف. لكن لقيت فكرة باكج ثانية 150 حبة الحبة ب 20 وتوتال 3000, لو تسوي 300 حبة تطلع الحبة ب 9 ريال وتوتال 2700!! البزنس ما يلعبون الا بالكميات :)

#الضريبه_الجديده فيها ميزة.
اذا فيه مؤسسة مسجلة ب #ضريبة_القيمة_المضافة ف١٠٠% قاعد يبيع اكثر من ٣٨٥ ألف بالسنة 👌
تفيدك بتحليل المبيعات للمنافسين
لان انصدمت اليوم ان واحد من المنافسين ع شهرته مو مسجل بالضريبة وكنت اتوقعه يبيع مليون ريال سنوي!

قاعد أبحث الحين بكراتين الشحن + الباكج. كراتين الشحن لقيت موقع زين بس ماجربتهم theebcartons.sa واسعارهم زينة. الكرتون بشركة التخزين اللي بتعامل معها سعره 3 ريال وهذا الموقع بيطلع علي ب ريال ونص مع #الضريبة_الجديدة
وكلمت كذا مصنع باكج وكراتين

theebcartons.sa

ومن كثر اللي كلمتهم بعضهم رد وبعضهم ما رد, سويت ملف وورد سميته صفحة تتبع الموردين. اكتب فيه بالترتيب ارقام جوالات ومكاتب واسماء المصانع واسعارهم واذا ردو او لا عشان ما الخبط بعدين وماعرف ع مين اتصلت ومين ماكلمت 😷

بما اني راح ادخل تجارة إلكترونية فلابد اتثقف بالجانب المحاسبي. وحاليا جالس احضر دورة لمنصة قيود للمحاسبة سعرهم ٢٢٨ ريال شهريا وفيه خاصية ربط مع سلة
خصوصا عندهم خدمة محاسبين بالساعة.

اليوم تعلمت شي خطير! عشان تسجل علامتك التجارية وتحفظها لازم تنشرها الهيئة السعودية للحقوق الملكية ستين يوم اذا تما الموافقة عشان اي شخص يقدر يبدي اعتراضه. حابب تشوف علامات تجارية منشورة طازا؟ الرابط في الاسفل

عشان تسجل علامتك التجارية لازم تختار فئة وحدة فقط من اكثر من خمسين فئة. اذا سجلت فئتين يعتبر طلبين منفصلين كل واحد يكلف ٨٥٠٠ ريال وهنا طريقة رؤية الفئات

بصحح كلامي هنا
اذا تاجر مو مسجل بالضريبة معناته ١٠٠% مو قاعد يبيع اكثر من ٣٧٥ الف بالسنة
لكن اذا مسجل، الله اعلم ممكن يبيع اكثر من ٣٧٥ الف سنوي (تكون إلزامية) وممكن أقل (تكون اختيارية)
وميزة اللي يسجل انه تسمح له يسترجع الضرايب اللي دفعها كلها لتجارته

كنت أقارن بين البنوك لحساب مؤسسة جاري. للأمانة اخترت البنك الفرنسي لانه فاضي بمدينتي عكس البنوك الثانية زحمة. ولما سالت احد المختصين بالتجارة عن افضل بنك قال "اختار البنك اللي تعرف فيه واحد" 😂. فيه معايير ثانية لو بتفعل الدفع الالكتروني بمتجرك واتوقع الانماء هو افضل بنك فيها

البنك الفرنسي قدرت افتح فيه حساب بنفس اليوم. بنك الانماء عندهم فتح حساب مؤسسات الكتروني لكن لما عبيته قال زر الفرع. والفرع رفع الاوراق للفرع الرئيسي ولهم اكثر من اسبوع ماردو.

لما تتعامل مع البنك حط في بالك انهم ينظرون بشكل مختلف للشركات عن المؤسسات الفردية. فخلك واضح بمصطلحاتك معاهم. الشي الثاني، لما تفتح حساب مؤسسة تأكد انك تطلب نموذج خدمات الكترونية. الافراد سهلة تفتح اونلاين مباشرة لكن المؤسسة لازم تقدم نموذج وغالبا من الفرع
#التجارة_الالكترونية

اللي كنت احتاجه فقط حساب جاري +خدمات اونلاين اقدر ادخل فيها لحساب المؤسسة اونلاين. لو تبغا نقاط بيع او دفع الكتروني هذي لها سياسة ونماذج خاصة. حسب ويبينار مازن الضراب، عشان تفعل دفع الكتروني تاخذ شهر وتختلف بوابات الدفع عن بعض
#التجارة_الالكترونية
youtu.be

