خلال الثريد دا حأتكلم عن ردود افعال البريطانيين والاعلام في بريطانيا لأحداث الانتصارات السودانية الحصلت في #تاريخ_السودان خلال فترة حصار الخرطوم ومقتل الجنرال البريطاني تشارلز غوردون في 1885 م على يد الأنصار بقيادة المهدي
#تعرف_على_السودان
#تعرف_على_السودان
في نقطة لازم اوضحها قبل اي شي انو غوردون اسمو (باشا)لأنه لغاية ما مات كان بيحكم كموظف تحت الحكم العثماني التركي بموافقة من الحكومة البريطانية وادوه لقب باشا التركي وهو في نفس الوقت من جنرالات الحرب البريطانيين المشهورين وبيعتبر رمز بالنسبة للشعب البريطاني كان عندو شعبية بينهم
وكان شغال في السودان ورجع بريطانيا وتاني استدعوه عشان كانت الاوضاع اتأزمت في السودان بسبب الأستعمار التركي وبدأت الثورات تشتعل وخاصة بعد معركة شيكان 1883 المات فيها هكس واركان حربه وجنرالات الجيش والجيش كله الكان مكون من مصريين واتراك واخرين المهدي وجيشه هزموهم هزيمة كبيرة
بدأت بريطانيا ما تثق في الحكم التركي في مصر وطلبت منهم انهم يخلوا السودان ورسلوا غوردون الخرطوم عشان يخلي الموظفين الموجودين هناك وكل الحامية ويرجع ويفضوا السودان وفعلا مشى وبدأ يخلي في النساء والاطفال(مصريين واتراك) وكدة في نفس الوقت حاول يسايس الثوار وواجهوه بالرفض التام
وقرر المهدي انه يدخل الخرطوم وياخدا عنوة من غوردون وسمعوا البريطانيين ان المهدي حاصر الخرطوم واستمر الحصار قرابة السنة في الوقت دا بدأت الصحافة البريطانية تثير ضجة حول الموضوع ووصلوه للبرلمان البريطاني انه ياجماعة غروردون دا انقذوه خاصة انو الثوار منعوا التموين منهم
استمرت الصحافة في الحاحها وبقى قضية رأي عام يتداولوها وفي النهاية رضخت الحكومة وارسلوا اللورد وليزلي معاه حملة عشان ينقذ غوردون ,,سمع المهدي انه في حملة جاية فشاور ناسه وادوه رأيين الاول انهم يمشوا يلاقوا الحملة هناك ويحاربوهم ولو اتهزموا يرجعوا لكردفان
الرأي التاني كان راي فريق الشيخ محمد ودنوباوي وقال ليهو بما معناهو اسي انت لو عندك صيد ملاحقو فترة وصيدك بدأ يضعف تخليهو وتمشي تطارد ليك صيد جديد لسة بقوته؟ والافضل انه ندخل الخرطوم بسرعة قبل الحملة تصل ويسمعوا من بعيد اننا دخلنا الخرطوم فيخيب السبب الجايين عشانو ودا الحصل
دخلوا الثوار الخرطوم وكانت حملة وليزلي وصلت السبلوقة واتقلبت باخرة ونزلوا وفضوها واخدت منهم يوم كامل كان الثوار دخلوا الخرطوم وقتلوا غوردون وعلقوا رأسه على بوابة المدينة في الاثناء دي لسة كانت بريطانيا والرأي العام كلو متابع حملة وليزلي وانقاذ غوردون
دخلت الحملة على مشارف الخرطوم لاقوها الثوار بالقنابل والنار من كل اتجاه من الحلفاية وامدرمان وتوتي عرفوا انه الخرطوم في يد الانصار ووروهم بمقتل غوردون طوالي البريطانيين لفو ببواخرهم ورجعوا وقالوا المهدي وانصاره كانوا بيناوشوهم لامن وصلوا ابو حمد واتأكدوا انهم ما راجعين تاني
كدة الاخبار وصلت بريطانيا وبدأت اصوات اللوم والحسرة من كل اتجاه من الشعب والصحافة وحتى في البرلمان حتى الملكة زاااتا لامت حكومتا على التأخر في انقاذه وبدأت الصحافة تكتب وترسم وتعلى الاصوات وكانت اشهر مقولة (too late ) كناية عن التأخر وصوروا بريطانيا في شكل فتاة حزينة
كتبوا في الوقت داك كتير بما يعرف بالهجاء السياسي في حق حكومتهم المقصرة في حق غوردون والاشهر قصيدة طويلة اتكتبت لنفس السبب اسمها too late ودا مقطع منها :
Too late!
Loud through the desert sounds
That piteous cry, and to the farthest bounds
Of England's Empire echoes.
Too late!
Loud through the desert sounds
That piteous cry, and to the farthest bounds
Of England's Empire echoes.
وبعد داك بدأوا البريطانيين يلعبوا على تلميع نجم غوردون وانه مات مرفوع الراس وانه مات بطل ورسموا ليهو صورة اتفقوا عليها لانو بريطانيا كانت ما بتهزم ودي كانت هزيمة قوية بالنسبة ليهم لاحظوا انه الرسامين رسموا ملامح الانفة والشجاعة على وجه غوردون في مواجهة الانصار الكتار
لما المهدي اجتمع بالقادة قال ليهم عايز غوردون عشان يبادلوا مع عرابي وتجيبوه لي حي وفي قول بيقول انه غوردون ما مات على سلالم السرايا بل هو كان مجهز باخرة وجاري شافوا محمد ود نوباوي قتلوا بالحربة طوالي وانو القصة ما انتشرت لانوا الانصار غطوا عليهو خوفا عليهو من غضب المهدي
البريطانيين معروفين انهم بيخططوا لسنين وسنين ودا الشي الخلا غوردون ليوم الليلة بطل عملوا ليهو التماثيل والاضرحة وذكراه تدرس ليوم الليلة وما بس كدة بعد معركة كرري بريطانيا انتجت فيلم ضخم جدا اسمو الخرطوم اظهروا فيها غوردون الملاك الشجاع الاتقتل غدرا وبكل شجاعة عشان ينفوا الهزيمة
كدة القصة انتهت وحاضع ليكم رابط فصل اكتر بس عايزة اقول وجهة نظري ,,انا ما درست تاريخ لاني كنت بدرس علمي فما عارفة المناهج بتاعة التاريخ فيها شنو لكن قدر البعرفوا انه طول ما انا في حصة تاريخ بتكون (المهدي) (المهدية) ديل اتر كلمتين موجودات في الكتاب ,,
بالنسبة لي بحترم المهدي جدا كقائد قدر انو يجمع حوله السودانيين في وقت قصير وانه كانت شخصيته صارمة وقدر انه يقرر انو نحن لازم نقاوم الاحتلال لمعتقدات و طريقة ادارة وحتى كمان التوارث التاريخي على حساب شخص واحد يضع ابناءه الماعملوا ولا شي في حساب التاريخ دي كلها اشياء عليها تحفظ
بالنسبة للمؤرخين ليه يسموا الثورة (الثورة المهدية) ايوة انا عارفة انو البيريطانيين سموها (الثورة المهدية) لكن دا كان لسبب انهم عايزين يصغروا حجمها ويحجموها في اسم رجل واحد معاه شوية اتباع ثاروا على بريطانيا العظمى عشان يوروا المجتمع الدولي انه استعمارهم كان لمصلحة الشعوب
ليه نحن نسمي ثورةبحجمها جمعت كل الناس من كل انحاء السودان بكل مذاهبهم والوانهم وعاداتهم عشان يحاربوا الاستعمار نسميها الثورة المهدية علما انه مشايخ كبار في السودان اثبتوا للمهدي وقتها انه ما المهدي المنتظر زي مابيعتقد وسماهم شيوخ الشيطان يعني ما كلهم كان مؤيد معتقداته
ليه ما يكون اسمها الثورة السودانية بقيادة البطل محمد احمد المهدي والا المعاه ما كانوا سودانيين؟؟؟الماتوا في كرري ما كانوا سودانيين؟؟ بعد كرري كانت المآتم في كل انحاء السودان ما في امدرمان ولبب والجزيرة ابا طيب ليه ننفي بطولات قادة زي قرجة ودقنة ونحصرا كلها تحت اسم المهدي؟؟
الثورة كانت سودانية ولو ما السودانين ما كان في شي اسمه مهدية والتاريخ يقيف عند اصحاب البطولات زي المهدي ولا نتعداه لدرجة تعظيم نسله كمان فقط كل شخص بانجازاته وحقو الناس الما ظهرت اسماءهم تظهر وما نحسب ناس على حساب ناس
كلهم قدموا ارواحهم للوطن
#انتهى_الثريد
كلهم قدموا ارواحهم للوطن
#انتهى_الثريد
جاري تحميل الاقتراحات...