وتاني تقليد😒 بس المرة دي حأتكلم عن شي مختلف مع انو التقليد المفروض انو كوميدي ونضحك لكن تقليدو ما بيضحك بس لفت نظري القهوة والا الورنيش العاملو في وشو ولأنو كتار ماعارفين يعني شنو blackface ( الوجه الاسود) المعروف عالميا فحتكلم عنو لرفع الوعي خاصة لما تقرر تكتب كوميدي جمب اسمك
قبل اي شي خلينا نعرف الشخص المقلد الغير مضحك دا ..اسمو عبدالله منو كدا ما متذكرة بس الحساب النزل تقل الدم دا صاحبو اسمو عبدالرحمن السدحان @A_Sadhan فخلي صحبك يقرأ الكلام دا لرفع مستوى الوعي عندو وعندي سؤال ليك في نهاية الثريد دا
اولا مصطلح black face مصطلح عالمي معروف يرمز لحقبة زمنية عنصرية ضد السود بدأت في القرن ال١٩ في امريكا في المسارح الكانت بتشكل ثقافة المجتمع وقتها وهي انو شخص ابيض يدهن نفسو بشي اسود عشان يمثل انو شخص من الاصول الافريقية ويمثل باستخدام المكياج
كان اساس الموضوع انو ينمطوا السود بمفاهيم معينة من خلال شخص ابيض بحيث انهم يستخدموا المبالغة بصورة تبشع بالسود وتجعل منهم أغبياء ،كسالى، يتحدثوا بلغة غريبة، قتلة ، مجرمين ، واي تصنيف هم حابين يعملوه ويرسخوه في الاذهان
استخدموا في تكوين الصورة النمطية مكياج غير منظم وعملو الشفاه كبيرة تكاد تصل للاذنين مع صبغها باللون الاحمر او الابيض للتركيز عليها لجعل الصورة بشعة حتى في الرسوم المتحركة لاحقا دخل نفس النمط
من اشهر الممثلين الاشتهروا بالنوع دا هو آل جولسون و لو كتبتو في قوقل اسمو حتلقو معلومات أكتر عنه والسئ في الموضوع انهم في افلامهم ومسرحياتهم كانت عبارات العنصرية صريحة للغاية لدرجات فوق المقرفة
في احد المشاهد الانا شفتها في احد ممثلي البلاك فيس بيتكلم مع واحدة بيضاء وبيحكي ليها عن امرأة سوداء فقالت ليهو (دي ليست امرأة لأنها سوداء ) دا نموذج وكانت في اكتر من كدة من مصطلحات الترسيخ العنصرية
بعد نجاح هذا النوع من المسارح والافلام انتشرت بكثرة بين كل الفئات وبقى في ممثلين اتبنوا النوع دا واصبحت متخصصة واكثر اشمئزازا وللاسف نجحت في انها تجعل السود في انماط ثابتة ظهرت في تصرفات عرقية في وسط البيض تجاه السود في الحياة العادية حتى بين الاطفال
النوع دا شوه حاجات كتيرة زي الموسيقى والرقص الافريقي وجعله كنوع من النكت والدعابة والغباء بانهم كانوا بيرقصوا بصورة مبالغ فيها بالاضافة لتثبيت العبودية والغباء والكسل زي ما قلت برضو بنمط كوميدي مبالغ فيه وانو يمثل شخص ابيض التزييف دا سهل وممكن يدخل اي قيم عايز يضيفا
حتى بعد انتهاء حقبة العبودية في امريكا استمرت النظرة دي وانتقلت للعالم كلو ولسة حتى هذه اللحظة الانا بتكلم فيها دي بالرغم من الوعي العالمي والطفرة الكبيرة في تغيير المفهوم بس اخذت سنين عشان تبدأ تتغير والناس تتعرف على الافارقة فعلا وتاريخهم
خطورة البلاك فيس انها ما بترسخ للبيض بس مفاهيم العنصرية لكن حتى للسود رسخت مفاهيم في اللا وعي بتاعنا عن مفاهيم زي اختلاف الاعراق والطبقية والدونية وللاسف انها نمطت الجمال وحصرتو في اللون الابيض فبقت في اجيال كارهة لنفسها مصدقة انها قبيحة ومؤمنة بكدة ولفترة طويلة
عشان اضرب امثلة واقعية عن تأثير البلاك فيس في عقولنا لما كنا اطفال وبنشوف رسوم متحركة او افلام كانت تدور الاحداث في توم اند جيري حول غباء الخادمة السوداء في المنزل وصراخها وهروبها بمجرد تشوف الفأر وملابسا وكتير من الايحاءات
_جيري يدخل رأسه في الحبر الاسود يتحول بقدرة قادر لافريقي بشفاه كبيرة حمراء
_اي حركة تتحرق او تتوسخ بزفت تتحول لافريقي بشفاه كبيرة لا وكمان شعر افريقي مربوط بشرايط حمراء
_تتحرق في فرن تتحول لافريقي في اشارة انو الميلانين دا حريقة ما لون خلقه الله وجميل وكذلك الشعر
_اي حركة تتحرق او تتوسخ بزفت تتحول لافريقي بشفاه كبيرة لا وكمان شعر افريقي مربوط بشرايط حمراء
_تتحرق في فرن تتحول لافريقي في اشارة انو الميلانين دا حريقة ما لون خلقه الله وجميل وكذلك الشعر
والامثلة كتيرة شديد ما بس توم وجيري اغلب المسلسلات بالذات القديمة البلاك فيس فيها موجود وحاضر نحن وصغار كانت بتضحنا بس في اللا وعي بتاعنا كانت بترسخ لحاجات نحن الان بنشوفا بينا وفي مجتمعاتنا ونحن بعيدين مئات الاميال عن مركزها في امريكا لكن دا تأثير الاعلام كدة
نجي نشوف في مجتمعنا السوداني وكيف خلال فترة سنين وبسبب الصمت انتشرت #خرافات_عن_السودان بدون اسباب حقيقية مثلا نموذج السودانيين كسالى دا اصبح تنميط واضح لو ما اترفض حيجني ثماره احفادنا لانو كل الحصل في البلاك فيس كان اساسه التصوير في العقل بشئ غي صحيح
نجي لاعلام الشرق الاوسط خاصة جيراننا شمالنا نمطوا من خلال افلامهم ماخلو شي عننا استخدمو البلاك فيس واي شي في وقت كان نجمهم ساطع وللآن مواصلين بس نجمهم بدأ يتضاءل واعلامهم سئ السمعة بدأ ما عندو مصداقية واصبحوا غير معترف بهم او انا ما بعترف بيهم ودا رأي شخصي طبعا✋🏾
البلاك فيس دا خطر جدا عالميا انك تستخدمه لأنه بيدل على عنصرية وتاريخ انت بتعيدوا وغالبا في الشرق الاوسط بيحصل عن جهل حتى بالمقبول والمرفوض فتلقى الامور مختلطة والصح والخطأ غير واضح
كتير بشوف نقاشات في الموضوع خاصة من العرب بانه الافارقة اوفر بزيادة ودراما ...الخ بس لما يبقى الموضوع جادي وتشوف اطفال صغار كارهين لونهم ونفسهم بسبب اعلام فاشل يبقى الخطورة وصلت اللون الاحمر ويجب الوقوف والتصدي لانه اثره على البيض اقل بس اللهم انهم حيكتسبوا زيادة عنصرية
العرب في بلادهم عندهم مصطلحات هم نفسهم ماعارفين انها غلط بس انها شي اتربوا عليه
عبد= أسود
فستق عبيد=فول سوداني
سوداني = اسود حتى لو ما من الجنسية السودانية
وكتير ما يخلص لو بدأتها بس الرابط هو الجهل بالمعنى وتربية اتربوا عليها وممكن فعلا ما يكون قاصد معنى الكلمات القالا جهلا
عبد= أسود
فستق عبيد=فول سوداني
سوداني = اسود حتى لو ما من الجنسية السودانية
وكتير ما يخلص لو بدأتها بس الرابط هو الجهل بالمعنى وتربية اتربوا عليها وممكن فعلا ما يكون قاصد معنى الكلمات القالا جهلا
نتيجة للحصل حارب السود كتيير جدا عشان يظهروا نفسهم ويمسحوا التهم الاتلفقت ليهم عبر التنميط وبدأت الاعلانات تجيب السود والممثلين والفنانين لا وبقت كمان موضة اللون الاسود دارجة اكتر في الغرب لدرجة بقو البنات يتلونو ودا اثار رفض السود بدرجة كبيرة وظهر مصطلح black fishing
(انت ابيض ما بتجي تاخد سنين من الحرب الجهد بتاع السود عشان تكون انا) وكان الرفض قوي جدا وعشان تعرفوا اكتر ممكن تشوفوا يوتيوب وليه السود بيرفضوا تشبه البيض بيهم لأنه الاراء كتيرة جدا
في النهاية انا كسودانية افريقية ارفض اي اهانة لعرقي الاسود البفتخر بيهو لأني ما حأسمح لزول ينمط اطفالي في اطار انا عشت فيهو لسنين نحن احفاد كوش وممالك السلطنة الزرقاء وتقلي واحفاد علي دينار سودانيين سود عايز تقلدنا تعرف عننا اول ما تستخدم اسهل وارخص اسلوب
Cc
للسيد عبدالرحمن السدحان الاشتهر بتصوير الطفلة الاثيوبية الجميلة هيفاء ..