امس ولله الحمد قدرت اختار الالوان للهوية واخلصها لان المصمم السابق ما كمل شغله وكان يتاخر كثير.
وبخصوص #الهوية_البصرية ، حاول تختار شخص فاهم في الألوان ويعرف لنظرية الألوان
Color Theory
بحيث يحدد لك ألوان رئيسية وثانوية وفرعية ما تطلع منها
blog.catreloaded.org

blog.catreloaded.org

@mks_95 وجزاك الله خير ع دعواتك 🤲

نصيحة لكل شخص يبي يبدا مشروع ويبغا #مصمم_جرافكس و #هوية_مرئية
لما تصمم هويتك ابتعد كل البعد عن الرخص والهوية الرخيصة ام خمسين ريال. روح مع شخص فاهم. والأهم من هذا كله، لا ترضى تتعامل الا مع المصمم نفسه. لو رحت عن طريق وكالة، اشرط انك تجلس وتكلم المصمم بنفسك. لا يكون بينكم وسيط!

لان الوسيط بينقل كلامك وطلباتك غلط. وحط في بالك انك لو قدرت تجلس مع المصمم شخصيا مش عن بعد، بيكون افضل وافضل.
ولو قدرت تلقى مطبعة عندها مصمم كويس، بيوفر عليك شغل كثير! لان مصمم المطبعة بيكون فاهم للمقاسات ع الورق وتضرب عصفورين بحجر واحد. لو مالقيت، روح لمصمم فاهم!

كنت بسوي خمسين حبة تجربة لكنها تقريبا ما توكل عيش. خصوصا ان الباكجنج يحتاج اطلب اقل شي ٥٠٠ حبة. فقررت ارفع الكمية الى ٢٠٠. فيه شخص قرر يدخل معي مضاربة وتوصلنا الى حسبة عشان يشاركني بدون يمتلك نسبة من المشروع. وهي ممتازة للتمويل 👌
#التجارة_الالكترونية

قرر يدخل معي بالحسبة التالية: نقسم جميع التكاليف الادارية والتشغيلية (ومن ضمنها راتب لي) +تكاليف المنتجات على عدد المنتجات. والربح للمنتجات اللي شراها ياخذها هو. وفي حالة الخسارة، له حرية التصرف بالمنتجات اللي شراها.

هالطريقة سمحت لي ارفع الكمية الى ٢٠٠. وبكذا لما اقسم التكاليف الادارية كاملة ع الخبات يكون اثرها اقل على التكلفة من ٥٠ حبة.
بحالة مابعنا، ننقل الكمية للشهر الثاني ونحسب من جديد التكاليف الادارية ونزيدها ع تكلفة المنتج.

هالطريقة خلتني ارفع راس المال الباقي ١٠٠% 👌
بدون ديون، وبدون قيود.
صحيح بياخذ ربح كل ال١٠٠ حبة. لكن بكون ربحان بال١٠٠ معي اكثر من لو سويت خمسين بس. لان بالخمسين بكون خسران ولو انه شي طبيعي ما احقق ارباح باول سنة لكن why not نربح؟

Yo!
وبعد طول انتظار. أخيرا شفت أول عينة حية للمشروع. بطني كان يعورني قبل أشوفها. فعلا، لما تصنع الشي in-house ما تستورده من برا جاهز بتواجه صعوبات قاسية.

كانت عندي مشكلة بألوان الهوية، و #تصميم_جرافكس جربت كذا مصمم للاسف محد قدر يقدم الجودة اللي ابغاها. ومحد عنده الذوق اللي يستاهله براندي. لكن أخيرا وحدة مصممة ذوقها رايق وافقت تسوي لي الهوية وبتتفرغ بعد ٣ أسابيع. طبعا توسط لي الحبيب @bader_vid عندها لأنها كانت زعلانة علي 😔

وطبعا ولله الحمد استلمت التمويل وقدرت أرفع راس المال 500% !!! بدون ما أضحي بنسبة من الشركة 🥳. بدون قروض! بدون ديون! بدون التزامات! ايزي كاش!

ما دامك مستمر, راح توصل.
واستلمت العينات !!! ا س ت ل م ت العينااااااااااااااااات !

الحمدلله. قدرت اشتري مواد للعينات. مازال الموضوع يحتاج تعديل بسيط باذن الله واوصل للنتايج المطلوبة.
فعلا الكاش الاحتياطي مهم. على قولة واحد تاجر, اذا كان المشروع بيكلفك مثلا س , خل معك كاش 2س (دبل). لأن ماتدري وش يطرى عليك.
ارجع واقول, هل المشروع بينجح؟ مدري! بس نتعلم.

الكاش فلو انتبه منه!!! بسهولة جدا تضيع لك مبلغ كبير ع قلة سنع.
لان لو ما أدرت الكاش بتلاقي ان ميزانيتك احترقت ومابقى لك شي للتسويق

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد