تحت التغريدة وخلال الثريد دا حأتكلم عن تجربة مزارعين انجليزي و استرالي زرعوا محصول الذرة البيضاء حول منطقة دوكة #القضارف ونشوف تجربتهم وانتاجهم كان كيف والتقانات الزراعية الاستخدموها شنو ومقارنة بينهم وبين مزارعين بنفس المنطقة
#مشروع_في_السودان
#تعرف_على_السودان
#ثريد_الملكة
#مشروع_في_السودان
#تعرف_على_السودان
#ثريد_الملكة
لما بدأوا يخططوا للمشروع اختاروا المنطقة وتاريخ الزراعة حسب احصائيات الامطار علما ان دا القطاع المطري يعني بيعتمد على الامطار فكانت اول خطوة انهم قرروا انهم يزرعوا في وقت مبكر و اختاروا بذور صنف كويس اسمه (وَد أحمد) و نضفو الارض كويس من الحشائش , استخدموا الزرّاعات الالية
اهم عنصر : البذور كانت محسنة ومدروسة والاهم انها مغربلة وما مخلوطة بأي بذور معاها ودا حننشوف نتائجو بعدين واستخدموا كمان تقنية gps في تحرك الزرّاعات يعني بتكون ماشةبتوجيه جغرافي معين واستخدموا تقنية الزراعة واضافة المبيد والسماد في نفس الوقت ودا بيوفر كتير من الجهد والمال وافضل
جون وفيل زرعوا في شهر يونيو 2017 ودا يعتبر وقت مبكر للزراعة ودي حاجة كويسة انهم ما حيتفاجؤوا بالأمطار خلاص دا موسم الامطارالتخطيط المبكر مافي احسن منو ,,والصور دي كانت لعمر النباتات بتاريخ 3/8/2017 بعد 3 شهور تقريبا من الزراعة لاحظوا لترتيب الصفوف لانهم استخدمو الزراعات الآلية
بالنسبة للمسافات كانت مدروسة علميا وزرعو 18 نبات للمتر المربع ما يساوي 70الف نبات للفدان الواحد وكانت مرتبة بالطريقة الانتو شايفنها دي والارض نظيفة وخالية من الحشائش بطريقة مدهشة لاستخدامهم المبيدات ولأنهم زرعوا بالزرّاعات الآلية المسافات بين كل نبات والتاني كانت ثابتة ومرتبة
وهنا عمر النباتات بعد تقريبا شهرين من الصور القبلها لاحظوا للترتيب وحجم قناديل الذرة يعني حاجة ابداع حقيقي ?
كمان شوفوا هنا نظافة الارض لأنهم استخدموا مبيدات الحشائش
ممكن الزول الما شاف ذرة مزروعة قبل كدة ما يعرف الفرق بس الفرق هنا ,,دي صور لمزارع سودانيين جيران لهم في نفس مزرعة الخواجات ديل نفس الارض والمناخ والمطر واي شي بس باستخدام الزراعة التقليدية بتقانات عادية والظاهرة دي حشائش بكميات مهولة والحشائش دي حتنزل بذورا في الارض وتقوم تاني
والسبب انهم استخدموا تقاوي ما نظيفة ما استخدموا مبيدات الحشائش ولاحظوا لحجم القناديل مقارنة بمحصول جون وفيل ميلر
نجي للحصاد : الانتاج بتاع مزرعة جون وفيل كان عاااالي جدا وطبعا حيستخدموا الحصادات الالية ونوع المحصول كان جودتو ممتازة والمفاجئة انو نفس الارض كانت بتنتج 3 شوالات للفدان الواحد قبل ما يجو جون وفيل تتوقعوا الفدان اداهم كم؟؟؟??
كانت النتيجة انو الفدان اداهم 18 شوال للفدان الواحد ? يعني انتاج رهيب وشركتهم في القضارف اسمها Globe وشاركوا كل التقانات والتجربة مع المزارعين هناك ومستعدين انهم يوفروها للأي زول حابي
في ختام الثريد عايزة اقول انو بلدنا فيها خير كتير حتلقو ناس حيحبطوكم والبيتكلم بدون ما يكون عارف حاجة ولا عندو تجربة وعلى فكرة جون وميلر ديل مثال بس في عدد كبير من السودانيين ناجحين في الزراعة ما تسمعوا كلام زول ما عندو تجربة شوف بعينك وابدأ مشروعك وما يوقفك محبط
#انتهى_الثريد
#انتهى_الثريد
جاري تحميل الاقتراحات...