هل بتقبل اذا انت فعلا بتحب هيفاء وزي اختك زي ما بتقول انو يجي طفل ابيض يلون وجهه بورنيش اسود عشان يقلد هيفاء ؟ كيف هيفاء حتفكر لما تشوفه؟
فكر شوية وحتفهم عشان ما يكون مجرد شهرة وخلاص
للسيد عبدالرحمن السدحان الاشتهر بتصوير الطفلة الاثيوبية الجميلة هيفاء ..
هل بتقبل اذا انت فعلا بتحب هيفاء وزي اختك زي ما بتقول انو يجي طفل ابيض يلون وجهه بورنيش اسود عشان يقلد هيفاء ؟ كيف هيفاء حتفكر لما تشوفه؟
فكر شوية وحتفهم عشان ما يكون مجرد شهرة وخلاص
شكرا للردود ❤ في ردود البعض من اخواني السوداني تنادي بازدراء مثل هذه الافعال وتجاهلها واننا واثقين من نفسنا بس الفكرة انك انت انسان واعي وفاهم ومافي شئ حيؤثر عليك بالرغم من انو النظرية دي ما صحيحة كلنا جيل اتأثر بالاعلام وقاعدة جوانت اشياء نعتبرا من المسكوت عنها ومنها اللون
وحتى بقينا نتجاهل لغاية ما تطورت الاشياء في داخلنا وفي داخل العنصريين بدون ما يقصدوا او يعرفوا الصمت لا يعتبر ثقة بالنفس الصمت اما انك توافق او انك خائف من الرد او ان الموضوع لا يعنيك والموضوع كبير جدا ونحن شايفين قمة جبل الجليد فقط
ممكن انت تكون واعي بس في اطفال في مجتمعنا صمتنا شوه جواهم حاجات كتيرة ولانك واثق من نفسك اكيد عندك طفل ابنك او اخوك او اي طفل هو مافاهم ليه الزول دا عامل لون غريب في وشو وواضح انو شئ غريب وتشويه مفروض يتغسل هل اللون الاسود وسخ؟ هل الميلانين وسخ؟
في تجارب اتعملت لأطفال سود وسألوهم باستخدام لعبة سوداء واخرى بيضاء ايهما الاجمل والاذكى والجيدة كانوا بيختاروا البيضاء وايهما الاسوأ و الاغبى والاقبح اختاروا السوداء وايهما تشبهك اختاروا السوداء ..تخيلوا اطفال تشوهت نظرتهم لنفسهم وبيشوف انو شين بس لأنه اسود بسبب ناس بيهظرو بجهل
دا موجود في نفوس اطفالنا الآن بسبب الاعلام البيقدم البلاك فيس حتى الآن ومن خلال مسلسلات الاطفال والالعاب البتمثل الخير باللون الابيض بالرغم من انو بدأ يتغير ومهما كابرت وقلت لأ جواك صوت مشوه بيقول الابيض اجمل لأنو انت ما كنت مخير لما كنت صغير الاعلام صنع رأيك
تعليقات العرب بتحس انهم بيظنوا انهم من العرق الابيض ودا ما حقيقي العرب عالميا يعتبروا من الملونيين مع اقليات بيضاء بس حسب اي مجتمع بالمقارنة تتم تصنيف درجات اللون حتى انو عبدالله القلدنا بالبلاك فيس هو اسمر والعرب منمطين عالميا برضو ما بس الافارقة
يعني انت كعربي لو مشيت مجتمع الاوربيين والقوقازيين حتكون ملون ولا على كيفك وحيتم تصنيفك برضو زي ما البعض منهم بيتصرف بعنصرية فالعنصرية رفضها بيشمل الكل والتغيير بيصل تأثيره للكل وما حتحس بالفرق الا تجرب انت ويجربها ابنائك
جاري تحميل الاقتراحات...